May 'K' daw bilang partylist representative... MELANIE: GALING AKO SA PAMILYA NG MGA PULITIKO

ni Janiz Navida - @Showbiz Special | May 7, 2022

Ginulat ng aktres-entrepreneur at tinanghal na Miss International 1979 na si Ms. Melanie Marquez ang entertainment press sa announcement niya sa ipinatawag na press interview kahapon na pinasok na rin niya ang pulitika at ngayon ay tumatakbo bilang 4th nominee ng LBP (Lingkod Bayanihan Partylist) kasama ang ilang retired generals.

Para kay Melanie, hindi naman pagiging pulitiko ang pagiging partylist representative dahil mas gusto niyang isiping extension lang ito ng kanyang advocacy na pagtulong sa mga batang may cleft palate at iba pang malubhang karamdaman bilang dati na siyang tumutulong sa Unicef.

Two decades na raw niyang ginagawa ang pagtulong na galing sa sariling bulsa ang kanyang ginagastos. Pero dahil sa suggestion ng mga kaibigan niyang retired generals na mas marami siyang matutulungan kapag nag-partylist siya ay napapayag na rin si Melanie.

Actually, hindi nga rin daw alam ng kanyang Kuya Joey Marquez ang desisyon niyang ito, although hindi naman daw ito biglaan at matagal din niyang pinag-isipan. Ang gusto lang daw niya ay sigurado muna bago niya i-announce kaya ngayon nga lang niya ipinaalam sa lahat.

Suportado naman daw ng kanyang mga anak ang pagtakbo niyang partylist representative ng LBP na No. 170 sa balota.

At sabi pa ni Ms. Melanie, kung sakaling palarin silang makapasok sa Kongreso, itutuloy pa rin naman niya ang kanyang pag-arte.

Natanong namin siya kung handa na ba siyang ma-bash at kuwestiyunin ang kanyang kredibilidad at edukasyon dahil first time nga niya sa pulitika.

Sagot ng dating beauty queen-actress, galing siya sa pamilya ng mga pulitiko tulad ng kanyang Kuya Joey Marquez na dating Parañaque mayor kaya hindi na bago sa kanya ang pulitika.

Marami na rin naman daw siyang napatunayan at isa na nga rito ang pagbibigay ng karangalan sa bansa nang tanghalin siyang Miss International 1979.

Samantala, speaking of beauty pageants, nahingi namin ang reaksiyon ni Ms. Melanie sa isyung retokado na raw ang karamihan sa mga beauty contestants ngayon, hindi katulad nu'ng panahon niya.

Diretsong sagot niya sa amin, okay lang naman ang mga enhancement at natural lang daw 'yun para sa ikagaganda ng mga kandidata as long as makakatulong ito sa kanila.

Pero sa isyung pagsali ng mga transgender sa mga beauty pageant para sa kababaihan, du'n hindi pabor si Melanie at sabi niya, dapat ay magkaroon ng sariling beauty contest ang mga trans.

Oh, ha? Coming from a beauty queen na 'yan!

Well, let's see kung papalarin ngang pumasok ang LBP Partylist at si Ms. Melanie Marquez sa Kongreso sa araw ng halalan sa Lunes.

---

Nagnasanib-puwersa sa kanilang kampanya ang tatlong senatorial candidates na may iisang layunin na makapaglingkod sa sambayanang Pilipino — sina Monsour Del Rosario, Raffy Tulfo at Gen. Guillermo Eleazar, ang tinaguriang mga “Bagong Idol ng Senado."

Dinumog ang tatlong kandidato sa naganap na grand rally nitong May 5 sa Cauayan, Isabela, ang hometown ni Tulfo.

Si Monsour Del Rosario ay siyam na taon nang nasa public service. Matapos lisanin ang showbiz, anim na taon siyang nagsilbing konsehal sa District 1 ng Lungsod ng Makati, hanggang sa maging congressman mula 2016 hanggang 2018.

Sa tatlong taon niya sa Kongreso ay nakapagtala siya ng 292 house bills and resolutions, kabilang na ang Telecommuting Act o mas kilala bilang Work From Home Law na napakinabangan nang husto ng maraming Pilipino nang pumutok ang pandemya noong 2020.

“Si Monsour ay nagbigay ng karangalan sa ating bayan way back in 1988. Olympian siyang maituturing. Bukod pa riyan, siya ay naging miyembro ng 17th Congress so meron siyang karanasan bilang isang legislator,” ayon kay Tulfo.

“Okay ito maging kasama sa Senado. Walang katatakutan pagdating sa tama. 'Pag kami’y nagkasama sa Senado, maaasahan n'yo pong gagawa kami ng maayos na trabaho na walang kinatatakutan – lahat tablado, lahat ng mga loko-loko,” dagdag pa niya.

Sabi naman ni Monsour, “Kung kami ay papalaring makapasok sa Magic 12 ng Senado, excited akong makatrabaho sina Raffy Tulfo at Gen. Guillermo Eleazar na alam kong tapat ang puso at isip para sa pagseserbisyo. Napakarami na nilang natulungan bilang brodkaster at bilang pulis kaya alam ko na mas marami pa silang matutulungan sa Senado.

"Magkakasama naming itutuloy ang mga nasimulan ko noong ako ay nasa Kongreso pa at ipaglalaban namin ang karapatan at kapakanan ng bawat Pilipino. Nagpapasalamat ako sa mga kababayn ni Idol Raffy dito sa Isabela sa inyong mainit na pagtanggap sa Team Monsour,” wika ni Del Rosario sa nakaraang kampanya nila.

Sige nga, abangan natin kung pare-parehong papalaring makapasok ang tatlo sa Senado sa May 9 elections.

'Di na raw takot ma-bash… PIOLO, JOIN NA RIN SA MGA KAKAMPINK

ni Janiz Navida - @Showbiz Special | May 6, 2022

Hindi lang si Jodi Santamaria ang lantaran na ngayon sa pagsuporta at pangangampanya sa mga kandidatong bet niya para sa 2022 elections. Maging ang Ultimate Crush ng Bayan na si Piolo Pascual na dating tahimik lang at hindi nakikigulo sa pulitika, nakakagulat na ngayon ay very vocal na rin sa kanyang pagiging Kakampink.

Aminado si Piolo na kapag nahaharap sa isyu o intriga, mas pinipili niyang manahimik kesa direkta itong sagutin.

“Bilang artista, sanay na akong pukpukin ng kung anu-anong issue. May mga pagkakataon na kailangang i-address ang isang bagay pero mas madalas, pinipili kong tumahimik,” wika ni Piolo sa isang video kung saan inulit niya ang suporta kay Vice-President Leni Robredo bilang susunod na pangulo ng bansa.

Ganito rin ang trato ni Piolo sa mga isyung pulitika, kung saan mas gusto pa niyang tahimik na magmatyag kaysa maglabas ng saloobin sa takot na baka mabatikos.

“Naisip ko, masyado nang magulo ang mundo para makidagdag pa sa samu't saring ingay. At hindi ko rin alam kung nararapat ba akong pakinggan. Hindi naman ako eksperto sa pulitika,” paliwanag niya.

Ngunit ngayong nakataya ang kinabukasan ng bansa sa Mayo 9, sinabi ni Piolo na hindi na siya dapat manahimik.

“Ang pananahimik sa ganitong panahon ay pagkampi sa mga puwersang nagpapahirap sa maraming Pilipino. Sa mga nakaraang araw, palakas nang palakas ang sigaw. Hindi na ito kayang isawalang-bahala ng bawat Pilipinong nagmamahal sa bayan,” ani Pascual.

“Bulong na ngayo'y isang malakas na ring sigaw, si Leni Robredo ang pangulo ko. Abogada, ekonomista, tapat, at walang bahid ng corruption,” dagdag pa niya.

Para matiyak na tama ang kanyang desisyong suportahan si VP Leni, sinabi ni Piolo na siya’y nagsaliksik, nakinig sa ibang tao at binuksan ang isip bago naghayag ng suporta sa bise-presidente.

Gaya ng ibang volunteers, sinabi ni Piolo na tumugon siya sa panawagan ni VP Leni na tumayo at ipaglaban ang bansa at kapakanan ng taumbayan, lalo na iyong mga nangangailangan.

Todo-hingi ng boto para kay Pacquiao, pero…SASABIHIN NG MADLANG PIPOL, BAWAL SA IG NI JINKEE

ni Janiz Navida - @Showbiz Special | May 2, 2022

Maraming bilib at natutuwa kay Jinkee Pacquiao sa pagiging very supportive wife sa presidentiable hubby niyang si Sen. Manny Pacquiao.

Kesehodang nakakapagod at nakakaubos ng energy ang pag-iikot sa iba’t ibang parte ng ‘Pinas maka-reach out lang sila sa mga botante at mahingi ang tiwala ng mga ito para iboto si Sen. Manny sa pagka-pangulo sa 2022 elections ay walang reklamo si Mrs. Pacquiao at game na game talaga!

At maging sa kanyang Instagram account ay ang sipag-sipag ni Jinkee, post ito nang post ng mga happenings kung saan sila nagpunta ng mister at kung gaano kainit ang pagtanggap sa kanila ng mga tao sa kanilang mga pinupuntahan.

Pero ang siste at napansin lang ng mga netizens, bakit restricted pa rin daw ang IG account ni Mrs. Pacquiao?

Mapapansin ang “Comments on this post have been limited” sa ibabang bahagi ng bawat post ni Jinkee.

Tuloy, kahit gustung-gustong magpaabot ng mga netizens at supporters nila ng suporta at words of encouragement para sa pagtakbo ng mister ni Jinkee, du’n na lang nila idinadaan sa IG account ni Sen. Manny.

At least nga naman du’n, may freedom silang sabihin lahat ng nasasaloob nila, good or bad.

Well, ang basa namin sa move na ‘yan ni Jinkee ay para magkaroon siya ng peace of mind at hindi ma-bash nang bonggang-bongga.

Mahirap nga namang instead ang focus na lang nila ay sa eleksiyon, eh, mai-stress pa si Madam Jinkee sa dami ng toxic comments na puwedeng ibato sa kanila sa social media.

Devah naman?!!!