Kasal, inaabangan na rin… JULIA AT COCO, LANTARAN NA ANG LIPS-TO-LIPS

ni Janiz Navida @Showbiz Special | March 12, 2026

Photo: Julia at Coco / FB @Julia Montes

Mas showy na talaga ngayon sa isa't isa in public sina Julia Montes at Coco Martin.

Kahapon ay mabilis na nag-viral ang video ng pag-surprise ni Coco kay Julia na magse-celebrate ng kanyang ika-31st birthday sa March 19.

Ipinost ni Julia sa kanyang Facebook account ang video kung saan makikitang habang mine-make-up-an siya ay biglang dumating si Coco na may dalang pahabang strawberry cake. 

Ang caption ng FB post ni Julia, “Early birthday surprise from my Palagi.”

Naging emosyonal si Julia sa pagsorpresa sa kanya ni Coco at nag-lips-to-lips sila matapos siyang sabihan ng “I love you” ng aktor-director ng Batang Quiapo, na magtatapos na nga sa March 13 sa Kapamilya Network.

Niyakap din ni Julia si Coco habang ibinababa ang hawak na cake.

Nakakabilib lang ang relasyon ng dalawa na kahit napaka-low key nila mula pa nu'ng umpisa at hanggang ngayon nga ay palaisipan pa rin sa marami ang mga tsismis na may mga anak na sila at may masayang pamilya, napanatili nila ang matatag nilang relasyon at naging tahimik ang kanilang pagsasama.

Kaya naman, dalawang bagay na lang talaga ang inaabangan ngayon ng mga fans at nagmamahal-sumusuporta sa kanilang relasyon — ang makitang ikinakasal na sila at ipakilala na nila sa publiko ang mga sinasabing anak nila.

Well, sa tamang panahon siguro. 

Kami na raw talaga ang sumagot, oh! Hahaha!

Ah, basta happy kami para sa CocoJuls at fan kami ng kanilang partnership on and offscreen man at mahal namin ang dalawang ito dahil parehong mabubuti ang kanilang puso.

Happy birthday in advance, Juls! 

---

INILABAS na ng TV5 ang unang pasilip sa A Secret in Prague, ang bagong drama series ng TV5 sa TodoMax Primetime Singko lineup. 

Pinagbibidahan nina Enrique Gil bilang Mikoy at Andrea Brillantes bilang Kiara, bagong tambalan ito na iikot sa kuwento ng isang Filipino migrant na naghahanap ng mas magandang buhay sa Prague, at sa paglalakbay na iyon, may pag-ibig na hindi inaasahan.

Magaan ang trailer, may kilig, may travel vibes, at may mga eksenang parang

postcard ang dating. 

Pero mas nakakaintriga ang pamagat mismo, A Secret in Prague. Ano nga ba ang sikreto? Is it a hidden past? Isang pag-ibig na bawal? O isang katotohanang kailangang harapin bago tuluyang maging masaya ang ending?

Sa ngayon, hindi pa malinaw kung ano ang tinutukoy na “secret,” pero mukhang ito ang magiging sentro ng conflict ng kuwento. Dahil kung simpleng love story lang ito sa ibang bansa, bakit may kailangang itago? At kanino?

Bukod sa kilig at scenic European backdrop, may temang siguradong makaka-relate ang maraming Pilipino — ang pangarap na makahanap ng mas magandang buhay sa ibang bansa. 

Sa gitna ng bagong lugar at bagong simula, doon din tila mahahanap nina Mikoy at Kiara ang pag-ibig na hindi nila inaasahan. 

Sa panahong hati ang audience sa streaming platforms at tradisyonal na telebisyon, tila malinaw ang layunin ng TV5 na maghatid ng mga kuwentong may cinematic feel sa global setting, pero accessible pa rin sa free TV viewers.

Sa trailer pa lang, klarong may bagong love team na siguradong aabangan, at posibleng ito ang magpapatingkad lalo sa primetime offerings ng TV5.

So, goodbye LizQuen, hello AnQuen na soon sa Kapatid Network!

Leni-Kiko, tinalo nina BBM-Sara… SIGAW NI KAKIE: HALALAN 2022, MATAGAL NANG NABILI!

ni Janiz Navida - @Showbiz Special | May 12, 2022

Habang tahimik pa ang Megastar na si Sharon Cuneta at inaabangan ang kanyang reaksiyon kaugnay ng katatapos na Halalan 2022, ang kanilang panganay na anak naman ni Sen. Kiko Pangilinan na si Frankie "Kakie" Pangilinan ang nag-iingay ngayon at paboritong 'pulutan' sa socmed ng mga netizens.

Ito'y kaugnay ng pagra-rally ni Kakie sa Comelec at pagbibigay ng maaanghang na pahayag bilang protesta sa resulta ng bilangan sa nakaraang halalan.

Ilan sa mga linyang binitawan ni Kakie sa kanyang panayam ay ang sumusunod…

"Sabi ng iba, we have to accept defeat daw, na hindi raw tayo marunong matalo.

"I think that the truth is it's not about the election anymore, eh. I think that the data shows clearly that this election was bought a long, long time ago. And that's something that we will not take sitting down, 'no?" prangka at matapang na pahayag ni Kakie.

Tahasang pahayag pa nito, "I am not going to have my president be named Ferdinand Marcos again, ever."

Kaya naman, nagpiyesta uli ang mga bashers ni Kakie sa pagbanat sa kanya.

Ang masaklap, imbes na sumentro lang sa kanyang naging pahayag, naging personal pa ang banat ng ilang BBM supporters at tinawag siyang "ampalaya" at "pangit na anak ni Mega". Awww!

Meron namang netizen na nag-reply sa kanya sa Twitter ng ganito, "Who are you? We're part of the 30 million for BBM. He is accepted by the majority. If you don't like him & cannot accept defeat, go to the moon. As for your father who kept crying, it doesn't work anymore. We have to change mga trapong inaamag, nagpabundat lang. - DJ to Kakie Pangilinan"

Kalowkah!!! Bigla tuloy nalipat ang galit ng mga BBM supporters kay Kakie Pangilinan.

Mister ni Sharon, ayaw pang sumuko… KIKO: 'DI PA TAPOS ANG LABAN

ni Janiz Navida - @Showbiz Special | May 11, 2022

Inaabangan na ng marami ang reaksiyon at saloobin ng Megastar na si Sharon Cuneta kaugnay ng nangyaring bilangan pagkatapos ng eleksiyon, kung saan malaki nga ang lamang ng bilang ng boto ng nangungunang si Davao Mayor Sara Duterte kay Sen. Kiko Pangilinan sa pagka-bise-presidente.

Alam naman ng lahat ang effort, pagod, pawis, puyat at lahat-lahat na ng ginawa ni Megastar sa kampanya para sa kanyang mister at sa ka-tandem nito sa pagka-pangulo na si VP Leni Robredo.

And yet, sabi nga sa kanta, "I did my best but I guess my best wasn't good enough."

Pero kung si Ate Shawie ay tahimik pa sa kanyang FB, Instagram at Twitter account kaugnay ng nangyaring bilangan, ang kanyang mister na si Sen. Kiko ay nag-post na sa kanyang Facebook account ng mahabang official statement.

Dated May 10, 2022, ito ang nilalaman ng FB post ni Sen. Kiko:

"Nakikiisa tayo sa pahayag ni Vice-President Leni.

Hindi pa tapos ang bilangan. Sa ilang mga presinto, hindi pa tapos ang botohan. May mga tanong tungkol sa proseso na hindi pa nasasagot.

Hindi pa tapos ang ating gawain.

Bukas, paggising natin at sa susunod na mga umaga, mahirap pa rin ang ating mga magsasaka at mangingisda.

Hindi pa rin makakapangisda sa sarili nating karagatan ang ating mga mandaragat. Ipagtatabuyan pa rin ng China.

Hindi pa rin maibabalik ang ninakaw ng Pharmally. Patuloy pa rin ang smuggling ng gulay. Mataas pa rin ang presyo ng pagkain. Marami pa rin ang gutom.

Hindi pa tapos ang laban.

At dala nating sandata sa laban bukas: ang walang katulad na ginising nating kilusan.

Ang kilusan ng bolunterismo, ng bayanihan, ng pakikipagkapwa, ipagpatuloy natin.

Ipagpatuloy natin ang mga naumpisahan para iangat ang buhay at kabuhayan ng mga magsasaka, mangingisda, at ng lahat ng nasa laylayan – kahanay man o hindi.

Ngayon at sa mga susunod na bukas, mas kakailanganin natin ang ginising nating radikal na pagmamahal para sa kapwa Pilipino.

Malaki at masayang apoy ng pagmamahal ang pag-uumpisahan natin.

Sa lahat ng bahagi ng Pilipinas, nakapagtanim tayo ng malulusog na binhi ng pag-asa.

Kailangan nating alagaan. Tuloy nating ipaglaban ang mahal natin. Samahan ninyo ako. Samahan ninyo kami ni VP Leni.

Magwawagi rin ang katotohanan. Magwawagi rin tayo.

Aani rin tayo. Hindi natutulog ang Diyos.

Manalig tayo na sa huli, pagmamahal ang magtatagumpay.

#Eleksyon2022

#Halalan2022"

Oh, ha?! Ang lalim ng hugot ni Sen. Kiko, 'di ba?