Ivermectin, ipinagbawal, Erap, gumaling na sa COVID

ni Mary Gutierrez Almirañez | April 19, 2021

Tumanggi ang doktor ni dating Pangulong Joseph ‘Erap’ Estrada na ipainom sa kanya ang Ivermectin, ayon sa panayam kay dating Sen. Jinggoy Estrada ngayong umaga, Abril 19.

Kuwento ni Jinggoy, "I have consulted the doctors of my father regarding Ivermectin because there was lots of report na nakakagaling nga raw. I consulted the doctor and the doctor said, 'I will not give Ivermectin to your dad because that's only for animals…' I really have to follow the doctor's advice."

Sa ngayon ay nakatakdang ilipat sa regular room ng ospital ang nagbi-birthday na si Erap, at mamaya rin ay bibisitahin ni Jinggoy ang ama upang dalhan ng birthday cake at batiin sa ika-84 na kaarawan.

Sabi pa ni Jinggoy, "All his vital signs are already normal, 'yung kanyang oxygen flow is already normal. His blood pressure has already been stabilized. Kaya sabi ng doktora, he can be transferred to a regular room today.”

Matatandaang 2 ospital na ang nagsumite ng compassionate special permit (CSP) sa Food and Drug Administration (FDA) upang gamitin kontra COVID-19 ang nasabing veterinary product. Bukod dito, ilang pulitiko na rin ang umaming uminom sila ng Ivermectin.

"Maraming gamot na ibinibigay sa aking ama so I cannot credit kung ano nagpagaling sa kanya," dagdag pa ni Jinggoy.

Nagbabala naman ang Department of Health (DOH) na kasong paglabag sa Republic Act 9711 o The FDA Act of 2009 ang isasampa sa mga mahuhuling gagamit ng Ivermectin nang walang CSP.

Sotto, umaming umiinom ng Ivermectin

ni Ronalyn Seminiano Reonico | April 18, 2021

Inamin ni Senate President Vicente Sotto III na umiinom siya ng gamot na Ivermectin bilang "prevention" sa COVID-19, isang beses kada 2 linggo.

Aniya sa isang radio interview noong Sabado, "Ako rin, eh. Ako, umiinom ako [ng Ivermectin], eh. Prevention. Once every two weeks.”

Meron din umanong kakilala si Sotto na nagpositibo sa COVID-19 at gumaling matapos uminom ng Ivermectin.

Aniya, "Meron akong kakilala, tinamaan ng COVID, tumira ng tatlong araw ng Ivermectin, pagdating ng pang-apat, panlimang araw, tanggal na lahat ‘yung mga symptoms niya. Naghintay na lang ng 14 days bago nagpa-check ulit, pag-check, negative na.

"Ang dami kong kilala na ganoon.”

Saad pa ni Sotto, "Ang prevention ang pinakamahalaga. ‘Yun ang number one, pangalawa, ‘yung rehabilitation. Tapos, ikokombinasyon mo ‘yung enforcement, at saka ‘yung prosecution."

Nanawagan din si Sotto sa awtoridad na bigyang-atensiyon ang treatment at prevention habang kulang pa ang suplay ng COVID-19 vaccines.

Aniya, "‘Yung prevention, mahalaga rito sa COVID. Sana naman, nakikinig sila sa atin. Palibhasa wala, eh, Senate President lang tayo."

Matatandaang isa rin si dating Pangulong Juan Ponce Enrile sa mga umaming uminom ng Ivermectin.

Saad pa ni Sotto, “Hihiramin ko ‘yung sinabi ni Manong Johnny, ‘Walang pakialam ang FDA (Food and Drug Administration) kung ano ang gusto kong ilagay sa katawan ko.’”

Samantala, una nang nagbabala ang mga eksperto sa pag-inom ng Ivermectin laban sa COVID-19 dahil sa kakulangan nito ng ebidensiya na nakagagamot laban sa Coronavirus.

Ang World Health Organization, US FDA, European Medicine Agency, at maging ang manufacturer nitong Merck ay nagsasabing mayroong kakulangan sa datos sa efficacy ng Ivermectin laban sa COVID-19.

Ivermectin, 2 ospital na ang gumagamit

ni Mary Gutierrez Almirañez | April 16, 2021

Isa pang pribadong ospital ang nagsumite ng compassionate special permit (CSP) para magamit ang Ivermectin kontra COVID-19 ang inaprubahan ng Food and Drug Administration (FDA), ayon kay Director General Eric Domingo ngayong araw, Abril 16.

Aniya, "Two hospitals na actually na nag-apply sa atin ang nabigyan ng CSP.”

Tumanggi naman siyang ibigay ang pangalan ng ospital dahil sa privacy concern.

Paliwanag pa niya, "I have to ask permission from the hospitals kasi may privacy kasi ‘yung mga pasyente nila.”

Nilinaw pa ni Domingo na kasama sa mga hinihinging requirements sa CSP ay ang pangalan ng licensed importer at ang proof of registration ng Ivermectin mula sa pinanggalingan nitong bansa.

"Hindi naman puwedeng mag-iimbento ka ng dosage, imbento ng protocol,” sabi pa niya.

Iginiit naman ng Philippine Association of Pharmacists in the Pharmaceutical Industry (PAPPI) na kailangan pa ring dumaan ng Ivermectin sa clinical trials at assessment bago tuluyang ipainom sa pasyenteng may COVID-19.

Sa ngayon ay dalawang ospital pa lamang ang pinapayagang gumamit ng Ivermectin mula nang isumite nila ang CSP.

Nagbabala naman ang Department of Health (DOH) na kasong paglabag sa Republic Act 9711 o The FDA Act of 2009 ang isasampa sa mga mahuhuling gagamit ng Ivermectin na walang CSP.