Israel, umatake sa mga base militar ng Iran

ni Eli San Miguel @Overseas News | Oct. 26, 2024

Photo: Unconfirmed image, Tehran explosion site sa Iran - The Times of Israel / Circulated

Inatake ng Israel ang mga pasilidad ng militar sa Iran ngayong Sabado ng madaling-araw bilang tugon umano sa mga kamakailang pag-atake ng Tehran sa Israel. Ilang oras ang lumipas, inihayag ng militar ng Israel na natupad na ang kanilang mga layunin.

Iniulat ng media ng Iran ang sunud-sunod na pagsabog sa loob ng ilang oras sa kabisera at sa mga kalapit na base militar, na nagsimula bandang 2 a.m. (2230 GMT noong Biyernes).

Bago magbukang-liwayway, sinabi ng pampublikong brodkaster ng Israel na natapos na ang tatlong bugso ng pag-atake at tapos na ang operasyon.

Sinabi ng Iran na matagumpay na na-counter ng kanilang air defense system ang mga pag-atake ng Israel sa mga military target sa mga lalawigan ng Tehran, Khuzestan, at Ilam, na nagdulot lamang ng "limitadong pinsala" sa ilang lugar.

Israel, sinisiguro ang tagumpay vs Hamas at Hezbollah bago ang US election

ni Angela Fernando @World News | Oct. 19, 2024

Photo: Israeli army via AFP / Handout

Sinisiguro ng Israel na magbibigay sila ng pinakamatinding pinsala sa Hamas sa Gaza at Hezbollah sa Lebanon, at sinasamantala rin ang pagkakataong magtatag ng mga de facto buffer zones bilang hakbang upang bumuo ng hindi mapapalitang reyalidad bago ang halalan sa United States (US) at ang pagdating ng mauupong pangulo sa Enero, ayon sa walong sources na nakapanayam ng international news agency na Reuters.

Matatandaang naging malaking tagumpay para sa Israel ang pagkasawi ng lider ng Hamas na si Yahya Sinwar, ngunit tinitingnan din ng mga namumunong Israeli ang mga planong magdadala sa kanila sa tiyak na tagumpay na lampas pa sa kayang abutin ng militar ng bansa.

Samantala, plano ng nasabing bansa na paigtingin ang operasyong militar laban sa Hezbollah at Hamas, at matiyak na hindi muling makakapag-organisa ang kanilang mga kalaban, pati na ang pangunahing tagasuporta nito, ang Iran, at hindi na makapagbabanta sa mga mamamayang Israeli.

Resolusyon kontra okupasyon ng Israel sa Palestine, oks sa UNGA

ni Eli San Miguel @World News | Sep. 20, 2024

Inaprubahan ng United Nations General Assembly (UNGA) ang isang non-binding resolution noong Miyerkules, na hinihimok ang Israel na wakasan ang okupasyon nito sa teritoryo ng Palestine sa loob ng 12 buwan.

Naipasa ito ng 124 boto para sa pagpabor, 14 sa 'di pagpabor, at 43 abstensyon sa isang espesyal na sesyon na nakatutok sa mga aksyon ng Israel sa East Jerusalem at iba pang mga okupadong lugar. Iminungkahi ito ng State of Palestine at sinusuportahan ng mahigit 20 bansa.

Hinihiling ng resolusyon na sumunod ang Israel sa international law at sa mga desisyon ng International Court of Justice upang tapusin ang kanilang okupasyon sa loob ng isang taon..

Sa bagong resolusyon, nakasaad na, "[The UNGA] demands that Israel brings to an end without delay its unlawful presence in the Occupied Palestinian Territory, which constitutes a wrongful act of a continuing character entailing its international responsibility and do so no later than 12 months from the adoption of the present resolution."