Prostate surgery ni Netanyahu, matagumpay

ni Eli San Miguel @Overseas News | Dec. 30, 2024

Photo: Benjamin Netanyahu

Nasa maayos na kalagayan ang Punong Ministro ng Israel na si Benjamin Netanyahu matapos ang matagumpay na operasyon sa kanyang prostate, ayon sa kanyang tanggapan nitong Linggo.

"The Prime Minister has now been transferred to a protected underground recovery unit. He is expected to remain in the hospital for observation in the next few days," pahayag ng kanyang opisina.

Dinala si Netanyahu sa ospital upang sumailalim sa operasyon para tanggalin ang kanyang prostate nitong Linggo, matapos siyang ma-diagnose na may impeksyon sa ihi na dulot ng benign prostate enlargement, ayon pa sa kanyang tanggapan.

11 patay sa muling pag-atake ng Israel sa Lebanon

ni Angela Fernando @World News | Dec. 3, 2024

Photo: Dahiyeh suburbs sa Beirut - Bilal Hussein / AP Photo / Associated Press

Nasawi ang 11 sibilyan at 3 ang sugatan nu'ng Lunes sa muling pag-atake ng Israel sa dalawang bayan sa southern Lebanon, ang Talousa at Haris, ayon sa ulat ng mga lokal na opisyal.

Kinumpirma ng Israeli military na tinarget nila ang dose-dosenang posisyon ng Hezbollah sa iba’t ibang bahagi ng Lebanon.

Samantala, iniulat din ng mga otoridad ng Lebanon ang pagkamatay ng dalawa pang indibidwal sa ibang bahagi ng southern Lebanon, kabilang ang isang miyembro ng state security na nasawi habang nasa tungkulin.

Ito ay kasunod ng akusasyon ng Hezbollah na lumabag ang Israel sa kasunduang tigil-putukan.

Saudi Arabia, itinigil ang kasunduan sa US dahil sa isyu sa Israel

ni Angela Fernando @World News | Nov. 30, 2024

Photo: Prince Mohammed bin Salman at si Israel Prime Minister Benjamin Netanyahu - FB, circulated

Itinigil na ng Saudi Arabia ang pagnanais nito para sa isang malawakang kasunduan sa depensa kasama ang United States (U.S.) kapalit ng normalisasyon ng relasyon sa Israel.

Sa kasalukuyan, inihihirit na nito ang mas simpleng kasunduan sa kooperasyong militar, ayon sa dalawang opisyal ng Saudi at apat na opisyal mula sa West na nakausap ng Reuters.

Magugunitang nu'ng unang bahagi ng taon, bilang bahagi ng pagsisikap na makamit ang malawakang kasunduan sa seguridad, nagpakita ang Riyadh ng paghina sa posisyon nito ukol sa pagtatatag ng estado ng Palestine.

Binigyang-diin nito sa Washington na maaaring sapat na ang isang pampublikong pangako mula sa Israel para sa solusyon sa dalawang estado upang ma-normalisa ang relasyon para sa Gulf kingdom.

Ngunit dahil sa matinding galit ng publiko sa Saudi Arabia at sa mas malawak na rehiyon ng Middle East laban sa mga aksyong militar ng Israel sa Gaza, muling iginigiit ni Crown Prince Mohammed bin Salman na ang pagkilala sa Israel ay magiging kondisyonal lamang kung gagawa ito ng konkretong hakbang para sa pagbuo ng isang estado ng Palestine.

Samantala, patuloy na nagnanais ang Israel Prime Minister na si Benjamin Netanyahu na makamit ang normalisasyon ng relasyon sa Saudi Arabia bilang isang makasaysayang tagumpay at patunay ng mas malawak na pagtanggap ng kanilang nasasakupan sa mundo ng mga Arabo.