Du30, durog sa drug war — Kaufman... ICC, dedma sa mga patayan sa PBBM ADMIN

ni Mylene Alfonso @News | February 28, 2026

Photo File: Atty. Kaufman - International Criminal Court

Tinanong ni Atty. Nicholas Kaufman, legal counsel ni dating Pangulong Rodrigo Duterte ang prosekusyon ng International Criminal Court (ICC) kung balak din ba nitong imbestigahan ang administrasyon ni Pangulong Ferdinand Marcos, Jr., kung saan nagpatuloy umano ang mga pagpatay matapos ang termino ng nakalipas na administrasyon.

Ginawa ni Kaufman ang pahayag sa ikatlong araw ng pagdinig para sa confirmation of charges laban kay Duterte na nahaharap sa three counts ng crimes against humanity kaugnay ng kanyang kampanya sa war on drugs.

Bagama’t sakop lamang ng pagdinig ang mga krimeng nasa hurisdiksyon ng korte mula Nobyembre 1, 2011 hanggang Marso 16, 2019, binanggit ni Kaufman ang isang pag-aaral ng University of the Philippines (UP) na nagpapakita na sa 342 pagpatay noong 2022, 162 umano ang isinagawa ng mga state agents sa unang taon ng panunungkulan ni Marcos kung saan lalo pa itong tumaas pagsapit ng 2024.

“The conclusion is that there is no reason to believe that Duterte’s disappearance from the political scene would have frustrated the ongoing incidents of murder at the hands of state agents or vigilantes,” wika ni Kaufman.

“Clearly I’m forced to ask myself whether anyone on the other side of this room has thought of investigating the Marcos regime and the related phenomenon and holding someone accountable,” patuloy niya.

Samantala, hinimok ni Palace Press Officer Undersecretary Claire Castro si Kaufman na magsampa ng mga kaso sa mga lokal na korte kung nakita niya ang mga umano'y pang-aabuso sa pagpapatupad ng kasalukuyang administrasyon ng anti-drug operations.

“Pag-amin ba iyon na talagang may patayan sa panahon ni dating Pangulong Duterte?

Unang-una, nakakapagtaka na ang kliyente po niya rito ay ang dating Pangulong Duterte pero bakit ang mata niya naka-focus kay Pangulong Marcos, Jr.? Depensa po ba niya ito? Kasi kung depensa po niya ito, nakakatawa. Pero kung may basehan ang sinasabing ito, ang Pangulo alam po natin ayaw po ng marahas na paglaban sa iligal na droga,” pahayag ni Castro.

“Kung ito po ay mabibigyan ng ebidensiya at mayroon talagang dapat na mapanagot, ang PNP po, CIDG, NBI kinakailangang mag-imbestiga rito. Kung mayroong sapat na ebidensiya, hindi po palalagpasin ng Pangulo ang mga abusado,” hirit ng Palace official. 

Kinasuhan ng ICC sa pagpatay at drug war... Hearing kay Du30, start na

ni Mylene Alfonso @News | February 24, 2026

Photo: International Criminal Court

Sinimulan na ang confirmation of charges hearing ni dating Pangulong Rodrigo Duterte sa International Criminal Court (ICC) sa The Hague, Netherlands. 

Una rito, sinampahan ng prosecutors ng ICC ang dating pangulo ng kasong crimes against humanity kaugnay ng mga pagpatay sa Davao at sa buong bansa noong panahon ng kanyang pagkapangulo. 

Naghain si Deputy Prosecutor Mame Mandiaye Niang ng 15-pahinang dokumento na nagsasakdal kay Duterte ng three counts ng crimes against humanity of murder kung saan sakop ang insidente mula 2013 hanggang 2018. 

Ayon sa mga prosecutor, hindi bababa sa 76 na pagpatay at iba pang mararahas na krimen ang kabilang sa isinampang kaso, ngunit binigyang-diin nila na mas malaki pa ang tunay na bilang ng mga naging biktima. 

Sinabi ni Niang na criminally liable si Duterte kabilang ang unang count kaugnay sa Davao Death Squad (DDS) killings na tumutukoy sa mga pagpatay sa loob at labas ng Davao City noong si Duterte ay alkalde at umano’y pinuno ng DDS mula 2013 hanggang 2016. 

Ang mga biktima ay umano’y mga tulak ng droga at magnanakaw. Sa naturang panahon, sinabi ng prosecution na ang mga pag-atake ay pangunahing nakatuon sa Davao City at isinagawa umano ng mga pulis ng lungsod at mga non-police hitmen na kabilang sa DDS. 

Habang ang ikalawang count ay may kinalaman sa mga pagpatay sa mga hinihinalang high-value drug suspects noong unang taon ni Duterte bilang pangulo, mula 2016 hanggang 2017. 

Samantala ang ikatlong count ay may kinalaman sa Barangay clearance operations na tumutukoy sa mga pagpatay at tangkang pagpatay sa mga anti-drug operations sa barangay noong si Duterte ay pangulo mula 2016 hanggang 2018.

Habang may hearing... Digong, bawal dalawin — ICC

ni Mylene Alfonso @News | February 23, 2026

Photo: International Criminal Court

Inanunsyo ng pamilya ni dating Pangulong Rodrigo Duterte na hindi pinayagan ng International Criminal Court (ICC) ang anumang personal na pagbisita habang isinasagawa ng korte ang pagdinig para sa Confirmation of Charges ngayong linggo.

Sa isang pahayag, sinabi rin ng pamilya ng dating pangulo na mananatiling bukas ang komunikasyon sa pamamagitan ng mga tawag sa telepono.

Kaugnay nito, anim na abogado ang dadalo sa mga pagdinig upang matiyak na siya ay maayos na kinakatawan ng isang Filipino legal team.

Kabilang dito sina Salvador Medialdea, Martin Delgra III, Silvestre Bello III, Alfredo Lim, Jr., Caesar Dulay, at Salvador Panelo.

Nagpasalamat din ang pamilya ni Duterte sa legal team para sa kanilang patuloy na dedikasyon at propesyonalismo sa gitna ng isinasagawang proseso.

Ipinahayag din nila ang kanilang pasasalamat sa Filipino community sa The Hague sa pagbibigay ng plataporma kung saan naririnig ang tinig ng mga Filipino na nagsasalita laban sa anila’y kawalang-katarungan.

Ang pagdinig para sa confirmation of charges ay nakatakdang idaos mula Pebrero 23 hanggang 27.

Base sa ICC website ng ICC, gaganapin mula alas-10 ng umaga hanggang alas-3 ng hapon ang mga sesyon (alas-5 ng hapon hanggang alas-10 ng gabi sa Pilipinas) sa Pre-Trial Chamber I sa Courtroom I.