ni Ambet Nabus @Let's See | March 19, 2026
Photo: Tia Carrere IG
Mixed pa rin ang mga reactions ng mga netizens sa mga naglabasang photos ni Liza Soberano kasama si Tia Carrere at ilan pang Hollywood stars.
Sa katatapos lang na 98th Academy Awards o Oscars night, naglabas ng mga photos ang Fil-Am star na si Tia Carrere sa kanyang Instagram (IG) kung saan masayang
nakikipag-hobnobbing ang dating kilalang artista sa bansa na si Liza.
Pagpapatunay na tuluyan na ngang na-penetrate ni Liza ang mundo ng Hollywood kahit pa i-bash itong ‘starlet’ ng iba dahil hindi naman ito ganap na major star.
May mga nagsabi pa ngang ‘isang photobomber’ na lang daw ito sa Hollywood, unlike before na sa kanya talaga nakatuon ang limelight.
But then again, nakaka-proud pa ring makita si Liza sa mga ganu’ng eksena dahil iilan lang ba sa mga nagtangkang celebs natin ang nagkaroon ng ganu’ng moment?
In fact, early this year lang ay naging presenter si Liza sa 53rd Annie Awards sa LA kung saan pinag-usapan ang kanyang ganda at talino, kasama na ang pakikipag-bonding niya kay K-pop Demon Hunters (KDH) star Arden Cho at mga filmmakers ng upcoming movie na Forgotten Islands (FI).
May iba naman na binansagan si Liza na Gen-Z Madam Imelda Marcos na umano’y nakilala sa pakikipag-hobnobbing noon sa mundo ng showbiz at fashion at binibigyan ng magandang respeto at pagtingin.
NORMAL na sa showbiz na kapag may tandem na pinasisikat ay nilalagyan ng ‘romantic angle’ ang mga istorya ng kanilang project.
Pero ayon kay Joseph Marco na nagbibida sa My Husband Is A Mafia Boss (MHIAMB) ng Viva One, “We cannot please everyone, ‘di ba? Pero ours (with Rhen Escaño) is a true one. We really bonded well and we can say na lahat ng ginawa namin para sa show, be it during our workshops or takes, are all genuine. This is one of the best projects na nagawa ko.”
Sinang-ayunan naman ito ni Rhen na umano’y hindi rin inakalang may comedic side pala si Joseph dahil natural itong lumabas sa kanyang karakter. Pambalanse ito sa action-romance na tema ng series under Director Fifth Solomon.
Kilalang Wattpad series ang MHIAMB na isinulat ng yumaong si Diana Serrato alias YanaLovesYouu, at ngayon ay may daang milyong reads.
Ang trailer naman ng show ay humamig na ng 14 million views.
Pagbalik ng aktor, malilipat uli ng time slot…
SERYE NINA KIM AT PAULO, PANAKIP-BUTAS LANG SA PAGKAWALA NI COCO
“BAKA sa April na,” sagot sa amin ng isang taga-CCM Film Productions na gumagawa ng Sigabo, ang bagong series nina Coco Martin at Julia Montes.
Dahil na-delay itong ipalabas last March 16, as promised ng actor-director na si Coco, ang show nina Kim Chiu at Paulo Avelino na The Alibi (TA) ang nag-occupy ng timeslot na iniwan ng Batang Quiapo (BQ).
Wala naman daw isyu sa naturang replacement, pero may mga usap-usapan ngayon na kapag ready nang umere ang Sigabo this April ay baka magkaroon ng ‘urungan’ ng oras na normal nang ginagawa ng ABS-CBN noon pa man sa kanilang mga teleserye.
Let’s see…
