Ayon sa Marcos gov't.. Taas-presyo, bumagal

ni Mylene Alfonso @News | August 5, 2023

Muling bumagal ang inflation rate o ang antas ng pagtaas ng presyo ng mga pangunahing bilihin at serbisyo nitong Hulyo 2023.

Ayon kay National Statistician at Civil Registrar General Philippine Statistics Authority Undersecretary Claire Dennis Mapa, naitala sa 4.7% ang inflation rate nitong Hulyo na mas mababa sa naitalang 5.4% noong Hunyo 2023 at 6.4% noong Hulyo 2022.

Ang average inflation naman mula Enero hanggang Hulyo ay nasa antas na 6.8%.

Kabilang sa mga nag-ambag sa pagbagal ng inlfation ay ang mababang singil sa kuryente, renta sa bahay, mababang presyo ng LPG, gayundin ang pagkain gaya ng manok, tilapia at puting asukal.

Sa transportasyon naman, isa sa nagpabagal sa inflation ay ang mababang pasahe sa jeepney, pamasahe sa eroplano at pamahase sa bus.

Samantala, pagdating sa overall inflation nitong Hunyo, ang pangunahing nag-ambag ay ang food and non-alcoholic beverages kabilang ang pagbaba ng presyo ng bigas, sibuyas at itlog.

Inflation rate ngayong Hulyo, bumagal

ni Ronalyn Seminiano Reonico | August 5, 2021

Bumagal ang antas ng inflation rate ngayong buwan ng Hulyo dahil umano sa bumagal na paggalaw ng transportation cost, ayon sa tala ng Philippine Statistics Authority (PSA).

Saad ni PSA Chief and National Statistician Claire Dennis Mapa sa isang virtual press briefing, “Ang headline inflation o ang pagtaas ng presyo ng mga produkto at serbisyo sa bansa ay bumagal sa antas na 4.0% nitong Hulyo 2021.

“Ang dahilan ng pagbagal ng antas ng inflation nitong Hulyo 2021 ay ang mas mabagal na paggalaw ng presyo ng Transport na may 7.0% inflation at 77.5% share sa pagbaba ng pangkalahatang inflation sa bansa."

Samantala, ang target range ng pamahalaan ay 2% hanggang 4% inflation rate.

Pagtaas ng presyo ng bilihin, bumagal nu'ng Hunyo

ni Ronalyn Seminiano Reonico | July 6, 2021

Bumagal ang pagtaas ng presyo ng mga bilihin o inflation rate, ayon sa Philippine Statistics Authority (PSA) ngayong Martes.

Ayon kay PSA Chief and National Statistician Claire Dennis Mapa sa virtual press conference, naitala ang 4.1% inflation rate sa buwan ng Hunyo na mas mabagal kumpara sa naitalang 4.5% noong Marso, Abril at Mayo.

Saad ni Mapa, “Ang dahilan ng pagbaba ng antas ng inflation nitong Hunyo 2021 ay ang mas mabagal na paggalaw ng presyo ng transport na may 9.6% at 95.4% share sa pagbaba ng presyo.”

Samantala, target ng pamahalaan na mapababa sa 2% hanggang 4% ang inflation rate sa bansa.