Biyahero sa 7 bansa, bawal pa rin sa ‘Pinas – Roque

ni Lolet Abania | June 1, 2021

Inaprubahan ni Pangulong Rodrigo Duterte ang pagpapalawig ng restriksiyon na kasalukuyang ipinatutupad sa inbound travelers na mula sa India, Pakistan, Sri Lanka, Bangladesh, Nepal, Oman at United Arab Emirates.

Ayon kay Presidential Spokesman Harry Roque, extended ang travel ban mula June 1 hanggang June 15, 2021.

Matatandaang noong huling mga linggo ng Abril ipinatupad ang travel ban sa lahat ng mga travelers na mula sa India kasabay ng pagtaas ng mga kaso ng COVID-19 sa mga bansa sa South Asia.

Ang COVID-19 variant na unang na-detect sa India ay isa sa mga variants of concern na mino-monitor ng ating bansa. Nitong unang linggo ng Mayo, pinalawig ng Pilipinas ang pagba-banned sa mga travelers kasabay ng pagtaas ng bilang ng COVID-19 cases, kung saan ipinagbawal na rin ang mga manggagaling sa Pakistan, Bangladesh, Nepal at Sri Lanka.

Noong May 16, kabilang na rin ang mga travelers mula Oman at United Arab Emirates na ipinagbabawal dahil sa panganib ng Indian variant ng COVID-19.

Buong mundo, nasa matinding giyera vs COVID-19 — UN

ni Mary Gutierrez Almirañez | May 25, 2021

Idineklara ng United Nations (UN) nitong Lunes na ‘at war’ o nahaharap sa malaking giyera ang iba't ibang bansa sa buong mundo dahil sa Covid-19, matapos maitala ang mahigit 300,000 na pumanaw sa India dulot ng naturang virus, ayon kay UN Secretary-General Antonio Guterres.

Aniya, "Unless we act now, we face a situation in which rich countries vaccinate the majority of their people and open their economies, while the virus continues to cause deep suffering by circling and mutating in the poorest countries."

Maliban sa India ay laganap din ang pandemya sa iba’t ibang bansa, mapa-mayaman o mahirap na nasyon. Sa ngayon ay umabot na sa 3.4 million ang global death toll ng COVID-19 at ilang bansa na rin ang nagpatupad ng travel restriction.

Bagama’t umuusad ang vaccination rollout ay patuloy pa rin namang nadidiskubre ang naglalabasang mga bagong variant ng COVID-19, kung saan kabilang ang Indian variant sa itinuturing na variant of concern.

"We are seeing the bodies along the river Ganges, which don't seem to be recorded as Covid deaths but are very likely to be Covid deaths," paglalarawan naman ni Biology Professor Gautam Menon ng Ashoka University.

Barko tumaob, 127 nawawala sa India

ni Ronalyn Seminiano Reonico | May 18, 2021

Nawawala ang 127 katao matapos tumaob ang barkong sinasakyan ng mga ito sa Mumbai, India ngayong Martes dahil sa Bagyong Tauktae.

Ayon sa Indian navy, kaagad nagpadala ng 2 barko at helicopters sa insidente upang magsagawa ng search and rescue operations.

Tinatayang aabot sa 273 katao ang sakay ng naturang barko at ayon sa defense ministry, 146 sa mga ito ang na-rescue.

Ayon sa awtoridad sa Mumbai, mahigit 10,000 katao ang inilikas at tinatayang aabot sa 600 COVID-19 patients ang dinala sa “safer locations” dahil sa pananalasa ng Bagyong Tauktae.

Noong Lunes nag-landfall ang Bagyong Tauktae sa Gujarat na "extremely severe cyclonic storm", ayon sa Indian Meteorological Department na may lakas ng bugso ng hangin na aabot sa 185 kilometers (115 miles) per hour.