112 patay sa landslide sa India

ni Ronalyn Seminiano Reonico | July 24, 2021

Nasa 112 katao ang nasawi sa Maharashtra, India dahil sa landslide na dulot ng tuluy-tuloy na pag-ulan, ayon sa awtoridad.

Matapos tumaas ang lebel ng water rainfall, napilitang magpakawala ng tubig sa mga dam at inilikas ang mga residente sa mabababang lugar.

Pahayag ni Chief Minister Uddhav Thackeray, head ng Maharashtra state government,"Unexpected very heavy rainfall triggered landslides in many places and flooded rivers.

"Dams and rivers are overflowing. We are forced to release water from dams, and, accordingly, we are moving people residing near the river banks to safer places."

Ayon kay Thackeray, nagpadala na rin ng mga Navy at Air Force sa apektadong lugar upang magsagawa ng rescue operations.

Ayon sa awtoridad, nasa 38 katao ang nasawi sa Taliye, 180 km southeast ng Mumbai, dahil sa landslide habang 59 katao naman ang namatay sa Maharashtra at 15 ang nasawi dahil sa aksidente kaugnay ng malakas na ulan.

Samantala, bukod sa nasawi, marami rin ang naiulat na nawawala at na-trap sa ilang gusali dahil sa landslide.

Bagong nakamamatay na sakit… Higit 45,000 kaso ng ‘black fungus’, naitala sa India

ni Ronalyn Seminiano Reonico | July 22, 2021

Naitala sa India ang mahigit 45,000 kaso ng nakamamatay na "black fungus" sa loob ng nakaraang dalawang buwan, ayon sa health ministry ng naturang bansa.

Ayon kay Junior Health Minister Bharati Pravin Pawar, mahigit 4,200 katao na ang naitalang nasawi sa naturang fungus na may scientific name na mucormycosis.

Unang naiulat na “very rare” lamang ang infection ng “black fungus” ngunit lumobo ang kaso nito sa kasagsagan ng COVID-19 pandemic na madalas umanong tumatama sa mga gumaling na sa Coronavirus.

Ayon sa datos ng pamahalaan, ang may pinakamataas na kaso ng “black fungus” ay ang western state ng Maharashtra na may kabuuang bilang na 9,348.

Ayon sa awtoridad, bago ang pandemya, nakapagtatala ang India ng 20 kaso ng “black fungus” kada taon at kadalasan ng mga tinatamaan ay ang mga may high blood sugar levels, HIV o organ transplant recipients.

Samantala, pinag-aaralan na ng mga eksperto ang biglaang pagtaas ng kaso nito at ang “excessive use” ng steroids bilang panggamot sa COVID-19 ang tinitingnang dahilan nito.

23 patay sa gumuhong pader at landslide sa India

ni Lolet Abania | July 18, 2021

Tinatayang nasa 23 katao ang namatay matapos na maraming tirahan ang nawasak sanhi ng gumuhong pader kasabay din ng landslide dahil sa malakas na Monsoon rains sa capital ng Mumbai, India ngayong Linggo.

Ayon sa National Disaster Response Force (NDRF), ang bumagsak na puno ang nakasira ng pader sa eastern suburb ng Chembur nitong Linggo nang umaga, kung saan may mga residente na nalibing nang buhay.

Umabot sa 17 bangkay ang narekober ng mga awtoridad mula sa pagguho, habang patuloy ang mga rescuers sa paghahanap sa iba pang labi at sa posibleng survivors sa insidente.

Batay din sa NDRF, sa suburb ng Vikhroli sa hilagang-silangan ng lungsod, 6 katao ang nasawi matapos ang landslide habang limang kabahayan ang matinding tinamaan nito ngayong umaga rin ng Linggo.

Karaniwan na ang mga pagguho ng mga gusali sa India sa tuwing Monsoon season mula Hunyo-Setyembre kung saan maraming mga lumang istruktura ang nanganganib na gumuho dahil sa walang tigil na mga pag-ulan.

Una nang iniulat nitong Sabado na ang Mumbai na tirahan ng 20 milyon indibidwal ay labis na naapektuhan dahil sa walang tigil na pagbuhos ng ulan, habang apektado rin ang kanilang local transport services.

“There will be moderate to heavy rains or thundershowers for the next two days,” ayon sa forecast ng Indian Meteorological Department ngayong Linggo. Naghayag naman ng pakikiramay si Prime Minister Narendra Modi sa kanyang tweet at sinabing magbibigay sila ng financial compensation para sa pamilya ng mga biktima.