DepEd, LGUs at mga school...

Mag-organize ng sistema sa pagtatapon ng basura at pangunahan ang recycling!

ni Imee Marcos - @Imeesolusyon | October 5, 2020

“Tapon tapon tapon mo basura mo itapon mo, tapon tapon tapon mo basura mo itapon mo,” ‘yan ang palasak na kanta kapag paparating na ang mga kolektor ng basura sa bawat bahay.

Pero, kung gabundok na papel ang ibabasura at itatapon lang, naku naman, kaya pa ba ng mga landfill ‘yan? Lalo na ngayong siguradong magtatambakan ang basura ng papel sa pagbubukas ng klase sa susunod na linggo, dahil sa mga printed-self learning modules para sa mga estudyante.

Hay nako, kailangan super-ingat ang mga nanay at tatay sa mga modules na ‘yan. Aba, eh, kapag hindi maayos ang pagtambak niyan sa bahay habang wala pang kolektor ng basura, scary to-death na pagmulan ‘yan ng sunog, ha? Que horror!

Kapag nakolekta naman ang mga basurang papel, pihadong gabundok o baka mala-building pa ang basurang matatambak sa mga landfill, hello, ano yan next smokey mountain? ‘Kalokah!

Eh, isipin n’yo ‘yung multiplier effect ng dami ng modules sa kada subject, bukod pa ‘yung dami ng mga estudyante at miyembrong estudyante ng kada pamilya? ‘Di bah?!

Pero to the rescue ang IMEEsolusyon sa super-tambak na basura na perwisyo sa kalikasan, eh, i-recycle! Agree? Hello DepEd, LGUs at mga school, plis lang, mag-organize ng sistema sa pagtatapon ng basura at manguna kayo sa recycling!

Isa pang IMEEsolusyon para maiwasan ang gabundok na basurang papel, baka naman puwedeng magpahiram ang DepEd o LGUs ng mga laptop o baka papayagan ang installment dito para lang bawas gastos na sa magulang, bawas basura pa na masama sa kalikasan?

Well, LGUs at DepEd, kuwentahin ninyo, magkatumbas lang ang gastos sa modular learning at paggamit ng laptop ha, eh, bukod sa papel, papaimprenta pa at gagamit pa ng ink kada semestre, ‘di bah? Esep-esep!

Tone-toneladang gadgets na nasabat ng Customs, igi-give na lang sa mga mahihirap na estudyante!

ni Imee Marcos - @Imeesolusyon | September 25, 2020

Ilang linggo na lang, Oktubre na at umpisa na ang online classes, kaya nagkukumahog at tuliro na ang mga nanay kung paano sila makakaremedyo ng pang-online gadget ng kanilang mga anak! Juskoday!

Eh, biruin n’yo ha, ang nanay na may tatlong anak, paano pagkakasyahin ang araw-araw nilang badyet sa pagkain, kuryente, tubig, dagdag pa ang online learning na mangangailangan ng gadgets? Saan na naman magreremedyo ang mga nanay, na ang iba nga, eh, jobless pa ang mga mister dahil sa pandemya. Nakakalokah!

Sakit sa bangs! Kung may three kids ka, dapat may P25-K ka para makabili ng dalawang laptop at para sa internet connection. Eh, saan naman sila manghaharbat, waley sila anda! Santisima! Hay nako, tiyak loan to the max, takbo sa bawal na “5-6”, hanap ng mga pipitsuging gadgets o mga second-hand. Que Horror!

Hayyy, feel ko mga nanay, pero may ImeeSolusyon ‘yan! ‘Yung mga gadgets na nasabat ng Bureau of Customs, kesa sirain, ibenta o isubasta, aba, eh, itulong na lang sa mga nanay at ipamigay sa mga estudyante.

Good news, mga mudra! Nakinig sa ‘tin ang BOC, iimbentaryuhin daw muna nila ang mga gadgets. After 15 days na hindi nag-claim ang mga importer sa mga kawat na gadgets, eh, puwede na ‘yun ipamigay ng Customs. Bongga!

Ayon sa BOC, nasabat ang halos 29.5 tons ng mga selpon, storage devices at electrical items na walang mga clearance mula sa Bureau of Product Standards, National Telecommunications Commission at Optical Media Board.

Last year, may P100 million na mga selpon, baterya ng selpon at tablets mula Hong Kong ang nasabat sa Clark Freeport Zone sa Pampanga. Meron ding P15 million na mga second-hand na selpon, lithium batteries at phone accessories mula South Korea ang nasamsam sa airport sa Manila.

Oh. ‘di ba, ang dami niyan, ha? Kahit may pandemya, keri natin ang problema sa online learning, basta tulung-tulong, may ImeeSolusyon!

Shocking: 178,000 trabaho sa gobyerno, buking na nakatengga lang nang matagal na panahon!!!

ni Imee Marcos - @Imeesolusyon | September 23, 2020

Para sa mga jobless: Nakalahok ba kayo sa job fair ng Civil Service Commission nitong mga nakaraang araw? A big wow!

Well, nakatutuwa lang na after silang madikdik sa natengga at napabayaang mga bakanteng puwesto sa gobyerno ng ilang dekada nga ba? Presto, hayan na ang resulta!

Medyo rewind lang tayo ng kaunti. Kamakailan, naka-meeting natin ang CSC dahil gusto nating itulak ang budget para sa ahensiya. Siyempre, mega-busisi tayo sa idedepensang ahensiya para magka-budget, ‘di ba?!

Nakagugulat na may 178,000 palang bakanteng puwesto sa gobyerno, at nasa mahigit 269,000 ang permanenteng posisyon sa gobyerno ang natengga rin for a long time o bakante pa! ‘Susmarya, hindi agad ito napakinabangan at napabayaan lang!

Nakapanghihinayang ang mga puwestong ito lalo na ngayong nasa gitna tayo ng COVID-19 pandemic. Nasa mahigit 4-milyon as of August ang mga jobless o nawalan ng trabaho bunsod ng pagsasara ng mga kumpanya dahil sa kaliwa’t kanang lockdown at community quarantine!

Nalaman din nating inaamag na sa puwesto ang maraming empleyado ng gobyerno at deka-dekada nang ginagawa ang trabahong pang-regular, pero never silang naging permanente dahil daw hindi sila eligible? Hmmm...

Kaya naman, eksena to the max at ImeeSolusyon agad ang peg at nagrekomendang gawan na agad ng paraan ang libu-libong bakanteng puwesto na ‘yan at nakiusap sa CSC na ayusin na ang isyu ng eligibility sa mga ke-tatagal nang government employees na nanatiling contractual o bahagi ng End of contract o Endo.

Alam na, hindi natin ma-take na mismong gobyerno ang promotor sa Endo, kaya’t super-push tayo na tigilan na ang ‘Endo’ sa gobyerno. Sa kabila nito, nakakatuwa na responsive ang CSC.

Mabuti na lang aksiyon agad sila, or else, madadale ang kanilang badyet, meaning, mahihirapan tayong depensahan sila para magkabadyet kung maraming alingasngas. Hay, parang pako lang pala na kaunting pukpok, eh, babaon na ang ImeeSolusyon!