Awat na sa pagiging utak-imported, support local!

ni Imee Marcos - @Imeesolusyon | October 26, 2020

Para na tayong sirang plaka na paulit-ulit sa panawagang “No To Importation” ng mga produktong hindi naman tayo kapos, tulad ng bigas, isda, manok at baboy!

Calling the attention ng ating mga kasamahan sa gobyerno! Kapag panahon ng anihan ng palay, no more imports please? ‘Kaloka! Paano makarerekober sa pagkalugi ang mga lokal na magsasaka niyan kung papatayin na ng mga imported na produkto ang kanilang mga ani?

Super nakakapikon ang importasyon na ‘yan. Puro na lang angkat nang angkat, hindi napoprotektahan ang ating mga lokal na magsasaka, mangingisda, poultry at hog raisers. Ano bang meron ang imported products na wala sa mga produktong sariling atin? Hay naku!

Unti-unti nating pinapatay ang kabuhayan ng ating mga kababayang farmers, fishermen, poultry at hog raisers, kapag hindi natin nakontrol ang pag-aangkat ng mga agri products. Magko-collapse ang ating economy, juicekolord!

Dagdag pa ang mga letsugas na smuggler ng isda sa mga fishports lalo na sa Navotas kung saan talamak ang puslitan galing sa ibang bansa. Bukod pa sa dati na nating nabanggit na mga importers ng bigas na pugante sa pagbabayad ng tax. Ano ba?

Pero, no worries, mga dear. IMEEsolusyon ang kulitin natin ang Department of Agriculture sa pagrenda sa mga importers at magtakda ng ban sa imported na bigas tuwing harvest time!

IMEEsolusyon din sa smuggler ng mga isda, inaasahan nating pakikinggan ng BFAR ang hirit nating silipin at patigilin ‘yan. Dagdagan natin ng ayudang pinansiyal ang mga fishermen. Isa pa, dapat siguruhin ang “no entry” sa ‘Pinas ng mga imported na karneng baboy na may sakit, ‘di ba?!

Isantabi na ang utak-imported, para makaraos tayong lahat sa kalamidad na dulot ng pandemya sa ating ekonomiya. Believe me, keri natin ‘yan!

Sa wakas, may nakalaan nang cash aid para sa mga magsasaka

ni Imee Marcos - @Imeesolusyon | October 23, 2020

Bahagya tayong nabunutan ng tinik dahil sa pag-apruba ng ating mga kapwa senador na bigyan ng direktang cash assistance ang ating mga rice farmers.

Aprubado na ng Senado ang joint resolution number 12 na magbibigay ng cash assistance sa mga nagsasaka ng isang ektarya o mas maliit pa.

Ang pondo ay kukunin sa sobra o excess sa Rice Competitiveness Enhancement Fund o RCEF. Kahit paano ay may maaasahang tulong ang mga magsasakang matagal nang umaaray sa murang presyo ng palay.

Pero hindi pa tayo lubusang masaya, kasi namamayagpag pa rin ang mga rice importers lalo na iyung mga gumagawa ng hindi kanais-nais. Biruin ninyo, naisumbong sa atin na gumagamit ang mga ito ng permit ng mga kooperatiba, pagkatapos idinedeklarang mas mababa ang mga nabili sa orihinal na presyo. ‘Kaloka!

Ang matindi pa, nakakubra ang may 40 rice importers ng kabuuang P1.4 billion dahil sa undervalued shipment nila mula noong March hanggang June last year!

Hinahabol natin ang amount na ‘yan para ilaan na rin sa cash aid at ang balita, gumagawa raw ng paraan o legal remedies ang mga nasabing importers para makaiwas sa liability.

Well, IMEEsolusyon d’yan, ‘di natin sila palulusutin. Lalakarin natin na maimbestigahan ang kanilang mga kabulastugan at dapat rin silang maparusahan sa pagsasamantala lalo na sa ating gobyerno mismo!

Kung dati rati, tila kayo palos... palusot dito, palusot doon — this time, no more na. Bistado na kayo at humanda na rin kayo sa mga mata ng taumbayan!

Mga mali-maling learning modules, sobrang nakakahiya!!!

ni Imee Marcos - @Imeesolusyon | October 21, 2020

Mahigit dalawang linggo na ang online class o distance learning, pero samu’t sari pa rin ang mga aberya. Nakakaloka!

Nakakaalarma ang mga palpak na aralin. Isa na riyan ‘yung “bastos o mahahalay” na mga pangalang ginamit na halimbawa, na sinagot din ng mga bastos na salita. Ano ba ang itinuturo natin sa kabataan?

Mabuti na lang at naibabalita ang mga ganyan sa social media, na nagba-viral pa! Kung hindi, paano natin malalaman ang mga kapalpakang ito na kung tutuusin, matagal na ring nangyayari sa ating mga textbook?

Hindi lang ‘yan, namamayagpag din ang mga typo errors at maling grammar! Sa isang module, may nakita kaming 35 mistakes.

Nakakita naman ng 37 mali ang isa naming kasamahan. Ano ba ‘yan?

Kung nagkamali sa pagta-type at sa pag-i-imprenta, mas lalong nakakatakot isipin. Walang oras mag-proofread ang mga gumawa ng modules? O, sadyang wapakels lang?

‘Yung ating mga titser sa Cordillera, Mindanao at iba pang parte ng bansa —extra-challenge para sa kanila ang pagdi-distribute ng mga modules. Tapos, ‘yun pala, bukod sa mahirap intindihin, mali-mali pa. ‘Susmarya, nakakahiya to the max!

‘Yung ibang nanay naman, nagrereklamo rin. Sabi, wala raw silang maintindihan sa module, napakahirap o kumplikado raw.

Hay, naiintindihan ko ang sitwasyon ng DepEd. Naaawa rin ako sa kanila dahil paspasan naman talaga ang paggagawa ng mga learning materials.

IMEEsolusyon lang d’yan ay super-double checking ang gawin ng DepEd. Hindi lang dahil nakakahiya, kundi para masigurong tama ang ating itinuturo sa mga bata. Keri n’yo ‘yan!

Siguraduhin sana ng DepEd na bago ma-release ang mga module sa mga bata, hundred percent korek!

Although sagad to the max na ang pagod ng mga teachers, paki-double check din bago ninyo ituro sa mga estudyante. Kawawa naman sila na tatandang mali ang mga natutunan. Hindi ba?