ASEAN, kumilos para maging affordable ang presyo ng COVID-19

ni Imee Marcos - @Imeesolusyon | November 25, 2020

Tayo ba ay mag-aabang na lang for life pagdating sa presyo ng mga bakuna at gamot galing sa mga dambuhalang pharmaceutical companies?

‘Yan, mga friends, ang sitwasyon nating mga less developed countries, lalo na sa inaantabayanang bakuna kontra sa COVID-19. Palagi na lang tayong mega-hintay sa mga presyong idinidikta ng mga dayuhang kumpanya. Forever na lang ganyan?

Kawawa naman tayong mga bansang napag-iiwanan. Pero ‘wag nating bulukin ang ganyang kalakaran! Nag-uunahan na ang mga pharmaceutical companies ng US, UK, Russia at China na matapos sa clinical trials.

Kailangang may kontrol sa presyuhan o ang tinatawag na global price ceiling! Pero paano mangyayari ‘yan kung sila ang nagdidikta at ang mga pobreng bansang tulad natin ay “at their mercy”, sabi nga. At ‘wag ka, need pa ng reservation fee o deposito para masigurong mabibigyan tayo ng supply!

IMEEsolusyon diyan, eh, gamitin ang impluwensiya ng ASEAN na kinabibilangan ng Pilipinas. Mega-hirit tayong simulan ang bagong paraan ng pagnenegosyo sa paggawa, pagpa-patent, pag-presyo at pamamahagi ng mga bakuna lalo na sa COVID-19.

Lumakas ang impluwensiya ng ASEAN sa pandaigdigang pangangalakal nang lagdaan ng sampung miyembrong bansa ang Regional Comprehensive Economic Partnership o RCEP Agreement nuong nagdaang linggo. Kasali pa ang mga non-member states na Australia, China, Japan, New Zealand at South Korea.

Take note, kumakatawan ang RCEP sa isa sa bawat tatlong tao sa buong mundo. Oh, ‘di ba bongga!

Puwedeng pasimulan ng ASEAN na i-share at huwag ipagdamot ng mga imbentor ang kaalaman at teknolohiya sa paggawa ng bakuna. Ito ang dapat maging “new normal” sa mga patent at copyright sa bakuna, para sa kabutihan ng sangkatauhan.

Inaasahan din nating out of malasakit at hindi lang para sa kita ang karerahan ng mga bansa sa pagbuo ng COVID-19 vaccine! Harinawa!

Wish talaga nating makarating ang hirit ng IMEESolusyon sa ASEAN para sa pandaigdigang kasunduan sa presyo.

‘Ika nga, kung gusto, may paraan; kung ayaw, nagdadahilan, ‘di ba!

Paghandaan ang mga bagyo...

Baha at iba pang sakuna dulot ng climate change, try natin ang ‘sponge cities’ na ginawa sa India at China!

ni Imee Marcos - @Imeesolusyon | November 23, 2020

Kada taon, humigit kumulang dalawampung bagyo ang pumapasok sa Philippine Area of Responsibility o PAR, at lima sa mga ito ay lubhang mapaminsala.

Ang Pilipinas ay nasa tinatawag na Typhoon Belt at madalas sa atin unang nagla-landing ang mga bagyong galing sa Pacific Ocean.

Palagi namang nakapaghahanda ang ating gobyerno at mga residente laban sa kalamidad, pero palagi ring kulang at nabibiktima pa rin tayo ng baha at mga landslide.

Alam natin ang nakakaalarmang kapabayaan sa pamumutol ng mga puno at kakahuyan sa paligid ng mga watershed at dam. Kaya ‘di malayong bumigay ang lupa lalo na kapag may bagyo dahil sa kalbo na ang mga bundok, ‘di ba?

Bukod pa riyan, eh, kahit anong dredging ang gawin natin taun-taon sa mga ilog at mga lawa, hindi pa rin makontrol ang mga baha na namiminsala at sanhi ng pagkasawi ng ilan nating kababayan lalo na nitong katatapos na Bagyong Ulysses. Pero ‘wag tayo sumuko, hanap lang ng paraan.

IMEEsolusyon na nakikita ko ay ang gumawa tayo ng sarili nating bersiyon ng tinatawag na “Sponge Cities” upang maibsan ang pinsala ng mga baha na pinatitindi ng climate change.

Ang estratehiyang ito’y kabibilangan ng pinagsama-samang mga imprastruktura ng tubig, mula sa pinagbagsakan ng ulan patungo sa water treatment facilities. Ang layunin nito ay makontrol ang baha at makaipon din ng tubig para gawing tubig-inumin o panlinis.

Ang mga aspaltadong kalsada at sidewalk na gawa sa mga buhaghag o mga may maliliit na butas sa ibabaw ay dapat ding subukan sa mga lungsod para masipsip nito ang ulan o baha. Keri ‘yan!

At sa ilalim ng konseptong Sponge Cities, gumawa pa tayo ng mas maraming flood control project tulad ng floodway at spillway kung saan padadaluyin ang tubig baha papunta sa karagatan o sa Manila Bay para hindi umapaw ang mga lawa at ilog at bumigay ang mga embankment at dike.

Take note, ha, ang Sponge Cities na ‘yan ay 70’s pang proyekto ng gobyerno partikular ‘yung Parañaque Spillway, pero hindi itinuloy ng mga sumunod na administrasyon. Bakit nga ba? Sayang naman.

FYI, tagumpay na pangontra sa flashflood ang Sponge Cities sa China at India. Kung gumana sa kanila, why not sa atin? Kaya subukan natin! Agree?

Cagayan at Isabela, nagmistulang Pacific Ocean sa mala-“Ondoy” na bagsik ni “Ulysses”

ni Imee Marcos - @Imeesolusyon | November 20, 2020

Mala-“Ondoy” ang bagsik ng katatapos na Bagyong Ulysses na nanalanta sa Metro Manila at mga karatig lalawigan, habang nagmistulang Pacific Ocean naman ang Cagayan at Isabela dulot ng baha at sa pinakawalang tubig ng Magat Dam. ‘Kaloka!

Nakapaghanda naman ng maaga ang ating gobyerno sa bagyo, pero maaaring hindi sapat. Ibinalik lang ni “Ulysses” ang nakakatakot na karanasan nating lahat sa “Ondoy”, lalo na sa bahang dulot ng mga pinakawalang tubig sa mga dam. Grabe, ‘di ba!

Hay nako, pabalik-balik lang ang sitwasyon natin tuwing may kalamidad at bagyo. Palaging may kulang, palaging may pagpa-panic, at never pa nating naranasan ang zero casualty kapag may malalakas na bagyo.

Pero no worries, may IMEEsolusyon tayo. Unang-una, i-improve natin yang mga deka-dekada nang napabayaang mga dam na tila mga senior citizen na marurupok na ang mga buto. It’s about time na ayusin na ang mga dam para hindi agad bibigay gaano man kalakas ang mga darating pang bagyo.

IMEEsolusyon din na protektahan ang kalikasan at ibalik ang Green Revolution. Naabuso na kasi ang ating kalikasan at tila nakalilimot na tayo sa pagbibigay-proteksiyon sa mga watershed sa paligid ng mga dam. Kung walang puno, lalambot ang lupa na kinatatayuan ng mga dam. At ang sariwang tubig na iniinom natin, dulot ‘yan ng mga puno at mga tanim. Agree?

Isa pang IMEEsolusyon, itutulak nating imbestigahan sa Senado kung ano talaga ang nangyari kung bakit nagka-flashflood sa Cagayan. Hindi para mag finger-pointing kundi para mabatid kung may mali at may pagkukulang lalo na sa pagbibigay abiso sa mamamayan.

‘Wag lang tayong mawalan ng pag-asa, laban lang lalo na sa mga pamilyang nawalan ng mahal sa buhay at patuloy na nire-rescue sa mga baha. Maaalpasan natin ang mga pagsubok na dulot ng kalamidad.

Kapit lang sa isa’t isa, magiging magaan ang lahat, pribado mang indibidwal o nasa gobyerno. Saka na ang pamumulitika at turuan, unahin muna ang pagtutulungan! Keri natin ‘yan!