Paniningil ni P-Digong sa Amerika, ‘di pangongotong!

ni Imee Marcos - @Imeesolusyon | February 26, 2021

Sa panahon ngayon na maraming bansa ay naghihikahos dahil sa pandemya, hindi makatuwirang manlibre lalo na kung ang ililibre ay ‘superpower’, tulad ng Amerika!

Ang tinutukoy natin ay ‘yung kahit wala nang base militar ng U.S. dito sa atin, eh, patuloy pa rin ang pagpronta ng Pilipinas bilang unang depensa ng Amerika sa Indo-Pacific region.

At huwag ka! Bukod sa buwis-buhay nating kabutihang-loob, pati ang tubig at kuryente natin sa ating mga military base, Pilipinas pa rin ang nagbabayad. Hello? Tama ba ‘yan?

Napakaraming Pilipino ang hindi kayang magbayad sa tubig at kuryente ngayong may pandemya. Itutuloy pa rin ba ang subsidiya sa mga Amerikano?

Kung wala ang Pilipinas, ang kalakal ng Amerika pati na ang mga pangako nito sa seguridad ng rehiyon ay hihina. Ngunit dahil sa pagtanggap natin sa U.S forces, magiging target ang Pilipinas ng mga kalaban ng Amerika, kahit hindi tayo direktang kasali sa anumang giyera na maaaring pumutok sa ating rehiyon.

Noong World War 2, binomba ng Japan ang Pilipinas dahil tayo ay US colony noong panahon na ‘yun. Ang resulta, isa ang Manila sa dumanas ng pinakamadugo at pinakamalaking pinsala sa buong mundo pagkatapos ng pandaigdig na digmaan.

Huwag naman sana tayong pumayag na maulit ang kasaysayan at patuloy na abusuhin.

IMEEsolusyon d’yan, i-review ang EDCA (Enhanced Defense Cooperation Agreement) na pinirmahan ng U.S. at Pilipinas noong Abril 2014.

Sa ilalim ng EDCA, ang Amerika ay maaaring mag-stockpile ng kanilang mga gamit pandigmaan at mag-deploy ng kanilang mga tropa sa limang kampo militar sa Pilipinas.

Ang dating bayad sa ating gobyerno bago mapaalis ang mga U.S. bases halos tatlong dekada na ang nakaraan ay naiiwasan din ng Amerika, ‘di ba? Kaya’t pabor tayo sa sinabi ni Pangulong Rodrigo Duterte na kailangang magbayad ng patas ang U.S. sa atin!

Hindi ‘yan pangongotong, puwede ba?! Karapatan nating naningil ng nararapat dahil seguridad ng ating bansa at buhay ng mga Pilipino ang nakataya rito!

Organisasyon na tutugon sa mabilis na tulong sa mga OFWs, ayos!

ni Imee Marcos - @Imeesolusyon | February 24, 2021

Habang maiksi ang kumot, matutong mamaluktot. ‘Yan ang ating kailangan sa ngayon na sagad na sagad na ang badyet ng ating pamahalaan dulot ng pandemya at mga nagdaang kalamidad.

Bagama’t isinusulong natin noon pa ang pagkakaroon ng Department of OFWs, marami ang nabago mula nang manalasa ang COVID-19. Mga pagkakataong hindi natin maiiwasan!

Sa katunayan, kulang pa nga maging ang pambili natin ng mga bakuna, at halos walang mailaan ang mga LGUs dahil kapos na sa pera dahil sa pandemya.

Ayon sa Budget Department, nasa P1.109-B ang tinatayang minimum na gastusin para sa pagtatayo ng panibagong departamento. Masakit man sa ating kalooban at gustuhin man nating mabuo na ang opisinang nakatutok para lang sa OFWs, aminin nating hindi pa talaga kaya sa ngayon.

Alam naman nating maiintindihan tayo ng mga ating mga mahal na OFWs, at batid din nila ang sitwasyon lalo na sa buong mundo na maging ang mga mayayamang bansa ay nakaranas na rin ng krisis.

Pero, ‘wag mawalan ng pag-asa ang ating mga bagong bayani. IMEEsolusyon natin d’yan ay ituloy na muna sana ‘yung mungkahi nating National Overseas Employment Authority (NOEA) na hindi gaanong malaki ang kinakailangang logistics sa pag-organisa.

Hindi dahil sa minamaliit natin ang problema ng OFWs, kundi dahil may right-sizing crusade ang ating Pangulo sa kabila ng katotohanang isa ang Department of OFWs sa kanyang mga binitiwang pangako.

Isa pang IMEEsolusyon d’yan ay mag-issue si PRRD ng Executive Order na nagpapalawak ng sakop ng POEA o Philippine Overseas Employment Administration. Makapagbibigay na ito ng dagliang tulong sa mga kababayan natin abroad na nangangailangan ng agarang solusyon sa kanilang problema dahil nariyan na ang istruktura o organisasyon. ‘Di ba?

Unahin ang pagbubukas ng mga eskuwelahan kaysa mga arcade at sinehan!

ni Imee Marcos - @Imeesolusyon | February 22, 2021

Ano ba ang mas importante — libangan o edukasyon?

Kamakailan, dismayadong-dismayado tayo. Dahil sa pagnanais na buhayin ang ekonomiya, binigyan ng prayoridad ng IATF na buksan ang mga sinehan at game arcades sa mga mall kung saan mga bata ang tumatangkilik.

Nakakaloka lang isipin na hindi pa pinapayagan ang face-to-face classes pero go-ahead na sa mga palaruan at sinehan? Mas delikado ba para sa mga bata ang mag-aral sa classroom kaysa maglaro ng video games sa mall?

Ikatatalino ba ‘yan ng mga bata?

Kawawa naman ang mga nagsasakripisyong titser at estudyante! Hindi na nga makapag-aral at walang pasok sa paaralan, hirap pa rin mag-remote learning dahil sa naghihikahos ang signal at WiFi.

‘Yan nga ba ang sinasabi natin, dati pa na kung may mga nanay lang sana sa IATF, mas mabibigyang halaga riyan ang edukasyon o eskuwela sa mga bibigyang-prayoridad sa pagdedesisyon.

Naiintindihan natin ang layunin ng ating mga kasamahan sa gobyerno na unti-unti nang ibalik ang kita ng mga kababayan nating nawalan ng trabaho at negosyo. Pero sana naman ay bigyan natin ng kaukulang pansin ang edukasyon.

Kung tutuusin, marami na ring maliliit na private schools ang nagsara at negosyo rin silang maituturing. Kailangan din nila ng tulong mula sa pamahalaan.

IMEEsolusyon sa pagdedesisyon ng tama, sana paigtingin ang konsultasyon sa iba’t ibang sektor, bago magpasya sa dapat unahin. Balansehin natin lahat at pag-aralan ng husto.

Mabuti na lang at narinig nating isasama na rin ang limited face-to-face classes sa Marso. Sana ay siguraduhin lang na ang mga guidelines na ilalabas ay angkop pa rin sa health protocols para maiwasan ang hawaan.