Bigyang-prayoridad ang pagbibigay-ayuda sa mahihirap

ni Imee Marcos - @Imeesolusyon | August 06, 2021

Lockdown na ngayong araw sa NCR, at magtatagal ito hanggang sa August 20. Pero ang tanong, nakapamili na ba ang mga tao ng sapat na pagkain?

Kung may ilang bukas na tindahan o maliliit na bilihan ng pagkain o groceries sa mga lugar na naka-lockdown, mas mahal kaya ang bilihin?

Harinawa’y may sapat na ayuda ngayong ECQ sa NCR at ibang lugar para hindi magutom ang ating mga kababayan. Lalo na sa mga arawang pasahod na mga manggagawa.

Bago pa mag-lockdown, nakiusap tayo sa mga taga-DTI na ipagpaliban muna ang inaprub nilang hirit na price hike ng mga de-lata, instant noodles, gatas at iba pang basic goods. Ang hirit kasi ng mga manufacturers, noong 2019 pa raw ang kanilang huling pagtataas.

Pero nga ‘di ba, premature at hindi pa naman naisasapubliko ang mga panibagong SRP o Suggested Retail Price, kaya naman puwede pa ipagpaliban ang mga pagtaas-presyo, plis naman. Bawal sa panahon ng emergency situations ang profiteering o pananamantala ng mga negosyante sa publiko para lang kumita ng mas mataas, alinsunod na rin sa Republic Act 7581.

Eh, biruin n’yo naman, kahit piso-pisong pagtaas-presyo ay hindi dapat minamani-mani kasi malaki ang mawawala sa mga workers na arawan ang suweldo. Mas kaya naman ng mga negosyante na manatiling ahon hanggang malampasan ang lockdown.

At ang tanong, paano na ang mga walang kita sa loob ng dalawang linggong lockdown? IMEEsolusyon para may makain ang mga kapos ang pambili, paspasan na ang pamamahagi ng ayuda. Cash ang ibigay para siguradong buo ang matatanggap at wala nang mabigat na binibitbit.

Remember, mas mahirap naman na nakaligtas nga sa Delta variant ang ating kababayan pero nadale naman ng kagutuman. Dapat patas ‘yan na naiintindi at naikakasa nang maayos.

IMEEsolusyon din na nakikita natin, eh, payagan na ring makatulong ang mga community pantry, basta ang importante ay no-touch sila at talagang kung puwede nga ay hindi na visible ang magmamaniobra ng mga community pantry. O kaya’y gawin na lang rolling community pantry na magha-house to house. Keri ‘yan!

Hindi na palalabasin sa bahay ‘pag hindi nagpabakuna, lagot!

ni Imee Marcos - @Imeesolusyon | July 30, 2021

Sa harap ng pagsulpot ng Delta variant, nagkukumahog na ang pamahalan para mas mapabilis na maproteksiyunan ang lahat sa mas mabangis na virus.

Alam nating kulang o hindi pa rin sapat ang mga bakuna at habang naghihintay, ang mabilis na remedy ay ‘yung granular lockdown na ikinakasa ng pamahalaan.

Bakit nga ba, marami pa rin ang takot sa bakuna? Santisima, tayo nga proud na sabihing bakunado at protektado na tayo. Marami pa rin ang nagtatago sa kanilang lungga sa takot at ayaw magpabakuna at ikinakatuwiran na merong mga namatay sa COVID-vaccine.

Mga friendship, ‘wag ganun, ang bakuna ay proteksiyon natin. Mas nakakatakot na wala tayong bakuna, lalo na’t naghe-hello na ang Delta variant at nakaabang na ng mabibiktima.

Take note, iniisip na ng ating Pangulo na hindi palalabasin sa bahay kapag hindi pa nababakunahan, so, paano na lang ‘yan?

IMEEsolusyon natin sa ating mga ka-barangay na kapos sa bakuna at naghihintay pa ng bakuna, eh, isyuhan n’yo na muna ng sertipikasyon ang mga hindi pa bakunado na nakalinya silang turukan para naman makalabas sila ng kanilang mga bahay at makakuha, makabili ng kanilang mga pangangailangan.

IMEEsolusyon natin sa mga LGU at barangay execs na takot ang kanilang nasasakupan sa bakuna, aba, eh, gawa kayo ng local campaign sa inyong nasasakupan sa advantage ng may bakuna at wala.

IMEEsolusyon din d’yan, eh, bigyan ninyo ng assurance ang mga residente na maaasikaso sila kapag nagkaroon ng adverse effects sa kanila ang mga bakuna.

Reminder lang, “prevention is better than cure”, kaya ano pa ang hinihintay ninyo, magpabakuna, ‘wag matakot!

May Delta variant na nga, may tax variant pa, ‘kalokah!

ni Imee Marcos - @Imeesolusyon | July 27, 2021

Umuusad at hindi pa halos nakababangon ang ating export-industry, tila mabobokya pa ang kakarampot nilang kita.

Eh, bakit kamo? Biruin ninyong alisin ba naman ng BIR ang 12% exemption sa value added tax na nagpapababa sa halaga ng mga raw materials, packaging supplies at iba pang serbisyo sa mga export-oriented manufacturers, kabilang ang critical healthcare supplies?! Ano ba!

Aba, eh, kung may Delta variant na banta ngayon sa ating kalusugan, eh, ito nama’y tila “tax variant” sa negosyo ng ating mga exporters. Itong bagong sulpot na regulasyon sa buwis o ang ‘BIR regulation 9-2021’ ang malaking banta sa unti-unti pa lang na bumabangong export industry ng bansa.

Naghihingalo na nga ang industriya, babawiin pa ng ‘tax variant’ ‘yung kakarampot na benepisyo ng mga exporter. Lahat mauuwi lang sa wala! ‘Kalokah!

Tulad na lang nitong mga garment exporters na nagsikap na makaagapay sa pandemya. Nawalan sila ng mga orders para sa ginagawa nilang damit, kaya pinalitan nila ng mga PPE, lab gowns at surgical masks para lang mabawasan ang masesesante sa trabaho at matuloy pa rin ang pagsuweldo sa mga natirang empleyado.

FYI, IMEEsolusyon sa kanilang proteksiyon vs ‘tax variant’, eh, ‘yung ating itinutulak na Senate Bill 1708 or ang “Healthcare Manufacturing and Pandemic Protection Act”, na noong isang taon pa natin naihain.

Hindi lang ito makahihikayat ng mga foreign investor, kundi makatutulong din sa pagpapanatili ng trabaho sa Pilipinas!

Take note, sa ilalim ng panukala, kapag may pandemya o anumang health emergency, lahat ng ibinebenta ng mga exporter na critical healthcare products sa loob o sa labas man ng bansa ay ituturing na export sales kaya mabibigyan ito ng exemption sa VAT at iba pang bayarin. At, huwag ka, and’yan pa rin ang iba pang export incentives o panghihikayat sa negosyo.

Saka, ang ating mga exporter sa special economic zones ay puwedeng hanggang 80% ang gawing produksiyon para sa lokal na pangangailangan. Maikakarga pa rin ito bilang export sale requirements na nakasaad sa ating batas.

At higit sa lahat, ang ating panukala ang mag-oobliga rin sa gobyerno na unahing bumili ng mga healthcare supplies sa mga local manufacturer, basta sure lang na hindi lalampas ng 25% ang presyo nila kumpara sa pinakamababang tawad ng mga foreign supplier.

Aba, eh, kung noon pa sana bumili ang DOH sa ating mga local manufacturers na kapareho lang ang produkto at mas mura, hindi pa sila nakaladkad sa kontrobersyang nag-overpriced daw ang pagbili ng PPEs na nagkakahalagang Php1.8 million, ‘di ba?