Mga tiangge, payagan na para sa dagdag-kita

ni Imee Marcos - @Imeesolusyon | October 20, 2021

Dahil lumuluwag na ang mga community quarantine, kahit malayu-layo pa ang Pasko at hindi pa nga sumasapit ang paggunita sa Undas, payagan na natin ang operasyon ng mga tiangge. Bakit 'kanyo? Aba, eh, para naman pandagdag-trabaho sa ating mga kababayan.

Ang sabi nga ng DTI, wala namang pagbabawal ang IATF sa operasyon ng mga tiangge. At bilang chairman ng Senate committee on economic affairs, it's about time na bigyang-pagkakataon din ang maliliit na negosyante na kumita. Tulong din ito sa paunti-unting pagsigla ng ating ekonomiya.

Kadalasan, eh, huling linggo ng Nobyembre nag-uumpisa nang magsulputan ang mga tiangge para sa Holiday Season o Kapaskuhan. Pero this time, kung maaga natin silang papayagang magbukas kahit nga wala pang Undas, magkakahanapbuhay na sila at kikita na.

Saka, pabor din 'yan sa ating mga konsiyumer o mamimili, 'di ba? Kasi kung maagang makakapamili ang ating mga kababayan para sa Kapaskuhan, eh, makakamura sila at menos gastos. Kasi nga, pagsapit ng Disyembre, dumodoble na ang presyo ng mga bilihin.

Agree naman ako sa hirit ng DTI na ang mga LGUs na ang dapat magdesisyon per barangay sa pagbubukas ng mga tiangge, dahil sila ang nakakakita sa dami ng mga tinatamaan ng COVID-19 sa kani-kanilang nasasakupan. Eh, kung nakikita naman nila na maglalagay lalo sa peligro sa virus ang tiangge, eh, 'di 'wag na.

Hindi rin kasi tayo dapat maging kampante kahit bumaba na ang COVID-19 cases, dahil nand'yan pa rin ang nakaabang na virus at anumang oras, eh, puwedeng maging sanhi ito ng panunumbalik ng paglobo ng numero ng mga tinatamaan ng nakamamatay na sakit, 'di ba?!

IMEEsolusyon naman d' yan, dapat obligado ang maliliit nating mga negosyante na makipag-koordinasyon sa kani-kanilang LGUs kung papayagan sila at kailangang matiyak na maipatutupad dito ang istriktong 'minimum public health standards'.

Sakaling aprubado ng LGUs, maiging makapagtakda agad ang mga lokal na pamahalaan ng kani-kanilang guidelines na dapat istriktong masusunod ng mga may tiangge at mga mamimili. Kailangang istrikto, ha? Dahil kung hindi ang inyo ring komunidad ang magdurusa sa COVID-19, 'di ba?!

IMEEsolusyon naman sa seguridad na magsisigurong masusunod ang health protocols, pagtulungan na ng ating kapulisan at mga barangay tanod ang pagbabantay sa mga pasaway sa social distancing at face masks. Plis 'wag na kayong malilingat dahil buhay ng bawat isa sa inyong komunidad ang nakataya. Agree?!

Mga botanteng OFWs, itrato nang maayos ng embassy officials!

ni Imee Marcos - @Imeesolusyon | October 18, 2021

Mahalaga ang papel ng bawat OFWs sa ating bansa. Sa ating panahon, itinuturing din silang mga bayani. Malaking bahagi ng remittance nila ang pumapasok sa kabang bayan.

Pero kamakailan, nawalan ng respeto ang ilang embassy officials, partikular sa OFWs sa Taiwan, nang sungitan at basta na lang palayasin nang maghabol para makapagparehistro at magkaroon ng tsansang makabahagi sa paparating na eleksiyon.

Nakalulungkot makita ang ganitong sitwasyon na sa isang iglap, kapwa pa Pinoy ang gagawa nito sa ating mga kababayan na inaasahan sanang sila ang magbibigay ng maayos na trato at proteksiyon sa ating mga kababayang OFWs. Ano ang nangyari?

Eh, ikatwiran ba naman ng embassy official sa Taiwan na last minute sila? Daing ng ating OFWs doon, hindi sila last minute dahil ilang araw bago ang deadline sila nagpuntahan o nag walk-in sa lugar para makapagparehistro, kundangan ba naman na dapat nagrehistro sila online at hindi na puwede dahil puno na.

Namasahe sila, nagsi-day off, at masigasig na magparehistro, pero ano ng dinatnan nila roon, na-humiliate pa sila? Napakaraming reklamo rin ang mga OFW sa Middle East na bumibiyahe galing sa malalayong lugar para lang makarating sa mga embahada ng ‘Pinas. Santisima! Bakit ganun ang trato sa ating mga kababayang OFWs?

IMEEsolusyon, Comelec, paki-check ninyo ang pangyayaring ‘yan at baka gawin din ‘yan sa iba pang bansa. Makisuyo na pagsabihan naman ang ating mga opisyales doon na nakatalaga sa registration na irespeto at itrato ng maayos ang ating mga kababayan, maayos na paliwanagan, at bigyan ng pagkakataong makapag-parehistro.

Reminder, registration pa lang, baka naman ‘pag mismong botohan na, maulit ang mga hindi maayos na trato sa ating mga kababayan! Pakisiguro na napapanatili ang pagpapahalaga sa ating OFWs.

IMEEsolusyon na sana ay mabigyan pa ng pagkakataong makahabol ang iba pa o baka puwedeng bigyang-ekstensiyon kung posible sa mga walk-in na gustong magrehistro. Pihadong marami pang OFWs ang gustong humabol.

Remember Comelec, inilaanan ang inyong ahensiya ng badyet ng ating pamahalaan para makapagbigay ng maayos na serbisyo sa ating mga kababayan, lalo na sa OFWs na bilyones ang kontribusyon sa ating ekonomiya. Dahil sa mga remittance ng OFW, nakakaahon ang ating ekonomiya. Alam naman nating mabilis na tutugon ang Comelec sa ating panawagan. Plis lang!

Mga jeepney drivers, mas may puso kaysa sa mga oil company!

ni Imee Marcos - @Imeesolusyon | October 11, 2021

Sa gitna ng pandemya, sunud-sunod ang pagtaas ng presyo ng mga produktong petrolyo.

Tulad ng inaasahan, ang domino-effect nito, eh, pagtaas ng presyo ng mga bilihin at posibleng pagtaas ng singil sa mga pasahe.

Pero 'yun nga lang, kung sino pa ang numero-unong apektado ng oil price increase sila pa ang mas nakakaintindi, partikular ang ating mga jeepney driver na kakarampot na nga ang mga pasahero dahil sa pinaiiral na limitadong sakay dulot ng pandemya,

Saludo tayo sa ating mga kababayang tsuper, mga tatay at kuya na kumakayod para sa kanilang mga pamilya. Ayon kay Pasang Masda president Obet Martin, sa P46 na kada litrong presyo ngayon ng diesel, dapat P12 na ang pasahe sa jeep.

Paliwanag ni Ka Obet sa ating tanggapan, naging benchmark nila sa paghingi ng fare hike sa LTFRB, dalawang taon na ang nakararaan, na kapag ang presyo ng diesel ay P40, awtomatik na P9 ang ihihirit nila na maging pasahe sa jeep. Kapag P43 kada litro ang diesel, inihihirit nila na gawin nang P11 ang pasahe. At ngayong higit na sa P46 ang presyo ng diesel, inihihirit nilang gawin nang P12 ang maging pasahe sa jeep.

Pero kahit talong-talo na sila sa kita, malaki ang kanilang puso sa konsiderasyon sa mahihirap nating kababayang mananakay ng jeep, at nagdesisyon silang 'wag na humirit ng fare hike. Oh, 'di ba, 'yan ang may pusong Pinoy na may malasakit sa kapwa!

Kahit nga si Piston national president Mody Floranda, isinasa-alang-alang nila ang mga tag-hirap nang mga commuter o mananakay at nagsabing hindi na muna hihirit ng pagtaas ng singil sa pasahe sa mga jeep.

IMEEsolusyon na baka naman puwedeng dinggin natin ang hirit ng transport sector na i-repeal o amyendahan kaya natin ang Oil Deregulation Law at magpatupad na ng price control.

Aba, eh, hindi natin maisasantabing may katotohanan naman talaga na ang mga oil company na 'yan, eh, kabilang sa mga oil cartel at abusado sa ibinigay na kapangyarihan sa kanila ng gobyerno na sila ang magtakda ng pagtaas at pagbaba ng presyo ng langis.

'Di ba?!

May pandemya ngayon, it's about time na rebyuhin natin o silipin ang pamamayagpag ng oil cartel, para naman makontrol ang pang-aabuso sa pagpapatupad ng oil price increase. Agree?