No vax, no entry’ sa ilang malls, ang OA naman!

ni Imee Marcos - @Imeesolusyon | November 19, 2021

Pro-bakuna tayo at dapat lang magpabakuna na ang lahat para tuluyan nang makontrol ang COVID. Pero, anti-discrimination tayo at hindi dapat ma-harass ang ating mga kababayan.

Sa ganang atin, hindi pa kasi ganun kalaganap ang mass vaccination program. Unang-una, hindi pa ‘yan napalakas, kaya dapat prayoridad ay ang COVID testing.

Ikalawa, maging sa vaccination bagama’t marami na ang bakuna, kapos naman sa syringe, mabagal ang paghahatid sa mga probinsiya, at nahihirapan pa rin ang mga nagpapaiskedyul sa pagbakuna.

Kamakailan, binalaan ang mga LGUs na maraming pasaway at hindi sumusunod sa health protocols sa mga shopping mall. Eh, meron pa ring restaurants na hindi hinahanapan ng vaccine card ang ilang customer para sa makapag-dine-in. Hay naku!

Kaya no wonder, ikinagalit ito ng ating Pangulo.

Kaya naman, ang DILG at mga mayors, meron na silang pinaplanong mga hakbang na mas higpitan pa ang mga shopping malls. Take note, plano pa lang at ikinakasa pa.

Sa harap niyan, ilang ordinaryong residente ang nagparating sa ating tanggapan na hinaharang na at hindi pinapapasok ang mga hindi bakunado. ‘Ika nga, nagpapatupad na ng “no vax, no entry policy”. Teka muna. Aba, oks sana ang intensiyon, pero sa tingin natin ay masyadong harsh ‘yan!

Biruin n’yo, wala pa talagang national policy na nabubuo para rito, paghimok pa lang sa mga business establishments na ‘wag papasukin ang mga hindi bakunado. Pero hindi lahat ‘yan ay dahil sa ayaw magpabakuna. Magkakaiba ang dahilan — ang iba, naghihintay pa ng forever na bakuna at iskedyul.

Ang iba naman, merong hinihintay na resulta para sa kanilang comorbidity at advise ng doktor. At saka, isa pa, hindi naman dapat ipagbawal ang pamimili sa mga grocery para sa basic needs, ano ba! ‘Yung mga dine-in restaurants ang pinahihigpitan!

Nauunawaan natin ang kagustuhan na proteksiyon laban sa virus, pero dahil hindi pa ganun kapulido ang tamang supply, kakapusan ang syringe o hiringgilya, mabagal ang pagdating ng mga bakuna at pag-iskedyul ng pagturok, lalo na sa mga probinsiya, ‘wag naman tayong exaggerated, at ipatupad na agad ang ‘no vax, no entry policy’.

IMEEsolusyon, maging considerate o maunawain muna. Unang-una, wala pang klarong patakaran d’yan, kung hindi sila bakunado, payagan ang kanilang pamimili ng basic na pangangailangan sa mga grocery, pagkain ‘yan! Basta ang importante, istriktong bantayan ang distansiya ng mga tao at nakasuot ng facemasks ang mga mamimili at i-limit ang papapasuking shoppers.

Ikalawa, rendahan ang volume ng mga nagda-dine-in sa restoran sa loob ng malls at sitahin ang mga walang vaccine card na gustong mag-dine in. Ikatlo, maglagay ng malinaw na karatula sa entrance ng mall sa mga policies para maiwasan ang mga pagtatalo sa mga guwardiya.

Bilinan din ang mga security guard na habaan pa ang pasensiya at ‘wag magtataas ng boses sa mga shoppers. Manatiling may respeto at kontrolin ang init ng ulo.

Magpa-Pasko na, bigyan ng kaunting konsiderasyon ang mga hindi pa bakuna. Higpitan lang ang pinaiiral na safety protocols at dagdagan ang mga tao na sisita, siguradong magiging safe lahat tayo. Paki lang, puwede?!

Kakulangan ng hiringgilya, dahilan kaya mabagal ang pagbabakuna

ni Imee Marcos - @Imeesolusyon | November 17, 2021

Shortage ng hiringgilya ang isa sa samu’t saring aberya kaya mabagal ang pagbabakuna sa mga probinsiya.

Hindi ito maitatanggi dahil bilang dating gobernador sa Ilocos Norte, marami pa rin tayong nakakausap na mga kabaro sa LGUs na nakakaabala sa kanilang “mass vaccination” ang kakapusan ng hiringgilya, bukod pa sa mabagal na paghahatid at problema sa kawalan ng iimbakan.

Eh, mangyari naman kasi, itinatago pa noong una ang “syringe shortage”. May limang buwan na ang nakakaraan nang tawagin natin ang atensiyon ng Department of Health (DOH) na maging transparent sila sa ating lahat na may ganyang kakapusan ng hiringgilya.

‘Yun, last week ay nagbabala ang World Health Organization at ang United Nations Children’s Fund na posibleng kapusin ang buong mundo ng nasa isa hanggang dalawang bilyong suplay ng hiringgilya sa 2022. Dagdag pa nito, nagmamarukulyo ang ating Pangulo dahil sa mala-pagong na vaccination system sa mga probinsiya.

Hay naku, bakit naman kasi ang DOH, itinatago pa ‘yan at kailan lang inamin na may shortage pala? Eh, ‘di sana ay mabilis nating nagawan at napag-isipan ng mga paraan.

And take note, DOH, dapat paghandaan ang babala ng WHO at UNICEF sa posibleng global shortage ng mga hiringgilya sa 2022, ha?

‘Wag natin hintaying matulad ‘yan sa “shortage” ng mga bakuna sa buong mundo last year at dahil mabagal tayong kumilos noon, kaya naghintay pa tayo ng matagal bago nasuplayan. Plis naman, ‘wag na sanang maulit ‘yan, DOH!

IMEEsolusyon sa napipintong global shortage, sa susunod na taon, bilang chairman ng Senate committee on economic affairs, gawin nating specific ang pondo para sa mga syringe sa ilalim ng DOH 2022 budget, para sure ball, ‘ika nga.

Ikalawa, konsultahin din natin ang gobyerno ng Finland at Denmark, na natukoy na may ginagamit na paraan o teknik sa paghigop ng mas maraming doses mula sa mga vial o lalagyan ng bakuna.

Suhestiyon natin para rin “aware” ang lahat, lalo na ang mga LGUs, agarang gumawa ang DOH ng “syringe supply dashboard”, tulad ng ginagawa sa mga bakuna, para maipakita ang mga pangalan ng mga supplier ng hiringgilya, ang dami ng mga binili at naka-iskedyul na paghahatid nito.

‘Wag tayong pa-relaks-relaks lang sa napipintong kakulangan sa hiringgilya. Reminder, ang pagkukumahog ng buong mundo para sa bakuna noong nakaraang taon ay maaari ring mangyari sa supply ng hiringgilya sa 2022, kung saan ang mahihirap na bansa na naman ang madadale at mauubusan. ‘Di bah!

Hindi pagpapasakay sa jeep ng mga ‘di bakuna, diskriminasyon

ni Imee Marcos - @Imeesolusyon | November 15, 2021

Jeep ang isa sa mga sinasakyan ng mahihirap nating mga kababayan. At kamakailan, may suhestiyon ang OCTA Research Group na ilimita lang sa mga fully vaccinated ang mga mananakay sa jeep.

Katwiran ng OCTA, nasa 96% na ng populasyon sa Metro Manila ang nabakunahan.

Kung hindi man fully vaccinated, may tig-one dose na ng bakuna.

Medyo napataas tayo ng kilay sa panukalang ‘to ng OCTA, at kumakatig tayo sa katwiran ng samahan ng mga tsuper na diskriminasyon ito sa pagitan ng mga hindi pa bakunado nating mga kababayan. ‘Di bah?!

Saka, tila lutang sa ere ang pag-iisip ng OCTA kung paanong sistema sa pagpapasakay ng fully vaccinated na mga pasahero. Eh, ‘di ba nga, namimik-ap ng pasahero ang mga jeep? Ibig bang sabihin kapag may pasahero, bago pasakayin ay aaksayahin pa nga mga tsuper ang kanilang oras sa pagtatanong, kung bakunado o hindi? Ano ‘yun? Ubos oras, malaking abala, baka menos kita pa! Ano bah!

O, kung may mga sakay na sa mga terminal ng jeep kung walang barker, ipapasa-pasa sa mga nakaupong pasahero ang kanilang vaccination card? Hello! Naku, ha, nakakatakot ‘yan, eh, kung may sakit ang hahawak sa vax card mo?

Ikatlo, paano ninyo gagawan ng paraan ang mga pasaherong mahihirap na makapunta sa kanilang destinasyon kung wala pa silang bakuna? Aber? Mabuti sana kung 100% na nga lahat bakunado na! Ano ba namang klaseng mga naiisip na rekomendasyon ‘yan! Santisima!

Nakagawa na nga ng diskriminasyon, wala pang konsiderasyon sa mahihirap na mananakay na jeep lang ang masasakyan. Magpa-Pasko pa naman, paano na sila mamamalengke, mamamasko, at papasok sa trabaho?

IMEEsolusyon, ‘wag nang ipatupad ang kalokohang ‘yan, sa halip, ang palakasin muna at pabilisin ng husto ang vaccination drive ng ating pamahalaan, para maabot na ang target na mabakunahan lahat ng mga Pilipino.

Kapag bakunado na ang lahat, hindi na kailangan ang mga nakakapanakit pa ng damdamin na diskriminasyon sa mahihirap na mga Pinoy. Agree?