Ipantay sa suweldo ng mga nurse at pulis ang sahod ng mga guro

ni Imee Marcos - @Imeesolusyon | January 26, 2022

Sa gitna ng pagiging busy ng marami sa mga trending na balita sa pulitika sa harap ng papalapit na eleksiyon, mga kaso COVID-19, sitwasyon ng mga healthcare workers ay nagpapapansin ngayon ang ating mga guro sa kanilang sitwasyon.

Umaaray na ang mga guro bilang isa sa mga frontliners, maliit pa rin ang kanilang suweldo gayung nahaharap din sila sa mapanganib na sitwasyon ngayong may pandemya.

Ayon nga sa Alliance of Concerned Teachers, bagama’t naipatupad na ng ating pamahalaan ang Salary Standardization Law o SSL, malayo sa natatanggap nilang dagdag-sahod ang unang mga naipangakong dodoblehin ang kanilang suweldo dahil kabilang sila sa mga frontliner.

Eh, sa ganang atin, may punto ang mga guro na sagad sa buto ang paghihirap, puyat, pagod sa blended learning at lalo na ‘yung mga gurong taga-probinsiya na walang sawang gumagawa, nagpapaimprenta at naghahatid ng module ng kanilang estudyante na tumatawid ng mga ilog, bundok at kahit pa may banta ng Omicron variant.

Pasalamat na lang at pinatigil na muna ang mga naumpisahang limited na face-to-face classes at online classes sa ngayon dahil sa tumitinding banta ng Omicron variant na papahupa na rin naman daw sa ngayon ang tinatamaan dahil sa tumataas na bilang ng mga bakunado.

Nai-stress ang ating mga guro, paano nila pagkakasyahin ang kakarampot nilang sahod sa gitna ng panibagong banta ng pagtaas ng presyo ng tinapay, mataas na presyo ng isda, tumataas na presyo ng gasolina at mga serbisyo? ‘Kalokah!

Buwis-buhay na nga sila, butas pa ang bulsa, eh, sino nga naman ang hindi makukunsumi sa kanilang kalagayan. At heto nga, bunga ng kanilang desperasyon, eh, kahit sa mga mahahalal na opisyal sa paparating na eleksiyon nananawagan na sila na isulong na madoble ang kanilang suweldo.

Sa ganang atin, IMEEsolusyon na baka naman puwedeng ikonsidera ng ating gobyerno na maipantay nga naman ang kanilang suweldo sa mga nurses at pulis na tumatanggap ng Php30,000 na bagong pasok pa lang sa trabaho at ‘wag din naman sana bababa sa Php16,000 kada buwan ang suweldo ng mga non-teaching staff.

Aba, eh, kailangan nila ng disenteng suweldo para makaagapay sa mga kinahaharap na mga pagtaas-presyo ng bilihin at pangunahing serbisyo, ‘di ba?! Remember, sila ay kabilang sa mga limot nating bayani, na buwis-buhay pa bilang frontliner ngayong may pandemya.

‘Wag naman natin silang kalimutan at memenosin ang kanilang suweldo, dahil sila ang ikalawang nanay, tatay ng ating mga anak at sila ang humuhubog sa kanilang kaalaman at kahusayan sa pagtatamo ng magandang kinabukasan. Agree?!

Quarantine sa Healthcare Workers, ‘wag bawasan!

ni Imee Marcos - @Imeesolusyon | January 21, 2022

Sa pagpasok ng 2022 ngayong Enero, bumungad sa atin ang Omicron variant at sa unang mga linggo nga ay pumalo sa mahigit 30-K ang nadale ng COVID-19.

Kaya nga, nag-isyu ng Alert Level 3 ang Inter-Agency Task Force for the Management of Emerging Infectious Diseases at kaliwa’t kanan ang paghihigpit, kung saan nand’yan ang “no vax, no entry sa mga mall, no vax, no ride policy”, etsetera, etsetera, lalo na’t may dalawa nang namatay sa Omicron variant.

Pero sa pinakahuling balita sa awa ng Diyos, bumababa na ngayon ang COVID-19 cases sa Metro Manila, pero mas tumaas umano ang bilang ng nadadale sa labas ng National Capital Region (NCR).

Sa harap niyan, eh, kahit natabunan na ang usapin, gusto nating balikan ‘yung isyu na pagpapaikli ng Department of Health ng araw ng quarantine ng mga healthcare workers maging ng mga doble-bakunang indibidwal.

Kontra tayo na paikliin ang mga quarantine para sa mga medical frontliners at sa mga fully vax!

Naku, kailangan maging ‘consistent’ naman tayo, noh, kung mahigpit tayo sa mga hindi bakunado, ituloy natin ang saktong kaistriktuhan sa mga pinaiiral na mga quarantine sa mga healthcare workers na nadadale ng virus.

‘Wag tayong tumulad sa Amerika na pinaiikli na lang ang mga quarantine. Take note, may mga bakuna sa atin na wala sa listahan ng mga aprubadong bakuna sa Amerika, kaya maaaring iba ang sitwasyon sa Pilipinas.

Eh, baka naman sa pagluluwag na ‘yan, mas mapasubo sila, lalo na sa peligro at mas lumala ang sitwasyon natin, ‘di ba?! Hindi tayo dapat magmadali para lang mapabalik sa trabaho ang mga healthcare workers kahit pa marami na namang COVID-19 patient.

Walang kasiguraduhan ngayon sa bangis ng bilis nang panghahawa ng Omicron variant at kailangang armasan nating mabuti ang ating mga healthcare workers, kaya dapat siguradong oks na oks na sila bago sila pabalikin sa trabaho.

IMEEsolusyon na patapusin natin ang dating ipinatupad na haba ng quarantine ng ating mga healthcare workers para mapayapa ang ating kalooban na walang sabit o aberya sa pagbalik nila sa ospital. Sabi nga, slowly but surely! Anuman ang gawa at dali-dali ay hindi iigi ang pagkakayari.

Remember, bukod sa kanilang ibinibigay na serbisyo, palagi nating bigyang-konsiderasyon ang kanilang proteksiyon ng higit sa lahat laban sa mabangis na virus.

Kapag sila ang bumigay, mas marami ang mapeperwisyo at lalong mawawalan ng maasahan sa mga ospital. Agree?!

Isyu ng Comelec hacking, busisiin ng kamara at senado, plis lang!

ni Imee Marcos - @Imeesolusyon | January 19, 2022

Kulang-kulang apat na buwan na lang, eleksiyon na! Kaya naman, ang mga kandidato ay puspusan at kani-kanyang diskarte na sa pangangampanya kahit nasa kasagsagan pa ng pandemya.

Pero sa kabila ng kagustuhan nating magkaroon ng malinis, tapat, payapa, maayos, may kredibilidad at malayang eleksiyon na ipinu-push din ni Pangulong Rodrigo Duterte, eh, chika ng ilang Marites na may ilang lokal at dayuhang grupong gumagapang para magkaroon ng aberya ang Comelec?

Eh, ‘di ba nga, naibalitang na-hack ang 60 gigabytes ng sensitibong datos ng automated election system (AES) ng Comelec, hinggil sa mga tauhan ng Comelec, mga lokal at mga Pilipinong botante sa abroad, gayundin sa mga vote counting machine at voting precincts! Grabe, if true ‘yan!

Diyoskopo! Delikadong mauwi ‘yan sa failure of elections at magdudulot din ng krisis sa Konstitusyon kapag pinagkaitan ang 67 milyong Pinoy ng kanilang tsansang makapaghalal ng bagong pangulo, bise-presidente at Kongreso sa Mayo!

Eh, ayon sa Omnibus Election, puwedeng ideklara ang failure of elections dahil sa fraud o panloloko. Ayon din sa Republic Act 7166, ang mga dahilan para sa failure of election ay maaaring mangyari bago pa man, sa gitna ng o pagkatapos ng pagbilang ng mga balota.

Pero, tiniyak ng Comelec na ligtas pa rin ang kanilang mga server at sinigurong hindi magkakaaberya sa mismong araw ng eleksiyon! Gayunman, sa ganang atin, kung may usok ay kailangan pa ring makasiguro sa chika na ‘yan! Kaya IMEEsolusyon d’yan, bilang tayo, eh, chairman ng Senate committee on electoral reforms and people’s participation, naghain tayo ng resolusyon para imbestigahan ‘yan.

Ipatatawag natin ang Comelec, National Privacy Commission, Department of Information and Communications Technology Cybercrime Investigation And Coordinating Center (DICT-CICC), National Bureau of Investigation Cybercrime Division, Manila Bulletin, Parish Pastoral Council for Responsible Voting (PPCRV), National Movement for Free Elections (Namfrel), Legal Network for Truthful Elections (Lente), Democracy Watch, at Center for People Empowerment in Governance (CenPEG) /AES Watch.

Ang mga ahensiyang ‘yan ang magbibigay-linaw kung totoong may hacking o wala. Kailangan magkapit-bisig ng Senado at Kongreso sa usapin para hindi malusutan ng mga hackers at mapanagot din kung totoo mang may nangyaring hacking.

Hirit na rin natin sa ating mga counterpart sa Kongreso na sabayan tayo sa pagbusisi sa isyung ‘yan. Ipatawag na natin ang Joint Congressional Oversight Committee para sa Automated Election System. Kapit-bisig na tayo laban sa failure of elections!

Panawagan din nating magtulungan tayong lahat sa pagbabantay para masiguro ang malinis, tapat, mapayapa, maayos at may kredibilidad na eleksiyon! ‘Wag nating palusutin ang mga tiwali sa halalan. Tara na!