‘Wag mag-petiks sa pagtiyak ng seguridad ng mga OFWs sa Ukraine

ni Imee Marcos - @Imeesolusyon | February 16, 2022

Nagtataka tayo sa ating mga opisyal ng gobyerno, tila pepetiks-petiks at hindi kumikilos para sa mga OFWs at Pinoy migrants sa gitna ng diumanong banta ng Russian invasion sa Ukraine.

Nakaabang na ang ating mga kababayan doon kung ano ang kanilang dapat na gawin.

Aba, eh, sabi ng ating mga kababayan, ni wala pa raw ipinararating sa kanilang contingency plan sakaling magkagulo.

Tanging ang ginagawa lang daw ngayon, kinukuha pa lang ang mga pangalan ng mga gustong umuwi sakali mang matuloy ang giyera sa Ukraine.

Eh, ang tanong, paano kung bigla ngang sumiklab ang giyera, paano sila? Saka lang bibigyan ng instruction ng DFA, OWWA at mga tao natin sa pinakamalapit na Philippine embassy? Ano bah!

Take note, wala tayong embassy sa Ukraine, kundi nasa Poland pa! Bakit nga ba wala pang klarong plano? Nangangapa na ang ating mga kapwa Pilipino doon! Eh, last year pang balita ang napipintong gulo. Hello!

Halos nasa 400 Pilipino sa Ukraine. Napaisip tuloy tayo na ‘yan ba ang dahilan kaya hindi pa ganon ka-komprehensibo ang pagkakasa ng mga plano at pagkilos ngayon ng ating mga opisyal?

Juicekolord!

Hindi porke kakarampot lang ang mga kababayan natin doon, tila lelembot-lembot kayo at walang kagyat na pagkilos para asikasuhin ang kalagayan nila! Ano’ng ibig sabihin niyan, kikilos kayo kapag andyan na ang aktwal na bakbakan?

‘Wag i-underestimate ang sitwasyon. IMEEsolusyon na maghanda na ng todo para wala tayong sablay! Latagan na ng contingency plan.

Kabilang dito ang pagkakasa ng maayos na komunikasyon sa OFWs, lugar kung saan sila tatakbo para pik-apin at ililikas, badyet sa kanilang masasakyan sa paglikas.

Gayundin, ikasa na ang safety health protocols oras na makauwi na sa ‘Pinas at transportasyon na rin pauwi sa kani-kanilang mga bahay.

Bago pa man sumiklab ang giyera sa Ukraine, agapan na rin natin ang impact nito o epekto sa ating ekonomiya, dahil siguradong sisirit ang presyo ng langis sa world market.

IMEEsolusyon na manmanan ng ating pamahalaan ang presyo ng langis at ikonsidera na taasan ang ating reserba, sa harap ng tinatayang pagsirit sa $120 dolyar kada bariles mula sa $90 hanggang $95 dolyar ngayon. Dapat din na matukoy na agad ang mga alternatibo nating pagkukunan.

Mas maigi nang maging maagap sa paghahanda, kaysa naman magkumahog at mataranta kapag nasa peligro na ang buhay ng ating mga kababayan at mahuli sa paghahanda sa dagok nito sa ating ekonomiya. Kaya plis DFA, OWWA, mga opisyal ng ating pamahalaan, kilos na agad, Now na!

Mga lokal na isda, protektahan at tangkilikin; importasyon, gawing huling opsiyon!

ni Imee Marcos - @Imeesolusyon | February 14, 2022

Sermon ang inabot sa atin ng Department of Agriculture (DA) at Bureau of Fisheries and Aquatic Resources (BFAR) sa pagdepensa sa importasyon ng 60,000 tonelada ng isda hanggang Marso ng taong ito.

Hindi kasi nila pinakinggan ang mga lokal nating mangingisda at National Fisheries and Aquatic Resources Management Council o NFARMC na hindi kailangang mag-angkat dahil nga sapat ang suplay ng isda! Ano bah!

Sandamakmak ang kuwestiyon natin sa fish importation na ‘yan, kamakailan lang sa pagdinig sa Senado. Una, sa usapin na mga coop na naman, na walang kakayahan ang mag-i-import ng milyun-milyong dolyar na isda, na certified importer daw?! ‘Di ba, ginamit din ng mga hamak na coop sa pagpasok ng bigas, bawang atbp.?

Paano ba maging importer? Bakit may mga “suki” ang DA mula pa January 2021 na may supply na agad — matagal ng may stock o na smuggle na? Pharmally na naman ba ito?

Naku, ha? DA Sec. Willie, uwi na dali! I-chika mo ang mga matitino mong dahilan! Bakit absent ka sa hearing!

Juskoday!

Hmmm… Napapaisip tuloy tayo kung nakaka-proud nga ba na inirekomenda natinsi DAR sa kanyang puwesto, eh, ang alam lang pala, magpapalamon sa mga dambuhalang importer at smuggler? Hay naku, Ginoong Willie, sikat ka raw sa abroad dahil sa husay mo sa tungkulin, eh, talaga ba?! Weh, ‘di nga?!

Valentine’s na. At isa sa mga loves natin ang ating mga lokal na mangingisda. Kaya bilang chairman ng Senate committee on economic affairs, IMEEsolusyon para mapatatag ang supply ng isda. Una, paikliin ang closed fishing season o buksan ng maaga at iwanang bukas sa mga commercial fishers sa mga lugar na kapos ang supply.

Ikalawa, tulungang ipa-barko ang suplay ng isda mula sa Mindanao hanggang Luzon at Visayas; repasuhin ang mga pamumuhunan sa mga ginagamit na pasilidad matapos ang bawat ani tulad ng blast freezing at cold storage, gayundin ipagamit na ang 60% na paupahan sa mga fishpond.

Ikatlo, dapat nang amyendahan ang Fisheries Code para di makapag-angkat ang DA ng walang permiso ng NFARM at kailangang bawiin na ang mga certificate ng importasyon, ‘di bah!

Panghuli sa tingin natin, ha? May basehan ang mga mangingisdang Pinoy na kasuhan ng agricultural sabotage at technical smuggling ang DA, BFAR, Bureau of Customs at Philippine Fisheries Development Authority.

Okay lang ang mag-import kung talagang kapos na sa pagkain at wala nang ibang remedyo, pero huling hakbang na dapat ‘yan. Prayoridad na protektahan natin ang sariling lokal na mga produkto, ang ating mga lokal na mangingisda, para mapatatag natin ang presyuhan ng mga pagkain sa merkado! ‘Ika nga, we love our own! Agree?

P1-M multa at 6 yrs. pagkakakulong sa magtatapon ng COVID-medical waste sa maling lugar

ni Imee Marcos - @Imeesolusyon | February 11, 2022

Shocked tayo sa ulat na may walong batang nagpositibo sa COVID-19 matapos maglaro sa tabing-dagat, kung saan itinapon ang mga medical waste sa Catanduanes! ‘Kalokah!

Hay naku, nakakairitang kapabayaan ang ganyan na kung saan-saan na lang itinatapon ang mga nagamit nang syringe, facemasks, antigen test kits, lagayan ng dugo at ihi, at PPEs, ano bah?!

Eh, anong saysay ng pag-iingat nating lahat na gumamit ng mga PPEs, facemask para maiwasan ang mga hawahan ng virus, kung tayo rin mismo ang dahilan para kumalat ito dahil sa mga basurang ‘yan?! Juicekolord!

Ano ba namang klaseng diagnostic center ‘yan sa Catanduanes, ano bang kaisipan meron ‘yan na malakas ang loob na magtapon ng hazardous waste sa baybaying-dagat?

Bakit nakalulusot ang mga ganyan? Santisima!

‘Wag namang pasaway! Kapag nagtapon tayo ng mga COVID-medical waste sa hindi tamang lugar, tayo, pamilya natin o kamag-anak o kaibigan natin ang madadale at magkakasakit! Naku, kay tatanda na natin, wala pa ring disiplina! Saka, wala ba kayong malasakit sa kalikasan?

IMEEsolusyon sa matitigas ang ulo at lumalabag sa batas sa tamang pagtatapon ng basura, sampolan agad ng kaso at parusa ng mga barangay o mga LGUs. Lagyan ng ngipin ang pagpapatupad sa mga batas o polisiya!

Alinsunod sa Republic Act 9003 o ang Ecological Solid Waste Management Act of 2000, inaatasan ang mga local government units o LGU sa wastong pagkolekta, recycling at pagtatapon ng mga basura, lalo na ang mga nakalalason at hazardous medical wastes.

At ang mga pasaway na hindi marunong magtapon sa tamang lugar ng medical waste at lalabag sa Sec. 48, pars. (14), (15) and (16), ay mumultahan ng P100,000 hanggang P1,000,000 at maaari rin mabilanggo ng isang taon hanggang anim na taon.

O, hayan ang mga parusa, ha? Harinawa’y wala nang maglalakas-loob at matigas ang ulong walang patumanggang magtatapon ng medical waste kung saan-saan lang!

Sa paglaban sa pandemya, bawat isa sa atin may responsibilidad at pananagutan, mapa-indibidwal man at institusyon, tulad ng mga ospital at diagnostic center. Hindi huhupa ang COVID-19 ng ganun lang kung hindi tayo magtutulungan!

Kaya plis, ‘wag na tayong maghintay na makasuhan pa, kusang loob na tayong mag-ingat at maging responsable para hindi na kumalat pa ang nakamamatay na virus na sumira hindi lang sa buhay ng mga Pilipino kundi sa buong mundo. Agree?