Non-wheat flour na alternatibo sa trigo sa paggawa ng tinapay, i-gora na!

ni Imee Marcos - @Imeesolusyon | March 7, 2022

Tulad ng ating pangamba mula nang sumiklab ang giyera ng Russia at Ukraine, taas-presyo sa mga bilihin at krisis sa pagkain ang dulot nito, lalo na’t supplier pa naman natin ang Ukraine ng trigo na sangkap ng harina.

Biruin n’yo naman, sumirit sa 73% ang presyo ng trigo sa ‘trading’ nitong Byernes, kung saan mula sa dating $7.80 kada bushel pumalo na sa $13.50 dahil sa giyerang Ukraine at Russia, kaya ang resulta niyan, tataas na rin ang presyo ng trigo sa merkado, kung saan tayo umaangkat.

Tengga rin ang kanilang pagsu-supply ng trigo sa iba’t ibang bansa at tigil din ang pagtatanim ng Ukraine. At dahil d’yan, nakabababahala na kapag naubos ang imbak nating trigo, paano na lang tayo?

At dahil sa imported na trigo umaasa ang ating mga kababayang flour miller, siguradong lalaki rin ang kanilang gastusin sa produksiyon nito na tiyak ipapasa rin nila sa mga gumagawa ng tinapay at mga mamimili, dagdag-gastusin din ang mataas na presyo ng LPG! ‘Kalokah!

Paano na lang ang mga nagtitipid na mga Pinoy na nagmemeryenda ng tinapay at inuulam ang noodles kapag sumirit ng husto ang presyo ng harina dahil sa napakamahal na trigo? Juicekolord!

Bilang chairman ng Senate committee on economic affairs, nakikita nating IMEEsolusyon na maghanap na muna tayo ng alternatibong supplier ng trigo at isa ritong puwede ang China.

Makihati na muna tayo sa supply ng China na malapit sa atin, lalo na’t inalis na nito ang restriksiyon sa mga ini-export ng Russia.

Pero take note, kailangang plantsahin na muna natin sa kanila ang presyuhan sa trigo habang naghihintay pa tayo sa mas inaasahang supply sa U.S. at Australia, ‘di bah!?

IMEEsolusyon din ang non-wheat flour bilang alternatibo sa trigo sa paggawa ng tinapay at para maiwasan nating umangkat sa Thailand at Vietnam ng mga non-wheat flour, magtanim na rin tayo at mag-ani ng sarili nating mga tanim, tulad ng bigas, kamote, patatas at munggo.

‘Wag na nating isnabin ang potensiyal ng mga non-wheat flour sa paggawa ng tinapay, lalo na’t napatunayan na ‘yan at ginamit na sa iconic Nutribun na super masustansiya!

‘Yan ang isa sa makatutulong para mabawasan ang pagtaas ng presyo ng tinapay at sa kagutumang dinaranas ng ating mahihirap na mga kababayan! Agree?!

Fuel subsidy, ‘wag na pakiyeme-kiyeme!

ni Imee Marcos - @Imeesolusyon | February 28, 2022

Bakit hanggang ngayon, wala pa talagang eksaktong petsa ang ating mga kasamahan sa gobyerno sa paglalabas ng fuel subsidy sa sektor ng agrikultura at transportasyon, gayung nagtataasan na ang mga bilihin at langis dahil sa giyera ng Ukraine at Russia?

Eh, ano’ng petsa na? Ano pa ba ang hinihintay, Pasko? Santisima! Eh, sumisirit na ang presyo ng langis at magma-Marso na, tiyak na ang matinding epekto nito sa ekonomiya at sa ating mga pang-araw-araw na gastusin!

Ang dami nang nakiusap sa mga ahensiya ng gobyerno na ilabas na yang fuel subsidy.

Kailan ba talaga ‘yan ibibigay? Jusko, aanhin pa ang damo pag patay na ang kabayo?

Puwede bang isapinal na ng Department of Agriculture ang mga patakaran sa paglabas ng ayuda sa mga magsasaka at mangingisda dahil P500 milyon ang nakalaan d’yan.

Sa ilalim ng Special Provision No. 8 ng ating 2022 national budget, pwedeng maglabas din ang gobyerno ng P2.5 bilyong pang-fuel subsidy para sa mga tsuper ng pampublikong sasakyan, taxi, traysikel, pati na rin sa mga nagmamaneho ng mga delivery services.

‘Wag nang hintayin pa ng Department of Budget and Management ang Abril para sa paglalabas ng subsidiyang ‘yan! Eh, ngayon nga iniipit na ang Russia na isa sa pinagkukunan natin ng supply ng langis.

At baka mabawasan pa ang supply sa Middle East kung dagsain ito ng mga taga-Europa.

Ayon sa mga eksperto, ngayong pumalo na sa $100 ang krudo, mananatili sa ganitong lebel ang presyo dahil balak ipitin ng U.S. at ng mga taga-Europa ang ekonomiya ng Russia sa halip na magpadala sila ng mga sundalo at armas sa Ukraine.

Hay naku, siguradong tataas na naman ang presyo ng pagkain at iba pang bilihin. Kaya IMEEsolusyon, bumili na tayo ng mas murang langis sa China o Russia. Nariyan din ang iba pang oil supplier tulad ng Venezuela at mga bansa sa Africa. Kasi nga ang target natin eh makabili ng marami hindi lang para siguraduhin ang pang araw-araw na konsumo kundi pati na rin ang ating reserba, agree?

Tulad ng nauna na nating nabanggit, eh, dahil may krisis na sa gasolina, bawas-bawasan na ang paggamit nyan. Sampol na lang itong ginagamit namin sa Ilocos Norte na mga windmill at solar panels, ‘di ba nga successful naman?

Panghuli, puwede namang makipagtulungan ang Pilipinas sa ibang bansang oil at gas explorer na tulad ng China, Japan, Australia at New Zealand, basta ba masisiguro nating makapaghihikayat ang alok nating sistema sa pagbubuwis sa mga foreign investor.

Kailangan na talagang tutukan ang pagpaparami ng reserbang langis at paigtingin ang paggamit ng tinatawag na renewable energy mula sa hangin at sikat ng araw. Now na!

OFWs, gawing mala-girl scout at boy scout ng gobyerno sa bawat krisis sa abroad!

ni Imee Marcos - @Imeesolusyon | February 25, 2022

Sandamakmak ang mga pagsubok na dinaranas ngayon ng ating OFWs. At ilan dito ay ‘yung sigalot ng Russia at Ukraine at ang sinasabing mga nagka-COVID-19 na OFWs sa Hong Kong na tinerminate ng employer ang kanilang mga kontrata.

Nakaabot nga ang balita sa ating tanggapan na walang matuluyan ang mga may COVID-19 na OFWs dahil pinaalis sila ng kanilang employer. Pero, sabi ay fake news na pagala-gala na lang sila sa mga parke at plaza sa Hong Kong? Ano ba talaga?

Ayon naman sa DOLE, OWWA, POEA, OWWA, nasa proseso na ang pagtulong sa mga nagka-COVID-19 na OFWs sa Hong Kong. Mula sa pagpapalikas sa kanila, tulong-pinansiyal at posibleng pagpapadala ng medical team ng ‘Pinas sa HK. Naku, bakit pa pinag-aaralan, dapat gora na ASAP!

Pansin lang natin, mula nang maging senadora ang inyong lingkod, madalas na nakararating sa ating tanggapan ang hinaing na atrasado ang kilos at tulong ng ating mga opisyal ng gobyerno sa iba’t ibang kinahaharap na krisis ng ating OFWs abroad.

Hay, wala pa kasi tayong Department of OFWs na tututok d’yan dahil pinoproseso pa at wala pang sapat na datung!

Sa harap ng mga nare-recycle na problema ng OFWs sa abroad, nakikita nating IMEEsolusyon ang paglalatag ng listahan ng mga posibleng krisis o problemang kanilang kaharapin, kaakibat ang mga kaukulang hakbang o solusyon na puwede nilang gawin.

Tulad ng problema at solusyon sa diskriminasyon, hindi nasuwelduhan, hinarass o minaltrato ng amo, etsetera-etsetera.

Kabilang sa mga puwede ilatag na solusyon ang pagbibigay sa OFWs ng mga listahan o pangalan ng mga opisyal ng gobyerno na agad nilang mahihingan ng mga tulong at paglalatag ng mga lugar na kanilang tatakbuhan o pagkakanlungan sa oras ng peligro.

Dapat din magkaroon ng ‘OFWs Hotline’ sa bawat embahada ng Pilipinas abroad na 24/7 na may sumasagot at hindi answering machine lang. Dapat obligahin ang OFWs na kabisaduhin ito o mailista bago pa sila ma-deploy sa kani-kanilang amo.

Dapat ding maglagay ng opisyal na ‘OFW Website o FB page’ sa bawat bansa kung saan 24/7 na makokontak at madali nilang mahihingan ng tulong ang mga opisyal ng embassy o konsulada.

Dapat ding mailagay dito ang contact number na madaling matatawagan ang mga opisyal o tauhan ng OWWA, POEA at DOLE.

Darami pa ang mga krisis sa abroad at uulan pa rin ang problema ng mga OFW. Ang tanong, palagi na lang ba tayong magkukumahog kung kailan nasa peligro na talaga ang buhay nila?

Pero kung gagawing mala-girl scout at boy scout ang OFWs at 24/7 alerto ang ating mga opisyal ng gobyerno na may maayos na koordinasyon sa iba’t ibang bansang may migrante at manggagawang Pinoy, madaling lapitan at madaling makontak, kahit ano pang bagyo ang harapin ng mga Pilipino sa abroad, malulusutan nila. Agree?