Sa mahal na gasolina, mag-commute paminsan-minsan, mag-motor, mag-bisikleta, maglakad

ni Imee Marcos - @Imeesolusyon | March 16, 2022

Heto na naman ang super bigtime oil price increase. Santisima! Sobrang taas na ng bilihin, mas tataas pa dahil sa pagsirit ng mga produktong petrolyo.

Abah, eh hindi biro ang pagsipa ng presyo mula sa kada litro ng diesel na P12.20 hanggang P12.30, P7 sa kada litro ng gasoline, at mula P9.70 hanggang P9.80 sa kada litro ng kerosene!

At mas nakakapangamba ang pagtaya ng Department of Energy na posibleng sumipa sa isandaang piso ang presyo ng gasolina sa susunod na linggo kapag 'di pa rin humupa ang pagtaas ng presyo ng krudo sa world market dahil sa krisis sa Ukraine.

Pambihirang buhay ito, eh wala nang makakabiyahe n'yan lalo na 'yung mga namamasada ng mga pampublikong mga sasakyan! Juicekolord, saan na tayo pupulutin dahil tiyak na ang epekto nito ay mas pagtaas pa ng presyo ng mga bilihin.

Eh, baka rin matengga na lang ang karamihan sa ating mga kababayan sa kani-kanilang bahay dahil 'di na keri ang makapagpakarga ng super-mahal na gasolina! Paano na 'yung mga pumapasok? Juskopo!

IMEEsolusyon sa napakamahal na gasolina, abah, eh magtipid-tipid na tayo 'pag may time. Lahat ng klaseng pagtitipid lalo na 'yung sa mga nagtatrabahong may mga sasakyan. IMEEsolusyon, na kaysa parati tayong naka-kotse, paminsan-minsan mag-commute naman! Mag-jeep, mag-bus o mag-MRT! Ganyan talaga para makatipid no!

O kung meron naman kayong mga motorsiklo, eh mas 'di hamak na makakamura dito kesa kotse at mas mabilis pa ang biyahe, basta siguruhin lang na maingat kayong magmaneho. Eh, kung uubra ba naman ang mga e-bikes eh bakit hindi, gamitin na 'yan!

At 'yung mga malalapit naman ang mga papasukan, abah, eh ano pa nga ba ang ginagawa ng mga bisikleta! Nagawa na natin ito noong may pandemya di bah! Oh di ibalik natin! Mamisikleta na at naka-exercise na, nakatipid pa!

Pakiusap po sa mga LGUs na pakiayos na lang po ang mga bicycle lanes sa mga nasa highway. Kung wala pa eh plis lagyan n'yo naman po at pati barandilya na para na rin sa kaligtasan ng ating mga kababayan na namimmiskleta. Remember, noong kapanahunan ng aking tatay na si Apo Marcos, abah eh may kasabihan, sa ikauunlad ng bayan, bisikleta ang kailangan!

At para naman sa mga malalapit ang mga lugar na pinapasukang trabaho, abah eh maglakad na lang tayo! Naka-exercise ka na, nakatipid ka pa! Pero magbaon na po tayo ng ekstrang damit, pamunas ng pawis, at sabon na panghilamos. Di bah!

At isa pang IMEEsolusyon eh 'yung sistemang work-from-home dahil sa pandemya, eh ituloy-tuloy na muna natin 'yan habang pataas nang pataas ang presyo ng gasolina. Nakakatipid na sa pasahe, nakakaginhawa pa at maiiwasan ang pagsisikip ng daloy ng trapiko sa mga lansangan.

Itodo na natin ang lahat ng katipiran sa mahal na presyo ng gasolina! Tiyaga-tiyaga lang muna tayo habang may krisis, para naman ang matitipid natin sa gastusin sa gasolina, eh mailaan na lang sa pangkain at iba pang pangangailangan sa ating pamamahay! Di bah!? Basta katipiran, gayahin kaming mga Ilocano! Agree?!

Super nakaka-proud ang mga madiskarteng nanay

ni Imee Marcos - @Imeesolusyon | March 14, 2022

'National Women's Month' ngayong Marso. Bilang isang babae, proud ako na ipagmalaki ang nakararaming mga babae na walang kasing tibay sa mga pagsubok nitong pandemya. Pero muli na namang nahaharap sa malaking hamon ng krisis dulot ng giyera ng Ukraine at Russia.

Matapos ang halos dalawang taong hamon sa kakayahan ng mga kababaihan partikular ang mga ina ngayong may pandemya, nahaharap na naman sa panibagong pagsubok ngayong krisis dulot ng nasabing giyera.

Mas malaki ngayon ang papel ng mga kababaihan sa gitna ng krisis sa langis, sa mataas na presyo ng mga bilihin, at sobrang taas ng gastusin na ang badyet ay halos 'di na malaman paano na pagkakasyahin. Juskolord!

Sa gitna n'yan, pinakamagandang katangian ng mga kababaihan na 'di matatawaran ang pagiging pasensyosa, matibay ang dibdib at malakas ang loob, madiskarte sa mga hamon ng hirap ng buhay. Si nanay, ang mahusay sa badyetan sa bahay.

May nakilala tayong isang buntis na malapit nang manganak, ang asawa niya ay guwardiya na may kakarampot lang na suweldo. Lima ang kanilang anak. Ang tanong natin, paano nila pinagkakasya ang kanilang pagkain sa araw-araw? Lalo na't tumaas na naman ang presyo ng bilihin?

Ang sabi ni mister, maging siya ay namamangha paano sila nakakakain nang tama at napagkakasya ang ibinibigay niyang panggastos na P200 sa bawat araw.

Nalaman natin na sa 200 piso, tig-singkwenta pesos ang ibinabadyet niya sa bawat kainan, sa almusal, pananghalian at hapunan. Nagulat pa siya na may sobrang singkwenta?! O 'di ba bongga?

Nadiskubre ni mister na may pamamaraan pala si nanay para kumita kahit buntis at tadtad ng gawain sa bahay. Una, kapag tapos na sa pagluluto, paglalaba, naihatid sa eskuwela ang mga anak na pumapasok na at nag-o-online class ang iba, tumatanggap pala siya ng plantsahin mula sa mga kapitbahay.

Hindi lang 'yan, tinatawag din pala siya ng kanilang mga kapitbahay na gustong magpalinis ng kanilang mga bahay. Biruin n'yo 'yun, buntis na, sobrang sipag pa. At ang pinaka-klasik, eh nagagawa pang mag-online selling kapag ang oras ay bakante na! Ang galing 'di bah?!

Pinaka-kahanga-hanga ay 'yung ang kinita niya ay itinatabi pa ni nanay para magamit sa oras ng pangangailangan, at ang iba nama'y iniipon niya sa kanyang panganganak. 'Yan si Super Nanay! Ang babaeng IMEEsolusyon na nakaka-proud ang diskarte ngayong may krisis!

Dagdag pa niyang IMEEsolusyon ang pag-aalaga niya ng mga manok at pagtatanim ng mga gulay sa kanilang bakuran. Oh 'di bah, 'yan ang diskarte, katiyagaan ng mga babae, may krisis man o wala tunay na matibay at maaasahan na katuwang ng mga mister sa buhay!

Kaya kumpiyansa tayo, na dahil sa maraming babaeng katulad n'yo at katulad nating lahat, walang mahirap na 'di natin kakayanin lalo ngayong palala nang palala ang krisis at kahirapan na ating kakaharapin. Mabuhay ang mga kababaihan!

Price freeze muna sa pagkain; hoarders at fake shortage, bantayan!

ni Imee Marcos - @Imeesolusyon | March 8, 2022

Heto na naman tayo at nahaharap sa mas matinding krisis dahil sa giyera ng Russia at Ukraine. Grabe ang pagsirit ng presyo ng langis sa pandaigdigang pamilihan na nasa $120 hanggang $125 na kada bariles, samantalang wala pang $80 pagpasok ng 2022.

Tulad ng inaasahan, domino-effect nito ang inaasahang pagtaas pa lalo ng presyo ng mga bilihin, Juskoday! Kaya naman, pihadong may mga abangers na negosyante na posibleng magsamantala at mag-overpriced.

Kahit pa sabihin ng Department of Trade and Industry (DTI) na manufacturer pa lang ng sardinas ang humirit na itaas ang presyo nito dahil sa mataas na presyo ng isda at hindi dahil sa giyera sa Silangang-Europa, kailangan na rin maging mapagbantay at maagap sa pagkakasa ng mga hakbang.

Aba, eh, kahit pa sabihing sapat ang suplay ng mga pangunahing bilihin sa atin sa ngayon, marami pa ring buwitre na nakaabang para mag-hoard ng mga paninda at magdedeklara ng pekeng shortage, ‘di bah?! Hay naku, kabisado na natin ang galawan ng mga ganyang walang patawad na negosyante!

Kaya para sa mga kababayan nating lalo pang nalugmok sa kahirapan, IMEEsolusyon na ilabas na ng DTI habang maaga pa ang mga SRP o suggested retail price ng pagkain at iba pang pangunahing bilihin.

Ikalawa, plis, makibantayan at magsagawa ng surpresang inspeksiyon sa mga pangunahing palengke at mga grocery ang DTI para makasigurong hindi nag-o-overprice at mabalaan na rin sila, ‘di bah?

Tulad din ng pakiusap ng maraming sektor, ang inyong lingkod bilang chairman ng Senate committee on economic affairs, eh, umaapela sa mga manufacturers ng pagkain at iba pang pangunahing bilihin na ‘price freeze’ muna tayo, plis, o hinay-hinay lang ang paghingi ng dagdag-singil.

Kapag nagtuluy-tuloy ang hindi makontrol na pagtaas ng langis dahil hindi pa natatapos ang giyera ng Russia at Ukraine, lalo pang lalala o titindi ang kagutuman sa ating bansa. Paano na lang tayo niyan?

Bawat singko ngayon ay mahalaga kaya siguraduhing nagagamit sa tamang paggastos ang bawat sentimo. At take note, importante na lang muna ang bilhin! Habang may krisis, ngayon mas kailangang-kailangan ang matinding paghihigpit-sinturon. Agree?!