Mga paluging ibinebentang sibuyas, bilhin na ng gobyerno; onion farmers, ayudahan ng cold storage

ni Imee Marcos - @Imeesolusyon | April 13, 2022

Nakakaalarma na sa gitna ng matinding dagok ng mataas na presyo ng gasolina, presyo ng mga bilihin at pandemya, heto naman ngayon ang panibagong kinakaharap nating problema.

Palugi nang ibinebenta ang mga sibuyas ng ating mga magsasaka sa Occidental Mindoro, Central at Northern Luzon, at iba pang mga lugar sa ating bansa.

Umaaray ang ating onion farmers dahil sa bumagsak na sa P6 kada kilo ang presyo ng lokal na sibuyas. Angal nila eh kakumpetensya kasi ng mga imported na sibuyas ang kanilang lokal na ani.

Aminado si Mayor Romulo Festin ng San Jose, Occidental Mindoro na nakaimbak na lang talaga ang mga lokal na sibuyas at wala na halos bumibili o 'di na maibenta pa at pinag-iisipan na nilang magdeklara ng State of Calamity sa kanilang lalawigan. Nasa 17 barangay sa kanilang lugar ang apektado ng bagsak na presyo ng sibuyas.

Problema pa, walang sariling imbakan o cold storage ang mga magsisibuyas dahil wala silang sapat na pera.

Para mabenta ang mga inaning sibuyas, nakikipagtawaran na sila sa mga 'barat' na 'trader' na may sariling mga 'cold storage' para mabenta lang ang kanilang mga sibuyas.

Talagang aasa to the max na lang sila na mabilhan ng mga trader lalo na't wala silang sariling mga sasakyan o walang panggastos para sa maghahatid ng mga inaning sibuyas direkta sa mga palengke at iba't iba pang karatig lalawigan na puwede nilang suplayan nito.

Bukod d'yan, problemado rin sila sa pananalasa ng mga insekto sa mga taniman ng sibuyas na halos hindi na rin nila naaani dahil sa wala silang mapag-imbakan!

Santisima, samut-sari ang problema ng ating onion farmers, paano na lang sila?

Kawawa!

IMEEsolusyon natin tugunan ang hinaing ng mga lokal na lider na bigyan ng mga cold storage facilities ang mga magsasaka para 'di mabulok ang kanilang ani. Plis, Secretary Dar, simulan na natin sa ating mga magsisibuyas.

IMEEsolusyon din na mismong gobyerno na ang bumili sa kanila ng mga sibuyas at 'wag nang ipadaan pa sa ilang mga ganid na trader na nagagawa pang magsamantala sa mga lugmok nang magsisibuyas!

Ikatlo, ang 'UNLI' nating pakiusap sa Department of Agriculture, na plis rendahan n'yo naman ang importasyon ng mga agri-products. Harangin ang mga sobra-sobrang pag-aangkat ng mga agri-products na tulad ng sibuyas! Sa ngayon nakikita natin na 'di na kailangan ngayon ng onion importation!

Sang-ayon ako sa ilang nasa LGUs na nagsabing isang uri ng pananabotahe sa ating ekonomiya ang sobra-sobrang importasyon ng mga produktong pang-agrikultura, na pumapatay sa mga lokal nating mga produkto.

Agapan na natin ang pagbibigay-ayuda sa ating mga onion farmers at iba pang magsasaka. Kung may paghuhugutan pa naman ng pondo, Secretary Dar, baka puwedeng gora na sa direktang pagbili ng gobyerno sa mga produkto at gobyerno na rin ang magbenta nito sa mga pale-palengke, di bah?!

Bagong midnight deal sa importasyon ng asukal, boljakin!

ni Imee Marcos - @Imeesolusyon | April 9, 2022

Ano na naman itong napaulat na hirit na importasyon ng asukal? Hindi na ba tayo nadadala? Kahit ano pang importasyon ang gawin natin hindi naman ito nakakaibsan ng kahirapan ng ating mga kababayan di bah?!

Bakit ba meron na namang midnight deal sa importasyon ng asukal? Abah napakarami ha, 350,000 metriko toneladang asukal?! Que horror! Ang tanong, talaga nga bang kapos na kapos na tayo ng asukal? Ano bah!!!

Umaandar na naman ang utak-importasyon natin n’yan eh. Mr. Agriculture Secretary William Dar, please naman ‘wag mo sanang kampihan at pirmahan ang hirit ni Sugar Regulatory Administration chief Hermenegildo Serafica! Por Diyos por Santo, mag-se-Semanta Santa na kung hahabol pa ang kabalbalang ito ng importasyon.

FYI, Mr. Serafica, hindi mo man lang ba naiisip ang ating mga kababayang mga sugar workers? Matindi ang tama n’yan sa kanilang kabuhayan! Malaking dagok na nga ang hinaharap nila sa epekto ng napakamahal na abono, pandemya, mga kalamidad, giyera ng Ukraine at Russia, daragdagan n’yo pa ang kanilang pasanin?

Bakit ba import nang import ng mga produktong pang-agrikultura, ang dami nang epiko nang kapalpakan ito at mga magsasaka natin, mangingisda, magbababoy, at sugar workers ang nasasakripisyo parati!

IMEEsolusyon naman na bago magdesisyon at magpatupad ng mga ganyang importasyon na konsultahin naman ang naturang mga sektor. Ikalawa, alamin kung totoo talagang kapos o pini-peke lang at mini-midnight express ang pag-aangkat para sa pakinabang ng iilan!

Ikatlo, siguraduhing ipaprayoridad na mabenta ang mga lokal nating mga produkto bago ang mga imported! Hindi tayo aasenso sa utak-importasyon! Gusto ba nating tuluyan nang mawala ang ating lokal na mga produkto? Puro imported na lang?

Matindi ang epekto n’yan hindi lang sa sektor ng mag-aasukal kundi sa lahat ng mga mahihirap nating mga kababayan at ng ekonomiya ng ating bansa sa kabuuan! Plis, bago magpasya, siguraduhing walang masasagasaang sektor sa ating bansa. Magtika nang mabuti sa Semana Santa, para makapag-esep-esep nang tama! Agree?

Mga dam, kailangang nang i-rehab

ni Imee Marcos - @Imeesolusyon | April 6, 2022

Sobrang init! ‘Yan ang daing ng marami nating mga kababayan lalo na't summer time na talaga ngayon. At siguradong sa sobrang init ng panahon, mas mabilis na bababa ang lebel ng tubig sa mga dam at ‘di malayong magdulot ito ng tag-tuyot sa mga palayan at mga taniman!

At sa usaping dam, kung sa ngayon eh 191 meters ang level ng tubig sa Angat dam, abah eh bago pa magsimula ang susunod na administrasyon ay siguradong aabot sa critical level na 180 metro kung walang ulan.

Eh ang Angat dam pa naman ang pinagkukunan ng supply ng tubig ng nasa 12 milyong mga taga-Metro Manila at irigasyon sa mga magsasaka sa Pampanga at Bulacan. Paano na lang yan?!

Mukhang kinakailangan na nating magsagawa ng 'rain dance' tulad ng mga ginagawa ng ating mga katutubo, hmmm. Nakakapag-alala kasi nga eh talagang dapat sana eh may mga pag-ulan dahil sa pagtaya ng PAGASA na may mahabang La Niña, di bah?

Kaya ngayon eh nagkukumahog ang ating mga awtoridad sa cloud seeding at nakakasa na rin ang mga pagrarasyon ng tubig at posibleng hindi na lang sa gabi magrasyon ng tubig kundi aabot pa ito sa araw! Hay apo, mahabaging Diyos!

'Yang cloud seeding at pagrarasyon ng tubig, pansamantalang pansalo ang mga ‘yan. IMEEsolusyon natin sa nagbabadyang mga tag-tuyot eh ‘yung ating susunod na administrasyon na kahit nahaharap sa kakapusan ng badyet, kinakailangang palakasin ang pamumuhunan sa mga maliliit na ‘water impounding system’ na mag-iimbak ng mga tubig-ulan sa panahon ng tag-ulan.

Ang mga ito ay mga dam na hindi lalampas sa 30 metro ang taas at may kakayanang mag-imbak ng nasa 50 milyong metro-kubikong tubig. Eh kahit ang mga nagsasaka sa mataas na lugar ay makikinabang dito.

Take note, ayon sa PAGASA, mas mababa lang sa 10% ang naiimbak nating tubig-ulan dahil karamihan sa mga ito eh dumadaloy papuntang karagatan.

Kaya need din natin talagang magkaroon ng pasilidad para sa 'rainwater harvesting.’

Reminder hindi lang pang-irigasyon sa mga palayan, mga palaisdaan o sanitasyon ng kalunsuran o mga paglilinis ng mga kotse at iba pa magagamit ang mga naimbak na tubig sa 'rain harvesting facilities' kundi makababawas din ‘yan sa pagbaha sa panahon naman ng tag-ulan, di bah?!

IMEEsolusyon din natin na maawa naman tayo sa ating mga lumang dam na tulad ng Angat, Pantabangan, at Magat, plis isailalim din natin ang mga ‘yan sa rehabilitasyon para mapakinabangan pa nang husto ng mga susunod na henerasyon.

Abah eh ni kahit isang rehab ‘di nakatikim ang mga nasabing dam gayong noon pang 1967 hanggang 1983 pa yan binuksan. Susmaryosep! Masyado tayong naging kampante.

IMEEsolusyon natin sa krisis sa tubig, matuto rin tayong magtipid o iwasang mag-Asyong Aksaya! Di bah! I-recycle natin ang mga tubig. ‘Yung mga pambanlaw na tubig sa paglalaba, puwede rin nating gamitin na pang-mop ng sahig o ipandilig o ibuhos sa banyo! Para-paraan lang ‘yan! Agree?!