‘Pinas, walang panama sa mga armas pandigma, ‘wag utak-giyera

ni Imee Marcos @Imeesolusyon | November 6, 2023

Magkakasunod na ang show of force ng ating friendship na China sa teritoryo natin sa West Philippine Sea.

‘Di pa rin tinatantanan ang pambu-bully sa ating mga Phil Coast Guard at Philippine Navy. Abah at nadagdag pa ‘yung isa nating airplane na binuntutan daw kamakailan?!

Nakita naman noong isang araw na mahigit isandaan o 135 to be exact ang nagkukumpulang mga Chinese militia vessels sa bisinidad ng Julian Felipe Reef sa West Phil Sea. Jusmio!

Iba na itetch ha, nakakabahala na. Friendship natin ang China, at naniniwala pa rin naman ako na mapag-uusapan pa rin ‘yan.

Marami na tayong mga kababayan lalo na ang ating mga kasundaluhan at hukbong katihan na gigil na ha at gustung-gusto nang pitikin ang mga Chinese vessels na ‘yan.

Pero ooopsss mga kababayan, walang magandang ibubunga sa ‘tin na maging marahas dahil sa bugso ng damdamin.

Kahit ganyan na ang sitwasyon mga kababayan, preno pa rin tayo.

IMEEsolusyon na idaan pa rin ‘yan sa mabuting usapan o talakayan.

Katunayan nga ako mismo, ang inyong senadorang Super Ate, isusugo ko ang aking sarili para kausapin ang ating counter-part sa China.

IMEEsolusyon na gamitin na lahat ng paraan, sa ganang akin, hinding-hindi tayo dapat maging utak-giyera. Ayaw ko n’yan at alam kong ayaw n’yo rin!

Saka aminin na natin wala tayong panama sa mga armas pandigma ‘di bah?!

Kahit naman ‘di tayo makikigiyera, its about time na buhusan talaga natin ng pondo ang mga armas natin pandigma para sa ating national security, Agree?!

No to half rice, mag-isip ng malalim na solusyon!

ni Imee Marcos @Imeesolusyon | November 14, 2023

Inirekomenda ng Philippine Rice Institute na buhayin ang panukalang Half Rice Law para raw hindi masayang o matapon lang ang mga kanin lalo na sa mga restoran.

Tulad ng inaasahan, maganda man ang intensyon ng PhilRice, hindi naman ito katanggap-tanggap sa ating mga Pinoy! Remember, malakas tayong kumain ng kanin! Kaya sa ganang akin, no, a big, big no sa half rice!

Abah eh, ayoko kayang magutom ang ating mga kababayan, lalo na ‘yung kumakain sa mga karinderya, sa boodle fight at sa bahay ng bawat pamilyang Pinoy!

Agree ako sa mabuting intensyon nito. Pero ang paghahain ng half rice ay hindi sapat na tugon sa mas malalim na problema ng kahirapan at pagkagutom.

Maaari ring magdulot ng positibo at negatibong epekto sa mga maliliit na negosyo ang paghahain ng half rice.

Makakatipid sila kapag half rice na ang inihain. Pero ‘yung mga may pa-unli rice, nakupowz ‘yung tiyak mababawasan ang kanilang mga customer at maninibago.

Kailangan natin ng mas malawak at mas malalim na mga hakbang para tugunan ito.

IMEEsolusyon natin d’yan eh, tulungan natin ang ating mga magsasaka na pataasin ang produksyon ng bigas.

Pangunahing IMEEsolusyon na pagtulong eh, tutukan ang natatapong postharvest matapos ang ani, na halos 23% ang nasasayang sa mga kalyeng pinagpatuyuan ng palay.

Bigyan natin ng mga bodegang mapagtutuyuan ng mga palay ang ating mga magsasaka at hindi sa mga kalsada lang, ‘di bah!

Take note, para sa ating mga Pinoy, KANIN IS LIFE! Agree?!

Nakatenggang mga pabahay sa Yolanda victims at supply ng tubig, ayusin now na!

ni Imee Marcos @Imeesolusyon | November 9, 2023

Ika-10 taon na o isang dekada ng paggunita sa mabalasik na pananalanta ng Super Typhoon Yolanda. Nasa 6,000 buhay ang nalagas at milyun-milyon ang naapektuhan.

Nasa P95.48 billion ang damage nito at ang Super Bagyong Yolanda ang itinuturing na pinakamalakas na bagyo sa kasaysayan sa buong mundo na nakapagtala ng super lakas na hanging 315 kilometers per hour.

Kasama ang ating mga kaanak at mga kaibigan sa mga nabiktima ng Yolanda. Makalipas ang isang dekada, ano na nga ba ang nagawa para sa ating Yolanda victims?

Sa rami ng mga hanash ngayon sa pulitika, araw ngayon ng pag-aalala para muling silipin ang kalagayan ng ating mga kababayan sa Yolanda. Kaysa ngumangakngak tayo at ubusin ang oras ng mga pulitiko sa mga pagtatanggal ng kung sinu-sino sa puwesto...

Abah, please isantabi na muna ‘yan. Araw ngayon upang muli nating balikan ang mahal nating mga kababayan para buhayin ang pagtulong sa kanilang abang kalagayan.

IMEEsolusyon ngayon ang kailangan nila, partikular na sa mga pabahay.

Kung sisilipin kasi natin, IMEEsolusyon na muli nating ayusin ang mga nakatenggang mga pabahay o housing units na ayon nga sa balita, maraming pabahay na hindi pa rin natitirahan hanggang ngayon.

Bakit kamo? Eh, biruin n’yo naman wala pa ring maayos na patubig sa lugar o sa mga housing units. Eh, sino ba naman ang gugustuhing lumipat doon, ‘di bah? Kaya nga IMEEsolusyon din na patutukan na natin ‘yang mga supply ng tubig at water pipes sa lugar at mga supply din ng kuryente.

Take note, ang Yolanda disaster ang isa sa pinakamatinding delubyong dumale sa ating bansa, kaya naman IMEEsolusyon na maiwasang mabiktima ulit tayo nito, kailangang pagbutihin natin ang ating disaster resilience. Magpokus din tayo sa ating climate change.

IMEEsolusyon sa buong bansa na gumawa ng mga hakbang para mabawasan ang mga epekto ng mga fossil fuel plants na nakasisira ng ating atmosphere. Hingin natin ang payo ng ating mga environmentalist at kanilang mungkahi para maprotektahan tayo sa mga sakuna o disaster.

IMEEsolusyon rin na tuwing may disaster, mas bilisan pa ng mga LGUs at ating ibat ibang ahensya ang pagtugon sa pinakamadaling panahon lalo na sa mga relokasyon ng mga biktima ng mga sakuna.

Ang mga bagay na ito ang dapat na unahin ng ating mga kasamahan sa gobyerno. Plis lang, reminder ang YOLANDA Ground Zero, para maiwasan ‘yang mangyari muli sa atin.

Pakiusap sa mga kapwa kong mga taga-gobyerno, iwas muna sa pangwawakwak ng ating kapwa pulitiko, magkaisa tayo sa mga problema sa pagkain, kabuhayan o pagkakakitaan, proteksyon sa mga sakuna nating lahat! Agree?!