Pag-relocate sa mga taga-Davao de Oro, gawin na!

ni Imee Marcos @Imeesolusyon | Pebrero 19, 2024

Kamakailan lang nagkaroon ng landslide sa Maco, Davao de Oro dahil sa sunud-sunod na mga pag-ulang dulot ng LPA.

Nakakanerbyos ang insidenteng ito dahil nalibing nang buhay ang ating mga kababayan kung saan pumalo na sa halos 100 ang namatay at posibleng madagdagan pa.

Patuloy pa ring hinahanap ang nasa 37 katao sa ground zero. Nitong isang araw isinagawa na ang mass burial ng labing-apat na hindi pa nakikilalang mga biktima at ang masaklap, walang nag-claim sa public cemetery ng Maco.

Tuloy rin ang paghuhukay at pagbabakasakaling may matagpuan pang buhay, makaraan ang mahigit isanlinggo matapos mangyari ang trahedya.

Ayon sa mga eksperto na gaya ni Mahar Lagmay, isang kilalang geologist at isa sa namumuno sa Project Noah, prone ang naturang lugar sa mga landslide at malambot ang klase ng lupa rito.

Bukod d’yan, mayroon ding minahan na lalo nang nakadagdag sa paglambot ng lupa roon.

Hay naku! Nakakabahala na talaga ang ganitong mga landslide. Pero sa ganang akin, IMEEsolusyon d’yan na sundin ang mga rekomendasyon ng mga eksperto. 

Abah eh, palikasin na sila sa mga lugar na gaya n’yan na prone sa landslide. Kahit pa anong gawin d’yan na pag-iingat tuwing uulan hindi maiiwasang maulit uli ang trahedya.

IMEEsolusyon na please, i-relocate na natin ang ating mga kababayan na nand’yan sa mas matatag ang lupa at hindi prone sa landslide.

IMEEsolusyon na para tumalima ang mga residente, magpatupad ng mahigpit na kautusan ang LGU na nakakasakop sa mga residente d’yan. Para naman ‘di na sila bumalik sa lugar.

IMEEsolusyon sa ating mga kababayan d’yan, plis naman ‘wag matigas ang ulo! Ang inyong seguridad at kaligtasan ang isipin at iprayoridad, plis lang ‘wag na kayo bumalik sa lugar na madalas na makaranas ng pagguho. Agree?!

PI sa Cha-cha stop na, suhulan buking na, todo-deny pa, grabe!

ni Imee Marcos @Imeesolusyon | Pebrero 2, 2024

Nakakaimbiyerna ang pagpupumilit na isulong ang Charter change, lalo na’t may alingasngas pa na may pera kapalit ang pirma na itinutulak ng People’s Initiative.

Kamakailan nga lang buking sa ating Senate hearing na may suhulan talagang nagaganap.

And take note, nasukol natin na ang lider nga ng Kamara ang nag-welcome pa at ipinagamit ang house nila sa meeting ng PI. Grabe ‘di bah!

Panay tanggi si House Speaker Martin Romualdez, pero may ebidensya naman. HAY NAKU!

Gisang-gisa ang mga resource person natin ha at meron din tayong mga testigo na mayroon talagang bayaran kapalit ang pirma. O ano, deny pa more??!!

Well sa ganang akin, wala namang problema ang Cha-cha lalo na kung economic provision ang babaguhin.

Pero IMEEsolusyon sa umiinit na usaping ‘yan, na plis naman no, isantabi na muna ‘yan!

Abah eh, napakarami nating dapat unahin. Una, problema sa presyo ng bilihin, trabaho at iba pa. 

IMEEsolusyon rin sa pagsuspinde ng Comelec sa pagtanggap ng mga pirmang ‘yan na totally junk at ibasura na muna.

Inuulit ko, hindi napapanahon ang pagsayaw ng PI sa Cha-cha.

Saka, IMEEsolusyon na tigilan na ang pagsuporta ng ating solons sa pangunguna ni Speaker Romualdez.

Puwede ba, hindi pa tayo nakakaahon sa hirap na dulot ng pandemya.

Anumang interes o agenda ng nagtutulak n’yan, ibasura na muna, alang-alang sa mga naghihikahos nating mga kababayan! Agree?!

Pagkupit sa ayuda ng mahihirap, stop!

ni Imee Marcos @Imeesolusyon | Enero 27, 2024

Bumungad sa pagbabalik-sesyon ng ating Kongreso ang nakakaimbiyernang isyu ng pagkupit daw sa mga ayuda ng DSWD sa ating mga mahihirap na kababayan!

Abah, eh, pinatunayan mismo ng mga biktima na binawasan daw ng mga sinasabing tauhan ng munisipyo sa Davao de Oro at Davao del Norte ang kanilang ayuda.

Sumbong ng isa, P10K ang dapat niyang matanggap na educational assistance at nang palabas na siya matapos makuha ang pera, pinabalik siya at kinuha ng ‘di kilalang tauhan daw ng munisipyo ng Carmen ang isanlibong piso! Grabe ha!

Kapal muks naman ‘yan, lantaran ‘yang pangongotong ha! Mahiya naman kayo!

Sabi ng mayor, ‘di niya alam ang pangongotong na ito ha! Kaya mega-aksyon siya at ipaiimbestiga raw!

Ayon sa ating mga kasamahan sa DSWD, obviously wala na silang kontrol du’n, dahil ang mga taga-LGU na ang may hawak dito.

Hindi lang iisa ang lumantad sa Senado para tumestigo sa ganyang lantarang pangingikil, marami sila!

Kaya naman naisip din ng ating mga kapwa senador na maaaring hindi lang ito nangyayari sa mga probinsiya pati na rin sa Metro Manila.

Ang tindi naman ng mga kawatan ngayon no! Lantaran na! Kapal muks nila!

Sa ganang akin, IMEEsolusyon d’yan, mag-isyu ng resibo. Dapat may kopya pareho ang nagbigay at tatanggap. 

And then, kailangan ang listahan ay maibigay mismo sa taga-DSWD! 

IMEEsolusyon ko rin na if may chance, baka puwedeng ianunsyo at ilagay sa FB page ng bawat lugar ang lists ng mga mabibigyan, na may access ang mga residente, munisipyo at maging DSWD para makita at mag-match sa hawak nilang hard copy na mga listahan.

Konting tiyagaan lang talaga para may transparency! ‘Di bah!

IMEEsolusyon din na talagang higpitan ng DSWD ang pagbabantay!

Dapat talaga namo-monitor at ma-audit kung kinakailangan ng bawat ahensya!

Higit sa lahat, IMEEsolusyon na mabusisi talaga itong mabuti at agad na mapanagot ang mga may sala!

NO TO AYUDA SCAM! Plis lang maawa naman kayo sa mahihirap nating mga kababayan!