Mula sa India lang ang bawal… Lahat ng papasok sa 'Pinas, puwede na!

ni Ronalyn Seminiano Reonico | April 30, 2021

Aalisin na ang entry ban sa Pilipinas para sa mga banyaga maliban sa mga galing sa India at sa mga may travel history sa naturang bansa, ayon sa Malacañang ngayong Biyernes.

Ayon kay Presidential Spokesperson Harry Roque, inaprubahan ng Inter-Agency Task Force (IATF) ang pagpasok ng mga foreign nationals sa bansa simula sa May 1.

Sa ilalim ng Resolution No. 113, nakasaad ang mga kondisyon sa pagpapapasok ng mga banyaga sa bansa at ito ay ang mga sumusunod:

Una, dapat ay mayroon silang valid at existing visa sa oras ng pagpasok sa bansa maliban sa mga nasa ilalim ng Balikbayan Program. Kailangan ding may “pre-booked accommodation for at least seven nights in an accredited quarantine hotel/facility.”

Kailangan ding sumailalim ng mga dayuhan sa COVID-19 testing sa quarantine hotel/facility sa ikaanim na araw ng pagdating sa bansa.

Samantala, noong Marso 22, nagpatupad ng travel restrictions sa Pilipinas sa mga banyaga dahil sa patuloy na pagtaas ng kaso ng COVID-19. Nilinaw naman ng Palasyo na mananatili ang travel ban sa mga galing sa India.

Saad ni Roque, “All passengers coming from India or those with travel history to India within the last 14 days preceding arrival shall not be allowed to enter the Philippines starting April 29, 2021 until May 14, 2021.

“The Commissioner of Immigration shall have the exclusive prerogative to decide on the waiver or recall of exclusion orders of foreign nationals.”

Resto, barbershop, salon at spa, balik-operasyon na

ni Ronalyn Seminiano Reonico | April 29, 2021

Maaari nang magbalik-operasyon ang mga restaurant at personal care services katulad ng babershop at salon sa mga lugar na nasa ilalim ng modified enhanced community quarantine (MECQ).

Ayon kay Presidential Spokesperson Harry Roque ngayong Huwebes, inaprubahan na ng Inter-Agency Task Force (IATF) for the Management of Emerging Infectious Diseases ang 10% dine-in capacity operation sa mga restaurants at 30% capacity naman sa mga beauty salons, barbershops at spas.

Saad pa ni Roque, “Moreover, these establishments shall only provide services that can accommodate the wearing of face masks at all times by clients and service providers.”

Samantala, hanggang May 14 isasailalim sa MECQ ang NCR Plus na binubuo ng Metro Manila, Rizal, Bulacan, Cavite at Laguna.

Taga-NCR Plus areas, Cebu at Davao City, bawal sa Region VI – IATF

ni Ronalyn Seminiano Reonico | April 5, 2021

Pansamantalang pinagbabawalan ang mga residente mula sa NCR Plus areas, Cebu City, at Davao City na pumunta sa Region VI hanggang sa April 10, ayon sa inilabas na pahayag ng Malacañang ngayong Lunes.

Ayon kay Presidential Spokesperson Harry Roque, ang desisyon ng Inter-Agency Task Force for the Management of Emerging Infectious Diseases (IATF) ay base sa inihaing rekomendasyon ng mga local officials ng Region VI dahil sa patuloy na pagtaas ng kaso ng COVID-19.

Ang NCR Plus ay binubuo ng Metro Manila, Bulacan, Cavite, Laguna at Rizal.

Samantala, noong Linggo, pumalo na sa 795,051 ang kabuuang bilang ng kaso ng COVID-19 sa bansa kung saan 646,100 ang mga gumaling na at 13,425 ang mga pumanaw.