70 staff ng House of Representatives may COVID-19

ni Lolet Abania | January 14, 2022

Nasa tinatayang 70 personnel ng House of Representatives ang nagpositibo sa test sa COVID-19.

Ito ang inihayag ni House of Representatives Secretary General Mark Llandro Mendoza, tatlong araw bago mag-resume ang lower chamber sa kanilang plenary sessions na may limitadong physical attendance sa Batasang Pambansa. Sa Lunes, nakatakdang magbalik sa sesyon ang mga mambabatas.

“So far ang updated, nasa 70 pero karamihan naman nasa labas ‘yun, wala sa House. ‘Di naman kami nagpapapasok kasi ‘pag may nag-positive na staffer [na] pinapasok sa amin, nire-record lang namin. So far nasa 70 as of today,” ani Mendoza sa sa isang phone interview.

Ayon kay Mendoza, inoobserbahan pa nila ang tinatawag na hybrid session set-up, kung saan papayagan lamang sa maximum na 30 mambabatas at 20 hanggang 25 congressional staff sa loob ng session hall para mapanatiling ligtas ang lahat sa gitna ng panganib ng COVID-19.

Gayundin aniya, ang mga congressional staff ay magre-resume ng kanilang operasyon matapos ang isang extended break.

Subalit, ayon sa secretary general, 20 porsiyento ng mga staff lamang ang papayagan para pisikal na maka-access sa complex, habang wala namang bisita na papayagang makapasok dito.

Giit ni Mendoza, ang mga papasok sa complex ay kailangang magdaan muna sa antigen testing.

Binanggit naman ni Mendoza na sa ngayon, ang House of Representatives ay nakapagbigay na ng booster shots sa tinatayang 400 personnel, habang plano nilang i-resume ang pag-administer ng booster shots sa loob ng dalawang linggo.

Aniya pa, halos 95 percent ng Secretariat staff ay mga fully vaccinated na kontra-COVID-19. Magbabalik ang session ng 18th Congress sa Enero 17 hanggang Pebrero 4, 2022.

Habang sa pagitan ng Pebrero 5 at Mayo 22, 2022, nasa kanilang usual break ang Congress para sa nakaiskedyul na election campaign at magbabalik muli sa Mayo 23 hanggang Hunyo 3, 2022.

Mga senador nagtataka kung bakit sa Kamara nagpa-kustodiya si Mago

ni Jasmin Joy Evangelista | October 3, 2021

Nagtataka ang ilang senador kung bakit sa Kamara humingi ng tulong si Pharmally regulatory affairs head Krizle Mago imbes na sa Senado o NBI.

Ito ay matapos ianunsiyo na inilagay siya sa protective custody ng Kamara matapos ilang araw na mawalan ng komunikasyon sa mga mambabatas, kasunod ng kaniyang testimoniya sa Senate hearing na ibinunyag ang ‘swindling’ ng kanilang firm sa gobyerno hinggil sa pagkalap ng face shields.

“Nakakapagtaka ang paghingi ni Mago ng protective custody sa kamara imbes na sa NBI. Kung protective custody ang gusto ni Mago, bakit sa Kamara siya nagpunta? Kusang loob na umamin si Mago tungkol sa tampering ng face shields at hindi pinilit o tinakot ng mga Senador," ani Sen. Franklin Drilon.

Si Senate Blue Ribbon Committee Chairman Sen. Richard Gordon naman ay ikinaiinis ang paulit-ulit na pangako umano ni Mago.

"Nangako siya babalik na siya, a-attend siya kahapon, di na naman dumating. Katulad nu'ng isang araw, nangako, magkikita kami pagkatapos ng hearing para madagdagan 'yung sinabi niya. Tingin ko, kwan na siya eh, nandu'n na siya, pero ngayon ba't naman siya pupunta sa House? Eh kase raw mabait daw 'yung House. Mabait naman ako sa kanya, wala naman akong ginagawa sa kanya," ani Gordon.

Nitong Biyernes ay sinabi ni Good Government and Public Accountability Chair DIWA Party-list Rep. Michael Aglipay na nasa protective custody na ng Kongreso si Mago, at si Sergeant-at-Arms Mao Aplasca na ang sasagot sa mga tanong.

Sumulat umano si Mago kay House Speaker Lord Allan Velasco noong Setyembre 30 para humingi ng proteksyon.

"Presently, I cannot speak freely about the ongoing investigation on the alleged overprice of medical equipments without feeling threatened due to the undue influence and pressure being exerted from various sources," ani Mago.

Tiniyak naman ni Aglipay sa isang sulat kay Gordon na isasaayos ng Kongreso sakaling kailanganin si Mago sa mga pagdinig sa Senado.

Sumulat na rin si Aglipay kay Aplasca para padaluhin si Mago sa pagdinig ng kamara sa Oktubre 4. Sa Oktubre 5 naman ang susunod na pagdinig ng Senado.

Pasay City Rep. Calixto, positive sa COVID-19

ni Lolet Abania | September 8, 2021

Ipinahayag ni Pasay City Representative Antonino Calixto ngayong Miyerkules na nagpositibo siya sa test sa COVID-19.

Kasalukuyang nasa isolation si Calixto na nakararanas ng mild symptoms ng COVID-19. Agad siyang nagpakonsulta sa doktor matapos na makaramdam ng mild cough noong Lunes.

Ayon sa mambabatas ang kanyang mga naging close contacts, kabilang na ang mga miyembro ng kanyang pamilya ay sumailalim na sa swab tests at negatibo silang lahat sa COVID-19.

Gayunman, sinabi ni Calixto na mananatili ang mga ito sa loob ng kanilang bahay ng 14-araw, kung saan ipinayo ito ng mga doktor. Ang mga staff naman ni Calixto na pumapasok sa kanyang opisina at mga nakausap niya nang personal ay sumailalim na rin sa COVID-19 tests, habang pinayuhan din ang mga ito na manatili na lamang sa kanilang bahay.

Samantala, ang kanyang kapatid na si Pasay City Mayor Emi Calixto-Rubiano ay wala sa ginanap na pulong kamakailan. Panawagan naman ni Calixto sa kanyang mga kababayan na magpabakuna na kontra-COVID-19.