Canvassing ng votes para sa pangulo at VP, nakatakda sa Mayo 24-27 — Congress

ni Lolet Abania | May 17, 2022

Magsisimula ang canvassing ng votes para sa pangulo at pangalawang pangulo sa katatapos na 2022 elections sa Mayo 24 at tatagal ito hanggang Mayo 27, batay sa impormasyon mula sa website ng House of Representatives.

Nitong Lunes, isang online meeting ang ginanap kung saan ang mga opisyal ng House, na pinangunahan ni Secretary General Mark Llandro Mendoza, ay tinalakay ang mga isyu sa mga opisyal ng Senate na pinamunuan naman ni Senate Secretary Atty. Myra Marie Villarica.

Kabilang sa mga isyu na kanilang pinag-usapan ay ang transfer ng mga ballot boxes na naglalaman ng Certificates of Canvass (COCs) at Election Returns (ERs) mula sa Senate patungo sa House sa Mayo 23.

Napagkasunduan naman ng mga opisyal na ang Consolidation and Canvassing System (CSS) machine ay ita-transfer mula sa House Legislative-Executive Lounge patungo sa Plenary Hall sa Mayo 24 bago ang joint session.

Ayon kay Mendoza, ang canvassing sa Mayo 24 ay magsisimula ng alas-2:00 ng hapon habang mula Mayo 25 hanggang 27, ang canvassing ay nakaiskedyul mula alas-10:00 ng umaga hanggang alas-10:00 ng gabi.

Sa ilalim ng 1987 Constitution, ang Senate President ang dapat magbukas ng lahat ng certificates sa harap ng Senate at ng House sa isang joint public session, na hindi lalampas sa 30 araw matapos ang Election Day.

9 party-list groups, tiyak na ang House seats

ni Lolet Abania | May 12, 2022

Nasa tinatayang siyam na party-list groups ang tiyak na ang puwesto sa House of Representatives base sa partial at official tally ng Commission on Elections (Comelec), na sila ring tumatayong National Board of Canvassers (NBOC).

Ayon sa NBOC’s National Tally Sheet Report Number 2, ang mga party-list groups na nakatanggap ng tinatayang 2% ng votes na required para sa proklamasyon ay ang mga sumusunod:

1. ACT-CIS – 1,112,991 (6.0586%)

2. Ako Bicol – 513,403 (2.7947%)

3. 1-Rider party-list – 453,712 (2.4698%)

4. 4PS – 427,779 (2.3286%)

5. Ang Probinsyano – 421,253 (2.2931%)

6. Sagip – 411,440 (2.2397%)

7. Cibac – 394,750 (2.1488%)

8. Ako Bisaya – 391,242 (2.1297%)

9. Probinsyano Ako – 380,119 (2.0692%)

Kaugnay nito, nakasaad sa batas na ang isang party-list group na nakakuha ng tinatayang 2% ng kabuuang bilang ng votes na lumabas sa party-list race ay entitled sa tinatayang isang puwesto o seat sa House of Representatives.

Ang mga lumampas o exceed sa 2% threshold ay entitled naman para sa karagdagang seats katumbas sa bilang ng votes cast, subalit ang kabuuang bilang ng puwesto para sa bawat nanalong party-list group ay hindi maaaring lumampas sa tatlo.

Para naman sa mga hindi naabot ang 2% requirement, posible pa ring maka-secure ng isang seat sa House of Representatives, dahil batay sa party-list law kailangan sa 20% ng House members ay magmumula sa party-list ranks.

Hanggang alas-8:28 ng umaga ngayong Huwebes, ang NBOC ay nakapag-canvass ng votes para sa party-list groups mula sa mga lugar sa National Capital Region (NCR) at Cordillera Administrative Region (CAR), gayundin sa Regions 1, 2, 3, 4A, at 4B.

Gayundin, ang NBOC ay nakapagproseso na ng 82 COCs mula sa mga probinsiya, lungsod, at overseas voting hanggang nitong Miyerkules nang gabi.

Sinabi rin ng Comelec na plano nilang iproklama ang mga nanalong senador sa May 9 elections sa susunod na linggo, kasunod nito ang party-list groups.

Panukalang pagbibigay ng P1M cash sa 101-anyos, aprub sa Kamara

ni Lolet Abania | January 31, 2022

Aprubado na ng House of Representatives ngayong Lunes, sa kanilang ikatlo at huling pagbasa ang panukala na naglalayong magbigay ng karagdagang benepisyo sa mga Filipino centenarians.

Nakakuha ng 193 affirmative votes ang House Bill 10647, sa ginanap na plenary session ng mga mambabatas.

Nakasaad sa nasabing panukala na lahat ng Filipino centenarians o iyong umabot na sa edad 101 ay makatatanggap ng cash gift na halagang P1 million sa kanilang kaarawan.

Ang centenarian ay tatanggap din ng isang felicitation letter mula sa Pangulo.

Gayundin, ang lahat naman ng Pilipino na aabot sa edad 80, 85, 90, at 95 ay makatatanggap ng P25,000, bukod pa sa isang letter of felicitation mula sa Pangulo.

Nakapaloob din sa bill na pangungunahan ito ng National Commission of Senior Citizens, na siyang ahensiyang magpapatupad nito.