Website ng mga govt. agencies, pinahihigpitan ang seguridad

ni Angela Fernando - Trainee @News | October 16, 2023

Inatake ng mga hacker ang opisyal na website ng House of Representatives at pinalitan ang kanilang mga photo journals ng meme na nagsasabi ng "You've been hacked" nu'ng Linggo, ika-15 ng Oktubre, na nagresulta sa panandaliang pagsasara nito.

Ayon kay Dominic Ligot, founder ng Data Ethics PH, ang Data Privacy Act at ang Anti-Cybercrime Law ay epektibo lamang kapag may nangyaring paglabag sa batas o ginawang krimen.

Pahayag pa ni Ligot, na dapat magkaroon ng mahigpit na pagsusuri sa bawat portal ng pamahalaan na kayang i-access sa internet upang masiguro ang seguridad nito matapos ang hacking incident sa website ng HOR.

Maaari raw sabihing "hacktivism" ang nangyayaring ito kung saan ibinabalandra ng mga hacker ang kahinaan sa seguridad ng mga websites ng mga institusyon ng gobyerno upang magkaroon ng pagbabago o reporma ang sistema ng mga ito.

Banta ni ex-P-Du30, kinondena ng mga mambabatas

ni Angela Fernando - Trainee @News | October 15, 2023

Walang preno at matapang na pinuna ng mga lider at mambabatas sa House of Representatives ang dating Pangulong Rodrigo Duterte dahil sa umano'y paninira sa Kongreso at mga banta nito nu'ng Oktubre 14, Sabado.

Pahayag ng mga lider, dapat na itigil ni Duterte ang mga patutsada nito at pagpuntirya sa isa sa kanila na si Rep. France Castro.

Labis ang pagtutol at ikinalungkot nga ng mga ito ang mga pahayag ni Duterte laban sa institusyong mismong kumalinga at sumuporta sa kanya nu'ng mga panahong nakaupo siya sa puwesto.

“Our institution, the House of Representatives, has been unwavering in its dedication to the Filipino people,” ani ng mga House leaders.

Canvass ng 2022 election votes para sa pangulo at VP, tapos na.. Marcos at Sara, iprinoklama — NBOC

ni Lolet Abania | May 25, 2022

Tinapos na ng Congress, tumatayong National Board of Canvassers (NBOC), ang opisyal na tallying of votes para sa pangulo at pangalawang pangulo sa 2022 national and local elections.

Idineklara ng Joint Canvassing Committee (JCC), na co-chaired nina Senate Majority Leader Juan Miguel Zubiri at House Majority Leader Martin Romualdez, ang completion ng proseso ng certificates of canvass (COCs) ng alas-3:33 ng hapon ngayong Miyerkules.

Ang canvassing ay tinapos na nila kahit wala pa ang canvassing ng overseas absentee voting (OAV) ng mga boto mula sa Argentina at Syria, kung saan ang mga ballot boxes sa naturang mga bansa ay hindi pa dumating.

Isang report ng canvass ang ihahanda ng JCC at isusumite ito sa Joint Public Session ng House of Representatives at ng Senate of the Philippines. Batay sa rules, “the JCC report shall be approved by a majority of votes of all its members, each panel voting separately. The report shall be signed by the majority of the members of each panel.”

Matapos nito, ang mga chairpersons ng JCC ay ipiprisinta at i-sponsor ang report, habang sinasamahan ito ng Resolution of Both Houses na magpoproklama sa duly-elected president at vice president.

Sa adoption ng Resolution of Both Houses, sina Senate President Vicente Sotto III at Speaker Lord Allan Velasco ay ipoproklama na ang mga nahalal at iluluklok na pangulo at pangalawang pangulo.

Base sa partial at unofficial tally, si dating Senator Ferdinand “Bongbong” Marcos Jr. ang nanguna sa 2022 elections sa presidential race na may 31,104,175 votes, kasunod ni Vice President Leni Robredo na may 14,822,051 votes.

Para sa vice-presidential race nanguna si Davao City Mayor Sara Duterte, ang anak ni outgoing President Rodrigo Duterte, na may 31,561,948 votes, kasunod si Senator Francis Pangilinan na may 9,232,883 votes.

Ayon sa GMA News Research, ang napipintong proklamasyon ni Marcos, ang pinakamabilis na presidential proclamation matapos ang 1986 EDSA Revolution.

Noong 1992, ang proklamasyon ni dating Pangulong Fidel V. Ramos ay inabot ng 42 araw matapos ang eleksyon; 18 araw para sa proklamasyon kay dating Pangulong Joseph Estrada noong 1998; 45 araw para sa proclamation ni dating Pangulo Gloria Macapagal-Arroyo; 30 araw para sa proklamasyon ng yumaong dating Pangulong Benigno Aquino III; at 21 araw para sa proklamasyon ni outgoing President Rodrigo Duterte. Umabot lamang ng 16 araw ang proklamasyon ni Marcos matapos ang May 9 national at local elections.