Sapilitang pagbabakuna sa mga kasambahay sa HK, ipinatigil

ni Lolet Abania | May 5, 2021

Pansamantalang itinigil ng gobyerno ng Hong Kong ang plano na gawing mandatory ang pagbabakuna ng COVID-19 vaccines sa mga dayuhang kasambahay matapos na umapela ang human rights group dahil anila, isang uri ito ng diskriminasyon.

Batay sa ulat na inilabas ng Reuters, ipinag-utos umano ng Hong Kong authorities na ipa-test sa COVID-19 ang lahat ng dayuhang kasambahay bago sumapit ang Mayo 9.

Ibinaba ang kautusan makaraang madiskubre na nagpositibo sa mas nakakahawang variant ng COVID-19 ang isang kasambahay na nanggaling sa Pilipinas. Gayundin, kinakailangan na mabakunahan na kontra-COVID-19 ang kasambahay bago ma-renew ang kanilang kontrata.

Gayunman, ayon kay Hong Kong leader Carrie Lam, sinuspinde na nila kahapon ang direktiba na mandatory vaccination dahil sa mga reklamo ng mga grupo ng mga manggagawa, pati na rin ang ilang opisyal sa Pilipinas.

“I have asked the secretary for labor to review the whole policy, and to consult advisers and consulates for the countries where domestic workers primarily come from as to whether compulsory vaccinations can be done,” ani Lam.

Subalit giit ni Lam, hindi maituturing na discriminatory ang gagawing mandatory COVID-19 vaccination habang target naman nilang tapusin ang mandatory testing para sa lahat ng domestic workers sa Mayo 9. Karamihan ng mga babaeng kasambahay ay galing sa Pilipinas, Indonesia, Nepal at Sri Lanka, kung saan naninirahan sila sa kanilang mga amo. Ikinatuwa naman ng chairperson ng United Filipinos in Hong Kong na si Dolores Balladares, ang suspensiyon ng mandatory vaccination sa mga domestic workers.

“We welcome the suspension of mandatory vaccines, but we are calling for scrapping the mandatory testing and vaccine policy entirely, as it punishes and criminalizes domestic workers,” ani Balladares sa Thomson Reuters Foundation.

“We are in favor of testing and vaccination on a voluntary basis. But singling us out and making it mandatory is discriminatory and leads to further stigmatization,” dagdag pa ni Balladares

1,300 OFWs apektado ng 2-week travel ban sa Hong Kong

ni Ronalyn Seminiano Reonico | April 19, 2021

Aabot sa 1,300 overseas Filipino workers (OFWs) ang maaapektuhan ng 2 linggong travel ban sa Hong Kong dahil sa bagong COVID-19 strain, ayon sa Philippine Overseas Employment Administration (POEA).

Ayon kay POEA Administrator Bernard Olalia, kalahati ng 2,600 manggagawa na nakatakdang pumunta sa Hong Kong ang maaapektuhan ng naturang travel restriction.

Simula bukas, April 20, isususpinde nang dalawang linggo ang mga flights papuntang Hong Kong mula sa India, Pakistan at Pilipinas dahil sa na-detect na N501Y mutant COVID-19 strain.

Pahayag ni Olalia, “Magkakaroon ng dalawang linggo na temporary suspension of deployment dahil nga sarado ‘yung kanilang border dahil sa pandemya.

“So kalahati ng 2,600 ay hindi makakaalis. More or less nasa 1,300 ang apektado roon sa pagpunta sa bansang Hong Kong.”

Nilinaw din ni Olalia na tuloy pa rin ang pagpoproseso at issuance ng Overseas Employment Certifications (OECs) sa kabila ng ipinatupad na travel ban.

Aniya. "Kahit may border closure or temporary suspension of flights, ang ating POLO (Philippine Overseas Labor and Office), POEA ay patuloy sa pagpoproseso ng documents.

"Ibig sabihin, ang POLO, tuloy po ‘yan. Ang accreditation sa POEA, tuloy po ‘yan, kasi may 60 days na validity period ang OEC, so kahit may temporary suspension, mag-aantay sila ‘pag na-lift iyon. Kapag na-lift in two weeks' time, valid pa rin ‘yung OEC na na-issue.”

Ayon din kay Olalia, kailangang makipag-ugnayan sa private recruitment agencies ang mga maaapektuhang OFWs.

Aniya, "Ang private recruitment agency, sila po ang may coordination sa stranded OFWs. May 2016 rules na kung saan in-amend at pinalawig natin ‘yung tinatawag na monitoring at assistance sa OFWs to include ‘yung ating mga stranded.”

Biyahe mula ‘Pinas, India at Pakistan pa-HK, suspendido

ni Ronalyn Seminiano Reonico | April 19, 2021

Pansamantalang sinuspinde ang mga flights papuntang Hong Kong mula sa India, Pakistan at Pilipinas nang dalawang linggo simula bukas, April 20, dahil sa N501Y mutant COVID-19 strain, ayon sa awtoridad.

Noong Linggo, nakapagtala ang Hong Kong ng 30 bagong kaso ng COVID-19 kung saan 29 diumano ang “imported cases.”

Saad ng pamahalaan ng Hong Kong, "It applied the criteria of the newly implemented place-specific flight suspension mechanism retrospectively for 14 days on places where there had been imported cases confirmed by arrival tests that carried the N501Y mutant strain.

"India, Pakistan, and the Philippines all had a seven-day cumulative number of relevant cases that reached the criteria in the past 14 days."