Bakunadong OFWs, oks na sa HK — Bello

ni Ronalyn Seminiano Reonico | August 23, 2021

Maaari nang makapasok sa Hong Kong ang mga Filipino workers na nabakunahan sa Pilipinas sa susunod na linggo, ayon kay Department of Labor and Employment (DOLE) Secretary Silvestre Bello III noong Linggo.

Matatandaang kamakailan, ang mga nabakunahan lamang na OFWs sa Hong Kong ang pinapapasok sa naturang bansa at hindi tinatanggap ng kanilang pamahalaan ang mga vaccination certificates mula sa mga local government units ng Pilipinas.

Ngunit ayon sa DOLE, sa pakikipag-ugnayan ng ahensiya sa Bureau of Quarantine (BOQ) at Philippine consulate sa HK, inaprubahan na ang pagpapapasok sa mga overseas Filipino workers (OFWs) na bakunado na laban sa COVID-19 ngunit nararapat na ipakita nila ang mga valid vaccine certificates mula sa BOQ.

Ayon kay Bello, 3,000 OFWs ang nakatakdang i-deploy sa Hong Kong.

Samantala, sasailalim umano ang mga OFWs sa quarantine sa mga specified hotels na sasagutin ng kanilang mga employers.

Ayon pa sa kanya, nakikipag-ugnayan na ang pamahalaan ng HK sa mga partner hotels para sa mga iku-quarantine na OFWs.

Vaxx cards ng ‘Pinas, ‘di tinanggap sa Hong Kong

ni Lolet Abania | August 11, 2021

Inihayag ni Department of Foreign Affairs Secretary Teodoro Locsin Jr. na ang vaccination cards na inisyu ng gobyerno ng Pilipinas ay hindi tinanggap sa Hong Kong.

Ayon kay Locsin, hindi ini-honor ang vaccination cards dahil sa hindi ito konektado sa isang single source. “Our vaccination cards are not accepted in Hong Kong because they are not connected to a single source. Poor OFWs (overseas Filipino workers) going to their jobs in Hong Kong even if jabbed,” ani Locsin sa isang tweet kahapon.

Matatandaang sinabi ni Department of Health Undersecretary Myrna Cabotaje na ang Department of Information and Communications Technology (DICT) at ang Bureau of Quarantine ay nagtulong para makagawa ng isang digitized vaccination card. Ayon pa kay Cabotaje posibleng matapos ito at maipamahagi sa katapusan ng Agosto o sa Setyembre.

Gayundin, nakipag-ugnayan na ang gobyerno ng Pilipinas sa World Health Organization (WHO) upang humingi ng guidelines para sa international verification system ng COVID-19 vaccinations. Ang nasabing guidelines ay kinakailangan sa deployment ng mga OFWs.

Higit 1,000 Pinoy na ilegal sa Hong Kong, babakunahan vs. COVID-19

ni Ronalyn Seminiano Reonico | May 30, 2021

Nakatakdang bakunahan kontra-COVID-19 sa Hulyo ang mahigit 1,000 Pinoy na ilegal na nananatili sa Hong Kong.

Ayon sa pamahalaan ng Hong Kong, kabilang ang mga Pilipino sa libu-libong illegal immigrants at refugees na babakunahan dahil kaunti lamang ang bilang ng mga residenteng nais magpabakuna.

Isinama rin ang mga illegal immigrants sa mga babakunahan dahil nakatakda nang ma-expire ang ilang Sinovac at Pfizer COVID-19 vaccines sa naturang bansa sa Agosto.