Bilang ng OFWs sa Hong Kong na may COVID-19 umakyat na sa 140

ni Jasmin Joy Evangelista | February 27, 2022

Umakyat na sa 140 ang bilang ng mga Overseas Filipino Workers (OFW) na tinamaan ng COVID-19 sa Hong Kong.

Sa bilang na ito, 134 ang nananatili sa isolation habang anim ang nakabalik na sa trabaho matapos maka-recover, ayon kay Hong Kong Labor Attaché Melchor Dizon ng Philippine Overseas Labor Office (POLO) nitong Sabado.

"Sixty three [OFWs] were at their employers' home, 18 were at quarantine facilities, and we have here a partner NGO providing isolation facility, they have 21 Filipinos," pahayag ni Dizon sa isang panayam.

Ayon pa kay Dizon, 18 dito ang nasa boarding houses, dalawa sa hotel facilities at 12 ang nasa hospital isolation.

Nauna nang ini-report ng POLO Hong Kong nitong February 21 na 60 OFWs ang nagpositibo sa COVID-19.

"The surge surprised Hong Kong in the beginning, and hospitals were overwhelmed. Our workers were not accommodated. That was highlighted, but we provided the necessary assistance to address their needs," ani Dizon.

Ibinulgar ng Philippine Consulate General in Hong Kong na mayroong mga COVID-19-positive OFWs ang pinilit ng kanilang employer na matulog sa public areas tulad ng mga park.

"Tatlo lang 'yung aming na-receive na complaints, tapos na-assist na namin. Tinatawagan ng ating welfare officers 'yung employer and na-reconsider naman 'yung kanilang decision," pahayag ni Dizon.

HK employers na tatanggalin ang OFWs na COVID-positive, kakasuhan — OWWA

ni Lolet Abania | February 23, 2022

Nakatakdang i-report ng mga opisyal ng Pilipinas sa labor authorities ang mga Hong Kong employers na binitawan na ang kanilang mga tauhan matapos na magpositibo sa test sa COVID-19 ang mga ito, ayon sa Overseas Workers Welfare Administration (OWWA).

Sinabi ni OWWA Administrator Hans Leo Cacdac na sa ngayon mayroong 76 overseas Filipinos sa Hong Kong na nagpositibo sa test sa COVID-19 na karamihan sa kanila ay nasa isolation habang walo ang na-admit sa mga ospital.

Nakatanggap naman si Cacdac ng mga reports na ilan sa mga overseas Filipino workers (OFWs) ang hinayaan nang umalis ng kanilang mga employers, subalit nakumbinsi na ring i-rehire ang mga nasabing manggagawa.

“Sa talaan natin ay parang isa lang ang naka-record sa atin na hindi pa makumbinsi na employer, idudulog na natin ito sa Hong Kong labor authority,” sabi ni Cacdac sa Laging Handa virtual briefing ngayong Miyerkules.

“Under Hong Kong law ay hindi sila dapat i-terminate kasi puwede naman mag-SL (sick leave) o ‘di kaya makabalik after nila mag-recover,” paliwanag ng opisyal.

Ayon kay Cacdac, ang mga Hong Kong employers na itutuloy pa rin ang termination ng mga kontrata ng kanilang mga empleyado dahil sa nagpositibo sa test sa COVID-19 ay mahaharap sa labor cases, at iba-blacklist na sa Pilipinas.

“Kailangan lang siguro ipaliwanag sa mga Hong Kong employers itong sitwasyon na ito at in fairness, marami naman sa kanila ang nakukumbinsi na tanggapin muli ang ating mga OFWs,” sabi ni Cacdac.

Ayon naman kay Philippine Consul General Raly Tejada, aabot na sa 10 OFWs sa Hong Kong ang pinipilit ng kanilang mga employers na matulog sa mga pampublikong lugar matapos na magpositibo sa test sa COVID-19.

Gayunman, sinabi ni Cacdac na pinag-aaralan na ng local labor authorities na mag-deploy ng isang medical team na mag-aasikaso sa mga Pinoy workers na nasa Hong Kong, katuwang ang mga awtoridad sa naturang special administrative region.

Pakete ng mga frozen beef at pork skin may COVID-19 — HK gov’t

ni Lolet Abania | February 22, 2022

Ipinahayag ng Hong Kong authorities na may natagpuan silang COVID-19 sa mga samples na nakuha sa mga packaging ng mga in-import na frozen beef mula sa Brazil at frozen pork skin na galing naman sa Poland, habang nangakong pag-iibayuhin nila ang pag-inspeksyon ng mga imported na pagkain.

Sa report, kumuha ang Centre for Food Safety (CFS) ng 36 samples para magsagawa ng testing mula sa isang batch ng tinatayang 1,100 karton ng frozen beef, na may bigat na 29 tonnes sa kabuuan, na in-import mula sa Brazil na sa dagat ibiniyahe.

Matapos nito, lumabas na ang isang outer packaging at dalawang inner packaging samples ay nagpositibo sa test sa COVID-19.

Nagkolekta rin ng 12 samples mula naman sa isang batch ng tinatayang 300 karton ng frozen pork skin, na may bigat na nasa 7 tonnes, na in-import mula sa Poland na sa dagat ibiniyahe. Lumabas din sa isang inner packaging sample na positibo ito sa test sa COVID-19.

“The CFS has ordered the importers concerned to dispose the beef and pork skin of the same batches,” ayon sa HK government sa isang statement nitong Lunes. “In addition, the CFS will step up the sampling of similar products for testing,” dagdag ng gobyerno ng HK.

Magtagal nang nagmo-monitor ang Hong Kong government ng mga frozen food imports simula pa noong mid-2020, kung saan natagpuan ang mga positive samples ng COVID-19 mula sa pomfret fish packaging noong Agosto 2021 at sa cuttlefish packaging naman noong Nobyembre 2021.

“COVID-19 is predominantly transmitted through droplets and cannot multiply in food or food packaging, and that it is unlikely that it can be transmitted to humans via food consumption,” ayon sa HK authorities.

Gayunman, pinayuhan naman ang publiko na dapat na ihiwalay nang maayos ang mga raw food na kanilang mabibili, magsagawa ng tamang hygiene rules at lutuing mabuti ang mga pagkain.

Samantala, ang global financial hub ay nag-deploy na ng isang “dynamic zero COVID” strategy na katulad ng sa mainland China na layong labanan ang mga outbreaks sa anumang paraan.

Nasa high alert na rin ang mga awtoridad dahil anila, ang bagong wave ng impeksyon ay napatunayang mahirap na ikontrol.

Batay sa ulat, ang bilang ng kanilang daily infections ay matinding tumaas ngayong taon, kung saan umabot na ang nai-record sa 7,533 cases nitong Lunes, habang walang humpay ang mga testing ng naturang gobyerno at napupuno na rin ang mga ospital at kanilang quarantine capacities.