‘Pinas at 8 pang bansa, puwede na ulit sa Hong Kong simula sa Abril 1

ni Lolet Abania | March 21, 2022

Plano nang luwagan ng Hong Kong ang ipinatutupad na ilang COVID-19 restrictions, gaya ng pag-alis ng mga flight ban mula sa siyam na bansa, kabilang na rito ang Pilipinas simula sa Abril.

Gayundin, babawasan nila ang itinakdang quarantine time para sa darating na mga dayuhan, habang magbubukas na ulit ang klase kanilang mga eskuwelahan.

Ito ang inianunsiyo ngayong Lunes ni Chief Executive Carrie Lam, kung saan dahil sa mahigpit na restriksyon kontra-COVID-19, napakaraming kritisismo ang kanilang natanggap mula sa mga residente ng Hong Kong na ilan sa mga ito ay nanatili doon ng dalawang taon.

Sinabi ni Lam sa isang news briefing na babawiin na ang flight ban simula Abril 1, habang ang pagsasailalim sa hotel quarantine para sa mga darating na dayuhan ay gagawing pitong araw na lamang mula sa dating 14-araw kung ang indibidwal ay negatibo sa test sa COVID-19.

Ayon pa kay Lam, sa Abril 19 ay ipagpapatuloy naman ang face-to-face classes sa mga paaralan sa Hong Kong matapos ang Easter holidays habang ang mga public venues kabilang na ang sports facilities ay muling bubuksan sa Abril 21.

Matatandaang isinara ng Hong Kong ang kanilang border noong 2020, habang iilang flights lamang ang maaaring makalapag sa airport at halos walang pasahero na pinapayagang makabiyahe, kung saan lubhang na-isolate ang lugar sa kabila ng reputasyon nito bilang tinatawag na global financial hub.

Maging ang mga mamamayan ay pahirapan din na agad makabalik sa naturang Chinese ruled territory.

Nitong Pebrero, naging problema ng Hong Kong ang muling pagdami ng naitatalang kaso ng COVID-19 dahil sa mas nakahahawang Omicron variant.

195 OFWs sa Hong Kong, may COVID-19 – OWWA

ni Lolet Abania | March 10, 2022

Umabot na sa 195 ang bilang ng mga overseas Filipino workers (OFWs) sa Hong Kong na tinamaan ng COVID-19, ayon sa Overseas Workers Welfare Administration (OWWA) ngayong Huwebes.

Sa isang radio interview, sinabi ni OWWA Administrator Hans Leo Cacdac na nakatakdang magbigay ang gobyerno ng assistance sa mga apektadong Pinoy workers sa Hong Kong.

“By the way it stands at 195, ‘yung COVID-19 case and more than half of them are staying in their employer home isolation facility,” ani Cacdac. Ayon sa opisyal, ang 10 OFWs naman na may COVID-19 ay nasa mga ospital.

Gayundin aniya, tinatayang nasa 53% ng mga infected na OFWs ay sumailalim na sa home isolation facility ng kanilang employers habang ang natitirang iba pa ay nasa pasilidad ng Hong Kong government, non-government organizations, at OWWA.

Sinabi rin ni Cacdac, na ang mga OFWs mula Hong Kong na nakabalik na sa Pilipinas ay makatatanggap ng livelihood at iba pang assistance mula sa pamahalaan, kabilang dito ang college scholarship aid para sa kanilang mga anak.

OFW sa Hong Kong na tinamaan ng COVID-19, umabot na sa 190

ni Jasmin Joy Evangelista | March 2, 2022

Umabot na sa 190 overseas Filipino worker ang tinamaan ng COVID-19 sa Hong Kong, ayon sa Philippine Consulate General in Hong Kong.

Ayon kay labor attache Atty. Melchor Dizon, nasa 16 na OFW ang naka-recover sa COVID-19 habang ang iba ay nagpapagaling pa sa isolation facilities.

Para sa mga OFW na hindi makabalik kaagad sa kanilang mga employer matapos ang pagkakaroon ng virus, may inilaan na boarding house ang Philippine Overseas Labor Office para sa mga ito.

Ayon pa kay Dizon, mayroong tatlong OFW na kanilang na-assist kung saan kinausap nila ang employer ng mga ito dahil nag-alangan umanong tanggapin sila matapos magpositibo sa COVID-19.

"Wala pa kaming reports na sila ay tinerminate. Ang termination dito ay kailangang i-report sa immigration. Hindi puwede 'yung basta lang ite-terminate," ani Dizon.

Sakaling mag-terminate ng OFW na nagka-COVID-19 ang employer, magbabayad ito ng penalty na HK$100,000.