Pasyente, di pababayaan kahit may kilos-protesta — PAPO

ni Jasmin Joy Evangelista | August 30, 2021

Matapos makiusap ng Philippine Alliance of Patient Organizations (PAPO) na sana'y hindi makompromiso ang kapakanan ng mga pasyente sa pagsasagawa ng mga health workers ng kilos-protesta kaugnay sa hindi naibibigay na allowance at benepisyo, tiniyak ng grupo na hindi nila pababayaan ang mga pasyente.

"Alam naman nila na pinapangalagaan namin sila. Hindi lamang ito para sa aming pansariling kapakanan pero kasama din po sila," ani Alliance of Health Workers President Robert Mendoza.

"Sa gagawin naming ito para mabigyan sila ng quality care para sa pangangalaga sa ating mga pasyente ay 'di natin sila pababayaan," dagdag niya.

Kasabay nito, sinabi ng PAPO na nakikisimpatya naman sila sa mga health workers sa laban ng mga ito.

"Ang aming fear ay mahinto ang serbisyo at 'di agad matugunan ang pangangailangan ng pasyente," sabi ni PAPO President Girlie Lorenzo.

"Sana, maisipan ng mga nagpoprotesta na grupo ng healthcare workers na hindi naman papabayaan, mayroon pa ring skeleton force kung kaya nandiyan para hindi naman zero ang care," dagdag niya.

Nakatakdang magsimula ngayong Lunes ang "mass walkout" ng mga health workers bilang protesta sa gobyerno na hindi pa anila nagbibigay ng kanilang nararapat na benepisyo.

67 healthcare workers sa Tuguegarao City, may COVID

ni Lolet Abania | August 14, 2021

Nasa 67 healthcare workers ang nagpositibo sa test sa COVID-19 habang isa ang naitalang tinamaan ng Delta variant sa Tuguegarao City sa Cagayan.

Sa Laging Handa briefing ni Tuguegarao City Mayor Jefferson Soriano ngayong Sabado, sinabi nitong sa 77 frontliners, 67 healthcare workers ang nagpositibo sa swab test sa virus at karamihan sa kanila ay asymptomatic at symptomatic mild cases lamang.

“We have a Delta variant case as of the other night as confirmed to me by the DOH [Department of Health]. But I am sure it is not only one, because the patient was with other members in their household that tested positive,” ani Soriano. “But I’m almost sure, we have more than one Delta variant in Tuguegarao City,” dagdag niya.

Ayon kay Soriano, ang isang kaso ng Delta variant ay nakarekober na habang patuloy ang contact tracing sa mga naging close contacts ng pasyente. Sinabi rin ng mayor na mayroong 773 active COVID-19 cases ang Tuguegarao at nasa 63 ang bagong kaso na nai-record nitong Biyernes.

“We have an occurring problem regarding our healthcare utilization rate, as well as the staff who will monitor our isolation units. Hospitals and isolation units are in full capacity,” saad ni Soriano.

Umapela naman si Soriano sa national government para sa nakalaang cash aid sa 22,790 pamilyang apektado sa Tuguegarao City dahil sa enhanced community quarantine (ECQ), kung saan isinailalim ang lugar sa pinakamahigpit na restriksiyon mula Agosto 12 hanggang 21.

Gayunman, ayon kay Soriano, mahigit sa 30,000 indibidwal sa kabuuang 75,000 na naka-register sa vaccination program ng siyudad ang nabakunahan na. “In the A1 [healthcare workers] category, 78% were vaccinated. In A2 [senior citizens] we had a difficulty, only 61% of the more than 20,000 senior citizens were vaccinated. In the A3 category [persons with comorbidity], we have 95% vaccinated. We are already at A4 [frontline personnel in essential sectors] with 27%,” ani Soriano.

P9.02 B allowance ng mga health workers, ibibigay na

ni Lolet Abania | June 27, 2021

Pinal nang nai-release ng Department of Budget and Management (DBM) ang P9.02 bilyong pondo ng Department of Health (DOH) para sa special risk allowance (SRA) na nakalaan sa mga medical workers sa buong bansa na inaasahang maibigay nang hanggang Hunyo 30, 2021.

Ayon kay DBM Assistant Secretary Kim Robert de Leon sa interview ngayong Linggo, nai-release na ng ahensiya ang pondo para sa DOH noong Hunyo 25, kung saan matatanggap ang monthly allowance na hanggang P5,000 ng mahigit 300,000 health workers ng parehong mga pribado at pampublikong ospital na nangangalaga sa mga COVID-19 patients.

Sinabi rin ni De Leon na nakasakop ang monthly allowance ng mula Disyembre 2020 hanggang June 30, 2021. “Maaasahan ng mga health workers na maire-release ng DOH ang SRA hanggang June 30, 2021,” ani De Leon.

Sa tanong kung kakayaning matapos ito at maibigay ang mga allowance ng health workers sa natitirang tatlong araw, ani De Leon, “They (DOH staff) are starting to process na beginning Friday para masiguro na magagamit ito definitely by June 30.”

Paliwanag pa ni De Leon, ang pera para sa SRA ay nanggaling sa hindi nagamit o natirang pondo mula sa Bayanihan 2 Law o “Bayanihan to Recover as One Act,” na nakatakdang mag-expire sa Hunyo 30.