Sa pagtugon sa COVID-19 pandemic.. Kung nagkulang ako, sorry — P-Duterte

ni Lolet Abania | September 8, 2021

Ipinahayag ni Pangulo Rodrigo Duterte na ginagawa niya ang lahat para matugunan ang problema sa pandemya ng COVID-19 sa bansa habang humingi ito ng paumanhin para sa iba na sa tingin nila ay nagkukulang siya.

“Sabihin ko sa inyo, iyong oath of office ko, talagang tinupad ko. Kung sabihin ninyo [na] ako ang nagkulang, eh sorry. Ginawa ko ang lahat ko,” ani P-Duterte sa isang taped address na ipinalabas nitong Miyerkules nang umaga. “Kung ang lahat ko ay kulang pa, patawad po. ‘Yun lang talaga ang kaya ko,” sabi pa ng Pangulo.

Umapela naman si Pangulong Duterte sa mga healthcare workers na dagdagan ang kanilang pasensiya hinggil sa pagkaantala ng pagre-release ng mga allowances na para sa kanila sa gitna ng pandemya, aniya ang kanilang benepisyo ay agad na ibibigay kapag na-secure na ng gobyerno ang pondo para rito.

“Gusto ko ring ipaabot sa health workers na alam mo sa totoo lang, kung may pera lang talaga, hindi namin pigilan, ibigay namin lahat ‘yan total anuhin namin ang pera sa kamay namin?” saad ng Pangulo.

“Give us time to adjust the finances because we had to collate whatever was left or available under Bayanihan 1 and 2 [laws]. Kaunting pag-unawa po kasi kung meron talaga, bakit hindi namin ibigay?” dagdag ni P-Duterte.

Aminado naman si Department of Health Secretary Francisco Duque III, na naroon din sa briefing, na ang pamahalaan ay patuloy na naghahanap ng pondo para sa meals, accommodation and transportation (MAT) allowances ng mga healthcare workers sa gitna ng COVID-19 pandemic.

“The needed MAT allowance, the DBM and DOH are currently looking for funds for these benefits so we can grant them to health workers in both public and private hospitals,” sabi ni Duque.

Ayon kay Duque, mula sa Setyembre 2020 hanggang Hunyo ngayong taon, nakapag-release na ang gobyerno ng P14.3 bilyon halaga ng benepisyo para sa mga health workers.

Simula noon, sinabi ng kalihim na ang pamahalaan ay nakapag-release rin ng P311 milyon at P888 milyon para sa special risk allowance (SRA) ng mga health workers.

Agad namang nakapagbigay ng SRA ang gobyerno matapos na ang mga health workers ay nagprotesta at nagbantang magre-resign habang ang bansa ay patuloy sa pagsirit ng kaso ng COVID-19.

Gayunman, parehong sina Pangulong Duterte at Duque ay hindi binanggit na ang tinatayang nasa P6.4 bilyon halaga ng hindi nagamit na pondo sa Bayanihan 2 law ay reverted na o ibinalik sa Bureau of Treasury matapos na ang naturang batas ay mag-expire nitong Hunyo 30.

Sa ngalan daw ng delicadeza…Duque, resign! – Health workers

ni Jasmin Joy Evangelista | September 2, 2021

Nanawagan ang mga health workers na magbitiw na sa puwesto si Health Secretary Francisco Duque III sa ngalan ng delicadeza sa malawakang protestang idinaos nila kahapon.

Kasama sa mga nakilahok sa protesta ang mga manggagawa mula Jose R. Reyes Memorial Medical Center (JRRMMC), National Kidney and Transplant Institute (NKTI), Philippine General Hospital, Research Institute for Tropical Medicine at Tondo Medical Center.

Sila ay nagmartsa patungong tanggapan ng Department of Health (DOH) sa Maynila para hilingin ang pagbibitiw ni Duque dahil umano sa kabiguan ng pamahalaan na maibigay agad ang kanilang mga benepisyo.

Pero iginiit din ng mga manggagawa na hindi lang sa benepisyo nagpabaya ang DOH dahil wala rin umano silang sapat na proteksiyon sa araw-araw na pagsuong sa COVID-19.

Iilan pa lamang daw ang nakatanggap ng ipinangakong special risk allowance (SRA) sa mga health workers.

Hindi pa rin anila naibibigay ang kanilang meals, accommodation and transportation (MAT) allowance at active hazard duty pay.

Nasa P311 milyon ang pondong ibinaba para bayaran ang SRA ng higit 20,000 health workers.

Makailang beses nang ipinagtanggol ni Pangulong Rodrigo Duterte si Duque pero kamakailan, sinabi nitong tatanggapin niya kung kusang magbibitiw ang kalihim.

Nauna nang sinabi ni Health Undersecretary Leopoldo Vega na tuluy-tuloy ang ugnayan ng DOH at DBM para makakuha ng budget support sa dami ng benepisyong kailangang bayaran sa mga health workers.

Bago nito, nagdaos din ng protesta ang mga health workers noong Lunes kasabay ng Araw ng mga Bayani.

40 health workers ng St. Luke’s sa QC, nag-rally

ni Lolet Abania | August 30, 2021

Nagsagawa ng kilos-protesta ang maraming health workers mula sa St. Luke’s Medical Center (SLMC) sa Quezon City ngayong Lunes nang umaga dahil sa hindi pa pagbibigay ng kanilang COVID-19 benefits.

Tinatayang nasa 40 healthcare workers ang nagtipun-tipon sa labas ng SLMC sa Quezon City para hingin na ibigay na ang kanilang special risk allowance (SRA) at meal, accommodation, and transportation (MAT) allowance.

“Ang pakiusap namin sa publiko, humihingi kami ng suporta sa lahat kasi ‘yung ipinaglalaban namin dito, kapakanan din ng publiko,” ani SLMC QC Employees Association president Jao Clumia.

“‘Pag nawala na ‘yung ating mga healthcare workers, lalo na ‘yung mga nurses sa loob ng ospital… hindi kayo makakatapak diyan sa ER (emergency room), mamamatay kayo dahil wala na nga po, punuan na tayo,” dagdag niya.

Inaasahan din umano na ang mga health workers mula naman sa University of Santo Tomas (UST) Hospital at Lourdes Hospital ay magsasagawa rin ng katulad na protesta dahil sa hindi pagre-release ng kanilang benepisyo ngayong Lunes.