Sa panenermon sa mga doktor… Angel kay Spox Harry: “Ikaw na ba ang DOH o employer ng health workers?

ni Jasmin Joy Evangelista | September 12, 2021

Kinuwestiyon ni Angel Locsin si Presidential Spokesperson Harry Roque matapos mapanood ang kumalat nitong video na sinisigawan ang isang grupo ng mga dotor sa Zoom meeting kasama ang IATF.

Matatandaang sa naturang pulong umano ay hinarang ng Philippine College of Physicians ang plano ng IATF na paluwagin ang quarantine restrictions sa Metro Manila dahil mataas pa rin ang COVID cases, dahilan para ikagalit ni Roque.

“Naiintindihan ko ‘yung concern para makapaghanap-buhay na ang mga tao. Pero bakit [niya] sinermonan ‘yung mga medical workers natin pagkatapos ipatawag para humingi ng opinyon?” tanong ng aktres. “Di ba spokesperson siya ng presidente? Siya na rin ba [Department of Health] (DOH) o employer ng medical workers?”, ani Locsin.

Nagsalita rin si Angel tungkol sa isyu ng benepisyo ng mga health workers sa bansa na kamakailan lamang ay naging malaking usapin dahil sa pagka-delay nito.

"Ang employee may karapatan na benefits. Ibigay kaya muna ‘yung benefits na hindi pa nababayaran,” dagdag niya.

Samantala, humingi na ng paumanhin si Presidential Spokesperson Harry Roque hinggil sa naging reaksyon niya sa grupo ng mga doktor sa ginanap na meeting. Siya raw ay naging emosyonal lamang sa mga pangyayari.

Alamin: Mga panuntunan sa bagong quarantine scheme sa Metro Manila

ni Jasmin Joy Evangelista | September 11, 2021

Provisionally approved" na ang mga panuntunan sa quarantine alert level system na ipatutupad sa Metro Manila simula Setyembre 15.

Ito ay matapos muling isailalim sa modified enhanced community quarantine ang Kamaynilaan.

Dalawang quarantine classification lang ang gagawin sa mga lugar na sakop ng Metro Manila; ang ECQ at GCQ, ayon kay Presidential Spokesperson Harry Roque.

Magkakaroon daw ng apat na alert level ang pagpapatupad ng GCQ:

Sa Alert Level 4, o pinakamataas na alert level, bawal ang mga sumusunod:

* Mass gathering

* Indoor dining

* Personal care services

* Paglabas ng mga nasa edad 18 pababa at mga 65 pataas, mga may comorbidity at buntis.

20% lang din ang magiging kapasidad ng mga opisina ng gobyerno sa level na ito.

Sa Alert Level 3, papayagan ang "three C activities" o ang mga aktibidad na gagawin sa crowded na lugar, may close contact, at nasa closed o indoor areas nang may 30% capacity.

Nasa 30% naman ang papayagang capacity sa mga government office sa level na ito.

Kung Alert Level 2 naman ay papayagan ang 50% capacity, at full capacity naman kung Alert Level 1.

Nasa 50% naman ang papayagang capacity sa government offices sa alert level na ito.

Minimum onsite capacity naman ang paiiralin sa mga pribadong negosyo. Pero papayagang pumasok ang mas maraming empleyado sa Alert Level 1.

Mayroon daw option ang IATF na magdeklara ng mas mahigpit na lockdown sakaling tuluyang lumala ang sitwasyon.

Sa ginawa sa mga doktor... Naging emosyonal ako, pasensiya na – Roque

ni Lolet Abania | September 10, 2021

Humingi na ng paumanhin si Presidential Spokesperson Harry Roque hinggil sa naging reaksyon niya sa grupo ng mga doktor sa ginanap na isang pulong ng COVID-19 response task force ng gobyerno ngayong Biyernes.

Sa isang press briefing, inamin ni Roque na naging “emotional” siya matapos marinig ang proposal nina Dr. Maricar Limpin, presidente ng Philippine College of Physicians, at Dr. Antonio Dans, convenor ng Healthcare Professionals Alliance Against COVID-19, na ipatupad ang isang two-week hard lockdown.

“Kinukumpirma ko po na tayo’y naging emosyonal at pasensiya naman po kayo at tao lamang,” ani Roque. “That’s the first time that I lost my bearing in an IATF (Inter-Agency Task Force for the Management of Emerging Infectious Diseases) meeting, but as I said I may apologize and I have in fact apologized for the manner but never for the message.”

Ayon kay Roque, hindi magagawa ng gobyerno na magkaroon ng hard lockdowns dahil kailangan pa rin ng mga kababayan na kumita ng kanilang ikabubuhay at magtrabaho.

Gayundin, wala namang tigil ang pamahalaan sa vaccination efforts nito para makapagbukas na muli ang ating ekonomiya nang ligtas.

Dagdag ni Roque, nakapagbitaw lamang siya ng mabibigat na salita at nagalit sa gitna nang nakikita niya ang mga indibidwal na nakararanas ng gutom at kahirapan dahil sa mga lockdowns.

“Nagalit po talaga ako dahil sa tingin ko panahon na po na marinig ang inyong boses ng IATF. Tama na po ang lockdown, magtatagal po talaga ang COVID hindi lang sa Pilipinas kundi sa buong daigdig,” sabi ng kalihim.

Paliwanag pa ni Roque, kinakailangan na magkaroon ng balanse sa pagitan ng kalusugan at ekonomiya ng bansa.

Sa isang video na nai-post sa Twitter na naging viral, makikita si Roque habang pinapagalitan o scolding ang mga doktor sa isang meeting, kung saan sinasabi nitong ginagawa naman ng gobyerno ang kanilang tungkulin para labanan ang coronavirus.

“Do not sit there as if you are the only ones right. We’re trying to achieve total health. Who wants COVID to kill people? Are you saying that only medical frontliners are concerned about the health of the people? We all want to save lives,” pahayag ni Roque sa naturang video.

“We’re crying out loud. No one in the government wants a single life lost. No one! How dare you think that we are not considering steps to prevent the loss of lives?” dagdag pa ni Roque.

Sinabi pa ni Roque na ang IATF meetings ay dapat na maging “secret.”

Bago pa ang press briefing, sinabi naman ni Limpin na siya ay “sobrang nagulat” na galit na nag-react si Roque sa kanilang suhestiyon.

“Wala akong sinabi that can be interpreted as being arrogant,” ani Limpin sa isang interview.