COVID-19 vaccine, tuloy na… Pagbakuna kay P-Du30, secret na lang – Roque

ni Lolet Abania | December 7, 2020

Pumayag si Pangulong Rodrigo Duterte na magpabakuna kapag na-secure na ang COVID-19 vaccines emergency use authorization mula sa mga local regulators, ayon sa pahayag ng Malacañang.

Gayunman, ang vaccination ng Pangulo ay posibleng hindi masaksihan ng publiko kahit pa binibigyang-diin ng Palasyo na magdudulot ito sa lahat ng kumpiyansa sa vaccines.

“Ginawa mo namang spectacle ang Presidente,” ani Presidential Spokesperson Harry Roque sa isang press briefing ngayong Lunes.

“Hindi naman kinakailangan na ipakitang live ‘yan, but in any case, it’s the President’s decision. I will not second-guess the President,” dagdag ni Roque.

Matatandaang sinabi ni Pangulong Duterte na payag siyang magpabakuna sa harap ng publiko.

“Ako pagdating ng bakuna in public, para walang satsat diyan, in public, magpa-injection ako. Ako ‘yung maunang maeksperimentuhan. Okay para sa akin,” ayon kay P-Duterte sa isang televised address noong August 10, isang araw bago nagbigay ang Russia ng regulatory approval sa vaccine candidate na Sputnik V.

Pinag-aaralan ng bansa ang pagkuha ng mga vaccines na dinebelop ng United States, China, Russia, at ng United Kingdom kasabay ng pagtitiyak ng gobyerno na ang vaccination program ay mananatiling ipatutupad sa susunod na taon.

Samantala, noong nakaraang linggo, pinayagan na ni Pangulong Duterte ang Food and Drug Administration (FDA) na mag-isyu ng isang emergency use authorization (EUA) para sa COVID-19 drugs at vaccines. Ayon sa mga opisyal, ang EUA ang magbabawas ng processing time para sa pag-apruba ng vaccines na gagamitin locally mula anim na buwan at gagawing 21 araw na lamang.

Nationwide lockdown sa Dec. 23-Jan. 3, fake news — Roque

ni Lolet Abania | December 7, 2020

Walang katotohanan na isasailalim sa “nationwide lockdown” ang bansa sa holiday season, ayon sa pahayag ni Presidential Spokesman Harry Roque ngayong Linggo. Ito ang naging tugon ng kalihim dahil sa text message na kumakalat ngayon na sinasabing ang bansa ay ila-lockdown simula December 23 hanggang January 3. “Fake news,” sabi ni Roque sa mga reporters.

Hinimok naman ni Cabinet Secretary Karlo Nograles ang publiko na iwasan ang pagkakalat ng anumang maling impormasyon. “Do not believe fake news. Alamin ang totoo. Huwag maniwala at huwag po magkalat ng fake news lalo na ngayong panahon. Patuloy lang po tayong maging responsable sa sarili at sa pamilya,” ani Nograles.

“Please ensure you verify or ask authorities or trusted organizations about the veracity of such information before believing and passing it around. Let us not be instruments of fake news distribution,” ayon kay National Task Force Against COVID-19 Spokesman Restituto Padilla, Jr..

Una nang inanunsiyo ni Pangulong Rodrigo Duterte na ang Metro Manila, Batangas, Iloilo City, Tacloban, Lanao del Sur, Iligan, at Davao City ay mananatili sa general community quarantine (GCQ) hanggang sa katapusan ng taon upang maiwasan ang COVID-19 transmission.

Habang ang natitirang bahagi ng bansa ay mananatili naman sa modified GCQ. Ayon naman sa Department of Health (DOH), target ng gobyerno na maging quarantine-free na ang bansa sa third quarter ng 2021.

VP Leni, nakipagkamay daw, oks lang… Spox Roque: pinag-iinitan ako ng media

ni Ronalyn Seminiano Reonico | December 1, 2020

Binuweltahan ni Presidential Spokesman Harry Roque ang media na siya umano ang “pinupuruhan palagi” kaugnay ng kontrobersiyal na larawang kumalat na kuha sa isang event sa Cebu na binatikos ng mga netizens dahil sa paglabag umano ng mga tao sa social distancing protocol.

Saad ni Roque, “Ang ikinakasama ko ng loob, bakit ako pinupuruhan palagi ng Inquirer at ng ABS-CBN? Bakit noong nakikita ninyo sa screen si VP Leni na nakipag-handshake-handshake pa, oh, hindi ba violation ito ng restriction on social distancing?

“Ang tanong ko naman sa mga media na mga kasama natin, patas sana.”

Aniya pa, “Ang sa akin lang is, bakit nga ako iyong pinuruhan? Hindi ko maintindihan. Ako, nakita ko na iyong picture na ‘yan.

“Hindi naman namin pinapansin ‘yan because alam naman namin kasi, kaming mga may karanasan sa pulitika na ano’ng magagawa mo, eh, ibinibigay ‘yung kamay?”

Pahayag pa ni Roque, “Siyempre, hindi nila sisitahin si VP Leni dahil ang gusto lang nilang sitahin ay iyong mga taong gobyerno.

"Pinupuruhan lang ako dahil ako ang mukha ng Presidente, na once a week, ang Presidente nag-a-address, ako thrice a week. So I’m the face of the government as spokesperson."

Samantala, buwelta naman ng spokesman ni Vice-President Leni Robredo na si Barry Gutierrez, “Nagpa-mañanita ka sa beach, tapos si VP pa rin ang ituturo mo? Wow lang.

“I look forward to the day when officials in this administration can just be accountable, accept responsibility and commit to doing better, instead of bashing the Vice-President every time the Filipino public call out their shortcomings.”