'Di raw big deal... Harry Roque, ayaw pa ring ipakita ang RT-PCR test

ni Mary Gutierrez Almirañez | March 22, 2021

Muling tumanggi si Presidential Spokesperson Harry Roque na ipakita sa publiko ang positive result ng RT-PCR test niya matapos iulat na nagpositibo siya sa COVID-19 nitong ika-15 ng Marso, ayon sa panayam sa kanya kaninang umaga.

Aniya, “What is the big deal? Being positive is not a badge of honor. I stayed in an isolation facility. Would I do that if I was not positive? Why can’t public officials such as the presidential spokesperson be entitled to presumption of regularity of pronouncements?”

Ayon pa kay Roque, susunod siya sa kanyang doktor kapag sinabi nitong manatili siya sa nasabing quarantine facility, kahit pa siya ay asymptomatic.

Matatandaang tumanggi na rin siya noon na ipakita ang kanyang RT-PCR test at nilinaw din niya ang alegasyon na siya ay naka-isolate umano sa isang posh hotel sa Pasay.

Sa ngayon ay walong araw na siyang namamalagi sa isolation facility sa San Juan. Dagdag pa niya, hindi na siya makapaghintay matapos ang kanyang 10-day quarantine. “It is my 8th day. I am going bonkers,” sabi pa niya.

Asymptomatic naman daw… Spox Roque, gusto nang umuwi kahit positive sa COVID-19

ni Lolet Abania | March 18, 2021

Nilinaw ni Presidential Spokesperson Harry Roque ang alegasyon na siya ay naka-isolate umano sa isang posh hotel sa Pasay matapos na magpositibo sa test sa COVID-19 noong March 15, dahil aniya, nasa isang quarantine facility siya sa San Juan City.

“That [I was in a posh hotel] is fake news. I am in San Juan [city], along Annapolis Street,” ani Roque sa isang Palace briefing. “We don’t even have the means to pay for that hotel [in Pasay]. Hindi naman po ako nasa motel. This is a two-star hotel,” dagdag niya.

Ayon kay Roque, ang isang indibidwal na nagpositibo sa test sa COVID-19 ay pinapayagang mag-check-in sa isang government-accredited hotel na ginawang quarantine facility at may iba ring mga government officials na infected ng coronavirus na naka-quarantine na sa parehong pasilidad.

Kabilang dito ang isang anchor ng state broadcasting company na PTV, personnel mula sa Malacañang Accreditation and Relations Office, isang director sa opisina ni Roque at isa pang undersecretary mula sa ibang departamento.

Ayon pa kay Roque, susunod siya sa kanyang doktor kapag sinabi nitong manatili siya sa nasabing quarantine facility, kahit pa siya ay asymptomatic.

“That [isolating at home] is possible because I noticed that I am asymptomatic and people here have symptoms. I would be conferring with my doctor if I would be better off staying here or going home,” sabi ni Roque. Gayunman, matatandaang tumanggi si Roque na ipakita ang kanyang RT-PCR test na nagresulta sa COVID-19 positive.

Aniya, “I don’t think it is important.”

P-Du30, inayunan na maliit na bagay lang ang virus… Roque: COVID-19, lilipas din!

ni Mary Gutierrez Almirañez | March 16, 2021

Dinepensahan ni Presidential Spokesperson Harry Roque ang naging pahayag ni Pangulong Rodrigo Duterte noong Lunes na “maliit na bagay” lang ang COVID-19.

Saad ni P-Duterte sa kanyang public address, “Kaya natin ito. Itong COVID-19. Maliit na bagay lang ito. Marami tayong nadaanan. Huwag kayong matakot, hindi ko kayo iwanan.”

Depensa ni Roque, "Ang sinasabi po ng Presidente ay patuloy naman pong ang Pilipinas ay nabubuhay sa kabila ng COVID-19.

"Ang sinasabi ng Presidente, temporary lang 'yan, hindi po iyan forever, lilipas po iyan. At pagdating po ng bakuna, magkakaroon tayo ng solusyon sa ating problema, magkakaroon po tayo ng new normal.

"Hindi po minamaliit ng Presidente ang ating paghihirap pero ang sinasabi po niya, babangon naman po tayo r'yan, we will heal as one."

Samantala, noong Lunes, naitala ang pinakamataas na record na 5,404 bagong kaso ng COVID-19. Ngayong araw naman ay nakapagtala ang bansa ng 4,000 panibagong kaso at sa kabuuan ay umabot na sa 626,893 ang cases ng COVID-19 sa bansa. Nasa 53,479 ang aktibong kaso at 12,837 naman ang bilang ng mga nasawi.