Public address ni P-Duterte, 2 beses na-postpone dahil sa puyat

ni Lolet Abania | May 25, 2021

Muling ipagpapaliban sa ikalawang beses ngayong Martes ang regular public address ni Pangulong Rodrigo Duterte, ayon sa Malacañang.

Paliwanag ni Presidential Spokesperson Harry Roque, si Pangulong Duterte at kanyang delegasyon ay kababalik lamang sa Manila mula sa isang Regional Peace Council meeting sa Dumaguete City na ginanap nu'ng Lunes nang hapon.

“Talk to the People will be moved tomorrow. Nakauwi na kami galing Dumaguete, ala-una na. Medyo puyat po lahat, including ang mga tao sa OP [Office of the President],” ani Roque sa isang Palace briefing ngayong Martes.

“Kaya sa Wednesday ang Talk to the People,” dagdag ni Roque.

Karaniwan nang isinasagawa ang public address ni P-Duterte tuwing Lunes ng gabi, subalit ito ay na-postpone dahil sa pulong nito sa Dumaguete.

Matatandaang noong May 17 sa naganap na Talk to the People, nakasama ni Pangulong Duterte si Senate President Juan Ponce Enrile na 97-anyos na, bilang kanyang guest upang talakayin ang isyu sa West Philippine Sea.

Dahil sa naging mga pag-uusap at mahabang paliwanag ni Enrile, tumagal ang taped address ng Pangulo kung saan ipinalabas ito at hinati sa dalawang bahagi.

Ang part 1 ay noong May 17 ng gabi at ang part 2 ay May 18 naman ng tanghali.

Sa kabila ng patuloy na pananatili ng mga Chinese sa paligid ng Exclusive Economic Zone (EEZ) ng Pilipinas na nasa West Philippine Sea, sinusuportahan ni Enrile ang posisyon ni P-Duterte na hindi dapat kalabanin ang China.

Fishing ban ng China sa WPS, tablado sa M'cañang

ni Ronalyn Seminiano Reonico | May 21, 2021

Tiniyak ng Malacañang sa mga mangingisdang Pinoy na walang magiging problema at maaari silang magpatuloy sa pangingisda sa West Philippine Sea (WPS) sa kabila ng ipinatupad na fishing ban ng China sa ilang bahagi ng karagatan.

Siniguro rin ng Palasyo na poprotektahan ang mga Pilipino ng Philippine Coast Guard (PCG).

Pahayag ni Presidential Spokesperson Harry Roque, “D’yan lang po kayo sa ating mga traditional fishing grounds.

"Nandiyan naman po ang ating Coast Guard para pangalagaan din po ang interes ng ating mga mangingisda.”

Diin pa ni Roque, “Wala pong extraterritorial application ang batas ng mga dayuhang bansa.”

Samantala, una nang naghain ng diplomatic protest ang Department of Foreign Affairs laban sa ipinatupad na fishing ban ng China sa South China Sea simula noong Mayo 1 hanggang Agosto 16.

Tine-testing pa lang kasi… COVID-19 vaccines, 'di for sale — Roque

ni Lolet Abania | May 18, 2021

Hindi ipinagbibili ang mga COVID-19 vaccines sa Pilipinas, ayon kay Presidential Spokesperson Harry Roque.

Ito ang nilinaw ni Roque matapos na ianunsiyo ni Philippine Red Cross (PRC) chairperson Senator Richard Gordon na ang PRC ay maniningil ng P3,500 para sa dalawang doses ng Moderna vaccine.

Gayunman, ipinaliwanag ng PRC na hindi ito para magbenta ng bakuna sa kanilang mga miyembro at donors kundi bayad ang P3,500 sa mga syringes, personal protective equipment, mga pagkain, at iba pang gastusin na may kaugnayan sa vaccination.

"Ang pangako po ni Presidente, ibibigay ang bakuna nang libre. Babayaran po ito ng ating gobyerno," ani Roque sa isang Palace briefing ngayong Martes.

Ayon sa kalihim, ang mga COVID-19 vaccines na kinuha ng private sector sa ilalim ng isang tripartite agreement kasama ang gobyerno ay gagamitin ng mga pribadong kumpanya para sa kanilang mga empleyado. "Wala pong dapat magbenta [ng bakuna] kasi wala pa pong general use authority ang kahit anong brand ng bakuna," sabi ni Roque.

Ang mayroon pa lamang ay emergency use authority (EUA) na isang garantiya kung saan ang bakuna ay ligtas at ang efficacy nito ay mula sa Food and Drug Administration (FDA).

Gayundin, ang EUA ay hindi nagbibigay ng awtorisasyon para sa commercial sale dahil lahat ng COVID-19 vaccines ay patuloy pa ring sumasailalim sa human trials.

Ang FDA ay nagbigay na ng emergency use authority sa mga vaccine brands tulad ng Pfizer-BioNTech, AstraZeneca, Sinovac, Sputnik V, Janssen, Covaxin, at Moderna.

Sa mga ito, ang Janssen, Covaxin at Moderna ang hindi pa nai-deliver sa bansa.

Sa ngayon, mayroon na ang bansa ng pitong milyong doses ng COVID-19 vaccine supply. Sa bilang na ito, apat na milyong doses ang nailabas na habang nakapag-administer naman ng 3 milyong doses ng COVID-19 vaccines.