Hamas, pumalag sa pagtatanggal ng armas

by Jenny Rose Albason @World News | February 10, 2026

Photo FIle: Hamas political leader Khaled Meshaal - Ilkha - Circulated

KInontra ng Hamas ang panawagan na sila ay tanggalan ng armas.

Ayon kay Hamas political leader Khaled Meshaal, kapag inalis ang kanilang mga armas ay magiging madali umano silang patayin ng Israel. Sinabi rin niya na handa ang Hamas na tumugon sa panawagan para sa isang total ceasefire, subalit iginiit na ito ay paulit-ulit na nilalabag ng Israel.

Hinihiling din ng grupo ang agarang muling pagsasaayos at rehabilitasyon ng Gaza matapos ang matinding pagkasira na dulot ng mga pag-atake ng Israel.

Magugunitang nagtulong-tulong ang ilang bansa, kabilang ang Qatar, Turkiye at Egypt, upang maisulong ang mapayapang pag-uusap sa pagitan ng Hamas at Israel.

Pinangunahan naman ng Estados Unidos ang negosasyon ng dalawang panig, na humantong sa kasunduan para sa pagpapalitan ng mga bihag at muling pagbubukas ng Rafah crossing.

Israel, sinisiguro ang tagumpay vs Hamas at Hezbollah bago ang US election

ni Angela Fernando @World News | Oct. 19, 2024

Photo: Israeli army via AFP / Handout

Sinisiguro ng Israel na magbibigay sila ng pinakamatinding pinsala sa Hamas sa Gaza at Hezbollah sa Lebanon, at sinasamantala rin ang pagkakataong magtatag ng mga de facto buffer zones bilang hakbang upang bumuo ng hindi mapapalitang reyalidad bago ang halalan sa United States (US) at ang pagdating ng mauupong pangulo sa Enero, ayon sa walong sources na nakapanayam ng international news agency na Reuters.

Matatandaang naging malaking tagumpay para sa Israel ang pagkasawi ng lider ng Hamas na si Yahya Sinwar, ngunit tinitingnan din ng mga namumunong Israeli ang mga planong magdadala sa kanila sa tiyak na tagumpay na lampas pa sa kayang abutin ng militar ng bansa.

Samantala, plano ng nasabing bansa na paigtingin ang operasyong militar laban sa Hezbollah at Hamas, at matiyak na hindi muling makakapag-organisa ang kanilang mga kalaban, pati na ang pangunahing tagasuporta nito, ang Iran, at hindi na makapagbabanta sa mga mamamayang Israeli.

Opisyal ng Hamas, may inihirit sa usaping tigil-putukan

ni Angela Fernando @World News | June 14, 2024

Nagsalita na ang isang opisyal ng Hamas at sinabing walang may alam kung ilan sa kanilang mga hostages na Israeli ang buhay pa at ang anumang kasunduang palayain sila ay dapat maglaman ng garantiyang permanenteng ceasefire at ang kumpletong pag-atras ng mga pwersa ng Israel mula sa Gaza.

Ang tagapagsalita ng Hamas at miyembro ng political bureau na si Osama Hamdan ay nagbigay ng pananaw hinggil sa posisyon ng kanilang samahan sa mga nakabinbing usapin ng tigil-putukan, isang opinyon kung nagsisisi ba ang Hamas sa kanilang desisyon na lumaban sa Israel sa gitna ng patuloy na pagtaas ng bilang ng mga namamatay na Palestinian.

Pinaniniwalaan ng United States na ang Hamas ang may hawak ng susi sa mga usapan. Binigyang-diin na rin ng US Sec. of State na si Antony Blinken sa NBC nu'ng Huwebes na kailangan ng huminto ang giitan at nananawagan sa chief ng Gaza na si Yahya Sinwar, na tapusin na ang digmaan.

Matatandaang sinabi ni Hamdan na ang pinakabagong alok ng Israel na unang inihayag ni US Pres. Joe Biden nu'ng Mayo ay hindi angkop sa hinihingi ng kanilang grupo.

Kinumpirma ni Hamdan na kailangan ng Hamas ng malinaw na posisyon mula sa Israel upang tanggapin ang alok na tigil-putukan, isang kumpletong pag-atras mula sa Gaza, at hayaan ang mga Palestino na magtakda ng kanilang sariling kinabukasan at magiging handa ang grupong pag-usapan ang isang makatarungan deal tungkol sa palitan ng mga bihag.