Virtual Christmas party, alternatibo sa pagdiriwang ng Pasko at Bagong Taon ngayon pandemic

ni Grace Poe - @Poesible | December 21, 2020

Kakaiba ang magiging pagdiriwang natin ng Pasko ngayong taon. Pinapaalala sa atin ng pamahalaan na hindi pinapahintulutan ang pagtitipon ng higit sa sampung tao ngayong Kapaskuhan. Ito ay para sa kaligtasan ng lahat dahil sa panganib na dala ng COVID-19. Dahil delikadong magtipun-tipon dahil baka ito pa ang pagmulan ng pagkakahawa-hawa ng impeksiyon, mainam na lumagay tayo sa ligtas.

Nauuso ang pagkakaroon ng virtual Christmas parties at ng e-numan. Sa pamamagitan ng internet, tuloy pa rin ang kasiyahan ng mga tao. Ngayong hindi posible na maglibot para mamasko, puwede pa ring iparamdam ang ating pagmamahal at pag-alala sa ating mga mahal sa buhay sa pamamagitan ng pagtawag sa kanila, video o audio call man, o kaya ay pagpapadala ng pagbati sa text man o ibang paraan.

Ngayong Pasko, sana’y isapuso ng bawat isa ang tunay na kahalagahan ng pagdiriwang na ito: ang pagmamahal sa kapwa tao.

Maligayang Pasko sa inyo at sa inyong pamilya, mga bes!

◘◘◘

Maagang pamasko sa ating mga kababayang dumaraan sa NLEX ang pagresolba, bagama't panandalian ng problema sa cashless transactions. Itinaas ang ilang barriers sa toll gates na nagdudulot ng traffic. Nagbukas muli ng cash lanes kaya hindi na kailangang makunsumi ng mga kababayan natin dahil down ang system ng paglo-load.

Sa ating naging pagdinig sa isyu ng cashless transactions sa ating tollways, lutang ang naging kakulangan ng Toll Regulatory Board (TRB), ang ahensiya ng gobyerno na responsable para sa regulasyon ng ating tollways. Lumalabas, hindi nila pinag-aralan nang husto ang ipinatupad na mandatory cashless transactions. Ang resulta, kaguluhan sa ating expressways na parusa sa ating mga kababayang dumaraan dito.

Ang ating mga motorista naman ay handang sumunod sa cashless transactions. Ang kaso, sila pa ang pinahirapan para makakuha ng RFID stickers. Ang mismong sistema ng loading, problematiko. Sa halip na makaginhawa, aberya ang inabot ng mga sumunod sa itinakdang pagbabago.

Lumabas sa ating pagdinig na may itinakdang undersecretary ng Department of Transportation para tumutok sa TRB at magreport nito sa Secretary ng nasabing ahensya na siyang chairman ng board. Ang kaso, hindi nagawa ang dapat gawin, kaya pasa-pasa ng sisi. Idinidiin ang Executive Director para sa hindi nagawa ng mga ahensya. Sa ganitong pagkakataon, dapat manaig ang command responsibility. Panindigan natin ang responsabilidad ng bawat isa.

Ang problema, naging insensitibo ang TRB sa reklamo at hinaing ng mga tao. Kung hindi pa nagpataw ng suspensiyon ang City Government of Valenzuela sa pamumuno ni Mayor Rex Gatchalian, patuloy ilang ipipilit ang kanilang maling gawain na nagpapahirap sa ating taumbayan.

Kung hindi epektibo, panahon na para balasahin ang nasa pamunuan ng TRB. Kailangan natin ng pinuno rito na gagawa ng kanilang trabaho para sa kapakanan ng taumbayan.

Sa 'Pinas lang palpak ang cashless transactions sa expressways!

ni Grace Poe - @Poesible | December 14, 2020

Ang bilis ng panahon. Akalain mo, labing-anim na taon na pala mula noong iniwan tayo ni Fernando Poe, Jr. Labing-anim na taon na pala akong ulila sa ama. Taun-taon, nagsasama-sama ang pamilya at mga kaibigan sa misa sa kanyang puntod sa North Cemetery para sa pagtitipon, bagay na hindi natin maisasagawa ngayong taon dahil sa pandemya. Iba na rin, dahil hindi na rin natin kapiling si Father Larry Faraon, ang malapit na kaibigan ni FPJ na palaging nagmimisa sa okasyong ito, na sumakabilang-buhay na.

Para alalahahin ang anibersaryo ng kamamatayan ni Da King, maghahatid tayo ng ating munting handog sa ilang kababayan nating malapit sa kanyang puso sa Isla Puting Bato sa Tondo. Matatandaang, itinampok ni FPJ ang lugar na ito sa pelikula niya.

Hindi man tayo pisikal na magkakapiling ngayong araw, nagpapasalamat tayo sa lahat ng nakakaalala kay FPJ. Panatilihin nating buhay ang kanyang alaala sa pamamagitan ng pagpaparamdam ng ating malasakit sa kapwa lalo na sa panahong ito na maraming nangangailangan ng pagkalinga.

◘◘◘

Marami sa ating mga kababayan na nagbibiyahe sa tollways ang nagrereklamo dahil sa depektibo o hindi gumaganang sensors ng RFID. Bukod sa nawalang kita at abala sa pagpila para makabitan ng sticker, nagdudulot pa ng traffic ito kapag hindi gumana ang sensor kahit may sticker na. Ang ganitong pagsisikip sa daan at pahirap sa taumbayan ang naging basehan ng pamahalaang lungsod ng Valenzuela sa pamumuno ni Mayor Rex Gatchalian para suspendihin ang business permit ng NLEX.

Noong isang linggo, naghain tayo ng resolusyon sa Senado para ipatawag ang Department of Transportation tungkol sa usapin ng implementasyon nito ng cashless transactions sa ating expressways. Ang problema, mismong operators ng tollways natin, mukhang hindi handa, kaya sa halip na bumilis ay lalong tumagal ang biyahe ng mga kababayan natin lalo na sa NLEX.

Pangunahing inirereklamo ng mga dumaraan sa NLEX ang depektibong RFID sensors. Nagdudulot ng pagsisikip ng trapiko ang ilang ulit na atras-abante at paglipat pa ng lane para mabasa ng sensor ang sticker. Sumunod rito ang limitadong opsyon para sa pagloload dahil down ang system.

Para sa mga kababayan nating nakapagbiyahe na sa ibang bansa at naranasang dumaan sa expressways dito, napakalaki ng pagkakaiba ng sistema ng RFID. Tanging sa Pilipinas lang yata kailangang magbagal nang husto papalapit sa istasyon ng RFID sensor. Sa mauunlad na bansa, dire-diretso lang ang sasakyan. Dito, kung hindi makuha ng sensor ang frequency ng sticker, ni hindi aangat ang barrier.

Bilang pangunahing tagapangasiwa ng transportasyon, nais nating alamin sa DOTr kung paano nila balak ayusin ang gulong ito. Hindi dapat nagbabangga ang pamahalaang lokal at ang toll operator kung naisaayos agad ang suliraning ito. Sa pagdinig na isasagawa sa Committee on Public Services na ating pinamumunuan, hihingin natin mula sa regulador ang kanilang plano para ayusin ang gusot sa cashless transactions sa ating expressways.

Tuloy pa rin ang Pasko kahit walang magarbo’t malalaking selebrasyon

ni Grace Poe - @Poesible | December 7, 2020

Hello, mga bes! Kumusta po kayo at ang inyong mga pamilya at mahal sa buhay ngayong araw?

Akalain mo, ganun-ganun lang, Disyembre na at magpa-Pasko na. Parang kailan lang, usung-uso pa ang Dalgona coffee at tinitimpla ng lahat sa mula ng quarantine. Ngayon, magdiriwang tayo ng pinakamahalaga at pinakamalaking okasyon na may ‘bagong normal’.

Ngayon pa lamang, nagpaplano na ang marami sa ating mga kababayan kung paano ipagdiriwang ang Pasko sa gitna ng panganib na dala ng coronavirus. Pinaaalalahanan ang lahat ng magsagawa ng ibayong pag-iingat. Huwag nating sayangin ang ilang buwang pagtitiis para makontrol ang paglaganap ng virus sa ating pamayanan. Kung maaaring limitahan ang pagdiriwang sa loob ng ating mga tahanan lamang at iwasan ang malakihang pagtitipon, gawin natin ito. Napakaraming kaso na ang nakita natin sa ibang bansa at dito rin sa atin ng mga reunion o party na nagdulot ng pagkalat ng coronavirus infection dahil sa asymptomatic carriers. Maging responsable tayo dahil hindi lamang sarili natin ang apektado kung hindi ang ating buong komunidad.

Tuloy pa rin ang Pasko kahit wala ang garbo ng malalaking selebrasyon. Kung may biyaya ang pandemyang ito, ito ay ang matanto ng bawat isa kung ano ang mahalaga sa buhay. Wala sa Christmas party ang saya ng okasyon kung hindi sa pagmamahalan at pagbibigayan, na maaari nating gawin sa loob ng ating mga tahanan.

◘◘◘

Ngayong araw, magsasagawa ng pagdinig ang Senate Committee on Public Services na ating pinamumunuan tungkol sa aplikasyon ng prangkisa ng telecommunications company sa ating bansa. Kabilang sa nakasalang para sa renewal ng prangkisa nito ang Dito Telecom na inaasahan ng lahat na maging third player sa telecom industry.

Kung matatandaan ninyo, nangako ang Dito Telecom na maghahatid ito ng minimum speed ng 27 mbps at maghahatid ng serbisyo sa mga lugar na wala o kulang ang internet sa ating bansa. Tatanungin natin sa nasabing kumpanya kung ano na ang update tungkol rito.

Lahat na ng puwedeng gawin ng Senado para mapabilis ang internet, ginawa na natin. Nagbigay-daan tayo para sa mapabilis ang pagbibigay ng mga permit sa pagtatayo ng cell towers at iba pang imprastruktura na kailangan para maisaayos ang serbisyo ng internet. Gayunman, tila hindi pa rin nararamdaman ng ating mga kababayan ang mga ipinangakong pag-ayos at pagbilis ng kanilang koneksiyon.

Nababahala tayo dahil tila hindi makahanap ng tuluy-tuloy na solusyon sa problema ng internet at signal ang ating telecom companies. Sa kabila ng pagkakatanggal ng maraming permit requirements sa pagtatayo ng cell towers sa ilalim ng Bayanihan to Recover as One Act 2, hindi pa rin natin nakikita ang pagbilis ng serbisyong inaasahan natin.

Gusto nating magtagumpay ang lahat ng ating telecom companies sa paghahatid ng mabuting serbisyo sa ating mamamayan lalo pa ngayong panahon ng pandemya na lahat ay nakaasa sa serbisyo ng internet at cellphone para sa komunikasyon.

Gayunman, kailangang patunayan ng mga kumpanyang ito na karapat-dapat sila sa prangkisang ipinagkakaloob sa kanila. Ang bawat prangkisa ay prebilehiyo at hindi lamang basta-basta dapat ibigay. Tungkulin nating piliin ang pagkakalooban nito dahil kapakanan ng publiko ang nakasalalay rito.