Walang dapat masayang na pondo, lalong wala dapat maibulsa

ni Grace Poe - @Poesible | August 16, 2021

Dumating na nga ang inaasahang pagtaas ng COVID-19 infection sa ating bansa. Noong Sabado, nakapagtala tayo ng mahigit 14 milyong kumpirmadong kaso, at hindi pa kumpleto ito dahil may mga laboratory na hindi nakapagpasa ng kanilang ulat. Naglalabas na ng anunsiyo ang maraming ospital na puno na ang pasilidad nila at hindi na makapag-a-admit ng COVID-19 patients.

Pinahaba ang Enhanced Community Quarantine (ECQ) sa ibang lugar bilang mabilisang solusyon para pabagalin ang transmisyon ng impeksiyon sa mga lokalidad. Kahit marami ang umaalma sa paulit-ulit na lockdown na walang kasamang testing at walang suporta sa mga apektadong industriya at kabuhayan. Sa gitna nito lumabas ang findings ng Commission on Audit ng mga pagkukulang sa paggamit ng 67.32 bilyong COVID-19 fund ng Department of Health (DOH).

Naglaan ang pamahalaan ng pondo sa Department of Health (DOH) para magamit sa ating COVID-19 response.

'Yun lang, lumalabas na hindi agad nagamit ang pondo o kaya natengga lamang. Sa panahong napakarami sa ating mga kababayan ang naghihintay ng aksiyon mula sa DOH, hindi naman pala umabot sa implementasyon ang pinaglaanan natin ng budget.

Dahil dito, naghain tayo ng panukala na imbestigahan ang mga pagkukulang ng DOH base sa COA report, kabilang na ang paggamit ng pondo hindi sa pinaglaanan nito, maling pagcha-charge ng mga transaksiyon, kaduda-dudang likuwidasyon, pagbili nang walang legal na basehan, at iba pang mga bagay na nais nating maging malinaw.

Isa sa mga kumalat sa social media ang dokumento para sa pagbili ng apat na laptop na binayaran ng DOH ng P700,000. Pinagpistahan ito ng netizens dahil pinalobo ang halaga ng nasabing computer units. Sa panahon ng pandemya na ang ating healthcare workers na araw-araw sumusuong sa panganib ng impeksiyon ay hindi nakatatanggap ng wastong hazard pay sa tamang oras, insulto ang ganitong mga anomalya sa nasabing ahensiya.

Ang magsawalang-bahala sa gitna ng paghihirap ng bansa ay malaking kamanhiran.

Bilang mambabatas, ginagawa natin ang lahat para magkaroon ng pondo ang mga programa ng bawat ahensiya ng pamahalaan para makapaghatid ng serbisyo sa ating mga kababayan. Ito ay pera ng mga tao na dapat ibalik sa kanila sa pamamagitan ng paglilingkod. Hindi ito dapat masayang, at lalong hindi dapat maibulsa ng mga walang malasakit sa kapwa.

Kupad ng PHILHEALTH, pahamak!

ni Grace Poe - @Poesible | June 28, 2021

Nagluluksa ang sambayang Pilipino sa pagpanaw ni dating Pangulong Benigno “Noynoy” Aquino III. Biglaan ang kanyang pagkawala dahil sa karamdaman.

Nagpapasalamat tayo kay ex-P-Noy dahil siya ang nagbukas sa atin ng pinto ng serbisyo publiko. Una niya tayong pinagkatiwalaang mamuno ng Movie and Television Ratings and Classification Board (MTRCB), at pagkatapos ay sinuportahan niya tayo sa ating unang takbo sa Senado noong 2013.

Ipinakita niya sa atin ang kahalagahan ng mabuting kalooban sa isang pinuno: walang pag-iimbot sa kapwa, malinis ang intensiyon, at walang pagkagahaman sa kapangyarihan.

Pinahahalagahan natin ang kanyang matapat na paglilingkod at dedikasyon sa sambayanang Pilipino.

◘◘◘

Nalalagay sa peligro ang kakayahan ng mga ospital sa ating bansa na makatugon sa hamong dala ng COVID-19 dahil hindi nababayaran ng PhilHealth ang obligasyon nito. Sa Western Visayas, kabilang na ang Iloilo City, abot na sa 800 milyong piso ang hindi nababayarang claims ng PhiHealth sa mga institusyong medikal.

Sa panahong ito na nakararanas ng pagtaas ng kaso ng COVID-19 sa bahaging ito ng bansa, nananawagan ang ating mga lokal na opisyal sa pambansang pamahalaan dahil sa kakulangan ng hospital beds, medical supplies at staff, bakuna, at sa hindi-nababayarang claims sa PhilHealth. Paano nga naman mapatatakbo ang mga ospital kung lahat ng pondo nila ay naiipit sa paniningil sa PhilHealth? Kumpleto ang requirements, hindi pa rin mai-release ang kanilang claims. Hihintayin ba nating magsara na ang mga ospital at lalong walang mapuntahan ang mga kababayan nating may karamdaman?

Dapat bumilis na nga ang claims dahil sa Debit-Credit Payment Method na ipinatupad ng PhilHealth mula noong Abril. Magpabibilis dapat ito ng payment claims at makatitiyak na tama at balido ang mga bayarin. Kailangang suriin ng PhilHealth sa sarili nila kung epektibo at sapat ang bilis ng ganitong sistema.

Sa panahong ito ng krisis pangkalusugan, nararapat na mabigyan ng seguridad at kapanatagan ng kalooban ang bawat miyembro ng PhilHealth na sakaling sila’y magkaroon sila ng karamdaman, may maaasahan sila sa pamahalaan. Kilos, PhilHealth! Nakamamatay ang kabagalan sa ganitong pagkakataon at panahon!

Senior citizens, tulungan ngayong pandemya

ni Grace Poe - @Poesible | May 17, 2021

Bagama’t isinailalim na sa General Community Quarantine (GCQ) na may mahigpit na restriksiyon ang National Capital Region (NCR) pati na ang mga lalawigan ng Bulacan, Laguna, at Cavite, at GCQ ang ilang lalawigan mula Mayo 15 hanggang 31, patuloy pa ring pinahihirapan ng COVID ang ating bansa. Ang pagluluwag sa klasipikasyon ay malinaw na para sa ekonomiya nating naghihingalo dahil sa epekto ng pandemya. Nanawagan ang mga negosyante at mga manggagawa: kailangan nila ng trabaho. Kailangan nila ng pagkaing ihahain para sa kanilang pamilya.

Habang nakasusunod sa bagong normal ang mga bata dahil sa pagiging maalam sa teknolohiya, ang matatanda ay nangangapa. Marami sa senior citizens natin, nawalan ng ikabubuhay ngayong pandemya. Kahit ang mga maparaan sa buhay, walang magawa dahil bawal silang lumabas ng tahanan.

Naniniwala tayong sa yaman ng karanasan ng ating senior citizens, makapag-aambag sila sa pagbangon ng ating bansa mula sa trahedyang dumating sa atin. Kailangan ng krusyal na interbensiyon mula sa ating pamahalaan para bigyan sila ng pagkakakitaan sa bahay para hindi sila makipagsapalaran sa labas at makakuha ng impeksyon ng COVID-19.

Hinihimok natin ang Department of Education at ang Commission on Higher Education na bumuo ng programa ang mga paaralan at training institutions para maturuan ng mga kabataang tech savvy ang ating senior citizens para maunawaan at matutunan nila ang teknolohiya.

Gayundin naman, ang Department of Labor and Employment ay maaaring mag-ugnay ng ating senior citizens sa home-based livelihood opportunities para kumita sila mula sa kanilang mga tahanan. Napakalaki ng magagawa ng pasilitasyon at koneksiyon ng nangangailangan ng tao at ng nangangailangan ng trabaho. Mahalaga rito ang koordinasyon sa pribadong sektor na maaaring lumikha ng oportunidad para sa ating nakatatanda.

Nagbubukas ang remote work ng pagkakataon para maging produktibo ang ating senior citizens. Sa panahong malaki ang tama sa kanilang kalusugang mental at katayuang pinansyal ng pandemya, nararapat tulungan ng pamahalaan ang ating mga lolo at lola na tumanda na paghahanapbuhay. Kung mabibigyan sila ng pagkakataong magtrabaho at kumita, hindi sila aasa sa ayuda.