Obligasyon ng PhilHealth magbayad sa mga ospital

ni Grace Poe - @Poesible | November 8, 2021

Higit kailanman, ngayon natin nakikita ang kahalagahan ng matatag at mahusay na sistemang pangkalusugan. Dahil sa pandemyang dulot ng COVID-19, napunta ang atensiyon ng sambayanan sa ating mga ospital at iba pang healthcare providers sa bansa.

Kinilala nating frontliners ang ating mga doktor, nurse, at iba pang kawani ng ospital.

Araw-araw, sila ang humaharap sa karamdaman para malapatan ng lunas ang mga kababayan nating nangangailangan ng atensyong medikal.

Sa kabila ng kanilang paglilingkod, pahirapan pa rin ang ating mga ospital sa pagkolekta mula sa Philhealth. Matagal nang naipagsilbi sa tao, mabibinbin pa sa paniningil sa gobyerno.

Matagal na nating kinakalampag ang Philhealth. Bilang nag-iisang health insurance agency ng pamahalaan, mabigat ang atas at responsabilidad nila sa maayos na pagtakbo ng sistemang pangkalusugan ng ating bansa. Binabantayan natin ang mga alegasyon ng korupsyon at iregularidad dahil ang pondo ng ahensyang ito ay pag-aari at para sa mga Pilipino. Kinakaltas ito sa mga manggagawa at naghahanapbuhay para masigurong may umiikot na pondo na ipambabayad sa mga benepisaryo.

Ang problema, napakaraming ospital na ang umaaray dahil hindi sila nakasisingil sa Philhealth.

Resulta nito, kailangang magbawas ng tao ng ilan, habang nanganganib nang magsara ang ilang institusyon. Kailangan nilang magpasuweldo ng tao at tustusan ang gastos ng operasyon.

Kapag hindi sila makakasingil para sa mga serbisyong naibigay na nila, hindi sila makapagpapatuloy sa pagsisilbi sa ating mga kababayan.

Walang silbi ang universal healthcare system na isinusulong ng pamahalaan kung hindi tatanggapin ng mga pribadong ospital ang Philhealth ng ating mga kababayan. Hindi natin sila masisisi dahil hindi sila makapagpapatuloy kung hindi sila mababayaran para sa reimbursement na dati pa dapat naibigay.

Hindi katanggap-tanggap na itinatayang nasa P20 bilyong piso ang utang ng PhilHealth sa mga pribadong ospital nitong Agosto 2021. Nasaan ang pondo para rito? Kailangang magkaroon ng organisado at agarang plano ang Philhealth para sa pagbabayad ng mga pagkakautang nito.

Nakasalalay dito kung mabibigyan ng atensiyong medikal ang maraming kababayan nating nakaasa sa benepisyo.

Hindi puwedeng maging balasubas ang PhilHealth dahil bahagi ito ng gobyerno. Kahiya-hiya kung gobyerno pa ang hindi makabayad sa sariling obligasyon nito.

Kapalmuks na kandidato na gumagamit ng disaster alerts para makapagpapansin, aksiyunan!

ni Grace Poe - @Poesible | October 19, 2021

Hello, mga bes! Kumusta kayo at ang inyong mga mahal sa buhay ngayong mga araw na ito? Sana’y nasa mabuting kalagayan kayong lahat at ligtas sa karamdaman at problema.

Nakakaloka na isyu ngayon ang paggamit ng disaster alert system para sa eleksiyon.

Marami ang nababahala na nakatanggap sila ng mensahe sa kanilang cellphones na tulad ng disaster alerts na pinadadala ng National Disaster Risk Reduction and Management Council (NDRRMC) alinsunod sa inakda nating batas na Republic Act No. 10639 o ang Free Mobile Disaster Alerts Act. ‘Yun nga lang, sa halip na disaster alert, tungkol sa kandidato ang pumasok na mensahe.

Ipinasa natin ang Free Mobile Disaster Alerts Act para protektahan ang publiko sa pamamagitan ng maagang babala sa mga sakuna. Pagkilala ito na ang maagap ng sistema ng pag-aalerto ay maaaring makapagligtas ng buhay. Krusyal ito sa paghahanda para sa mga bagyo, pagbaha, at iba pang sakuna.

Dati, ang komento ng ating mga kababayan, nagugulat sila sa disaster alerts! Pero ngayon, iba ang ikinagulat nila. Puwede pala silang makatanggap ng mga mensahe kahit pa hindi tungkol sa sakuna.

Inaasahan natin ang mabilis na pagbusisi at imbestigasyon ng National Telecommunication Commission (NTC) tungkol sa insidente ng paggamit para sa pulitika ng disaster alerts. Mahalaga itong tutukan ngayon pa lang dahil baka maabuso ngayong eleksiyon.

Ngayon, nagkaalaman na ibinebenta lang pala sa online shopping networks ang text blast machines na nakapagpapadala ng mga mensahe gamit ang sistema ng disaster alert. Pambihira, ganun lang pala kadaling magkalat ng text messages sa isang lugar kahit walang mobile numbers ng makatatanggap. Delikado ito dahil puwedeng-puwedeng maabuso. Puwedeng panggalingan ng fake news at paninira na di naman mapapanagutan ng nagpadala.

Pero ang mas mahalagang isyu sa atin, ang tiwala ng ating mga kababayan sa integridad ng text alerts. Kung mawawala ang kumpiyansa nila sa disaster alerts, magagapi ang intensiyon ng ating batas na magkaroon ng epektibong komunikasyon para makapagbabala sa sakuna.

Tututukan natin ang aksiyon ng NTC sa usaping ito para maiwasan ang pag-abuso sa sistema ng komunikasyon.

Ang hindi bumoboto, bawal magreklamo!

ni Grace Poe - @Poesible | October 12, 2021

Extended ang voter’s registration para sa ating mga botante. Ito ang tugon ng Commission on Elections (COMELEC) sa panawagang ektensiyon para makahabol pa ng pagpapatala, reaktibasyon, at paglilipat ng rekord ang mga nais maging botante sa darating na eleksiyon.

Hinihimok natin ang lahat ng hindi pa rehistrado, pero nasa edad nang bumoto na samantalahin ang pagkakataong ito. Ang pagboto ay obligasyon ng bawat mamamayan sa ating demokrasya. Ito ang pagkakataon ng lahat para piliin ang mga pinuno sa ating pamahalaan. Ito ang kapangyarihan ng taumbayan sa pamahalaan.

Isa sa mga paborito nating naririnig sa akting mga magulang: ang hindi bumoboto, hindi dapat magreklamo! Tayo ang naghahalal ng ating mga pinuno. Kung hindi natin gagamitin ang ating kapangyarihang magluklok ng ating mga opisyal, o kung ipagbibili ang boto, wala tayong maaasahang pagbabago sa ating pamahalaan.

Paalala lang, 'wag hintayin ang huling araw bago magsadya sa registration site para maiwasang maabutan ng cut-off at deadline!

Iisa ang iyong boto, pero isang boto itong maaaring magpaiba sa ating bansa. Magparehistro; bumoto tayo.

***

Isang malaking karangalan para sa ating bansa ang pagkakahirang ng unang Pilipinong Nobel Peace Prize winner, si Maria Ressa.

Napaka-prehistiyoso ng karangalang ito, mga bes! Ibinibigay lamang ito sa piling-piling indibiduwal na nagpamalas ng kakaiba at kahanga-hangang galing sa kanilang larangan.

Ipinakita sa atin ni Maria Ressa kung paano panindigan ang kalayaan ng pamamahayag. Ang kanyang katapangan at katatagan sa paghahanap ng katotohanan at paghahatid nito sa taumbayan ay karapat-dapat sa pagkilala at paghanga sa buong daigdig.

Nawa’y magsilbing inspirasyon sa ating mga mamamahayag at sa ating mga kababayan ang tagumpay na ito ni Maria Ressa. Sa kabila ng mga pagsubok na kanyang kinaharap at patuloy na hinaharap, napatunayan niyang pinagpapala ang mga may paninindigan at may pinaglalaban.

Mabuhay ang malayang pamamahayag! Ang aming pagbati, Maria!