Mga motorista, umaaray sa naglalahong load at wa’ ‘wentang minimum load value ng RFID!

ni Grace Poe - @Poesible | November 9, 2020

Magandang araw, mga bes! Kumusta kayo at ang inyong pamilya? Sana ay ligtas at nasa mabuting kalagayan at kalusugan ang lahat.

Noong isang linggo, sinalanta ng Bagyong Rolly ang ating bansa at winasak ang maraming lugar sa Bicol, partikular na sa Albay at Catanduanes. Hanggang ngayon, wala pa ring kuryente ang maraming lugar at may mga ulat na Disyembre pa ito maibabalik. Marami sa mga apektado ang muling nagtatayo ng kanilang bahay o nagkukumpuni ng mga bubong at dingding. Dagdag-pahirap pa sa ilang bayan ang baha na may putik mula sa Bulkang Mayon.

Bukod sa ayuda mula sa pamahalaan, marami sa ating mga kababayan ang nagsasagawa ng kani-kanilang relief operations para tulungan ang ating mga kababayan. Kahanga-hanga ang espiritu ng bayanihan ng mga Pilipino sa panahon ng kalamidad. Kahit may pandemya at lahat ay nakararanas ng paghihirap, nananaig pa rin ang kagandahang-loob at malasakit para sa mga nangangailangan.

Ipagpatuloy natin ang pagtulong. Ibabalik ng Diyos ang pagpapalang ito sa ibang paraan.

***

Samantala, ibang pahirap naman ang kinahaharap ng mga kababayan nating nagbibiyahe papunta at palabas ng Metro Manila dahil sa implementasyon ng mandatoryong paggamit ng RFID sa ating expressways. Bukod sa mahabang pila na sumasayang ng malaking oras para sa rehistrasyon nito, marami sa ating mga kababayan ang umaaray dahil sa di-umano’y naglalahong load at sa pagkakaroon ng minimum na load value na hindi mapakikinabangan.

Sa panahong gasgas na, kung hindi man butas, ang bulsa ng ating mga kababayan, huwag na sanang gumawa ng mga imposisyon na babawas pa sa perang puwede sanang hawak nila. Halimbawa, kailangang may minimum na 100 load sa RFID ang mga sasakyang papasok sa Cavitex. Kung galing ang motorista sa Roxas Boulevard at papasok sa Cavitex at ang load niya ay P99 na lang, kailangan pang mag-load bago makapasok kahit P25 lang naman ang toll fee. Sa ibang tao, maliit na bagay lamang ito, pero sa mga naghahanapbuhay na bawat piso ay binibilang, dagdag-pabigat ito.

Kailangan ring tingnan ang mga ulat ng nawawala o nagkukulang na load dahil pera ng mga kababayan natin ang pinag-uusapan natin dito. Kung dati ay load sa cellphone lang ang inirereklamo ng mga tao, marami tayong nababasa sa social media na nagsasabing nauubos agad ang kanilang ikinarga.

Suportado natin ang Department of Transportation sa kanilang direktiba para sa contactless transactions sa ating mga expressway. Gayunman, kailangang suriin ng pamahalaan ang kabuuang sistema nito. Kailangang busisiin ang pagpasok at paglabas ng bayad sa dulo ng proseso para matiyak ang integridad nito.

Magkapit-bisig lamang siguradong makakaahon tayo nang sabay-sabay

ni Grace Poe - @Poesible | November 02, 2020

Hello, mga bes! Kumusta kayo at ang inyong mga mahal sa buhay ngayong araw? Sana ay ligtas ang lahat at nasa mabuting kalagayan.

Sinusubok na naman ang tatag ng ating bansa ng isa pang kalamidad, ang Bagyong Rolly. Sinasabing ito ang pinakamalakas na bagyo sa buong mundo na pumasok ngayong taon, at dito pa sa atin tumama. Sa ilang lugar, nagtaas ng Signal No. 5 kahapon, para mabigyang-babala ang mga tao sa lakas ng paparating na bagyo. Signal No. 3 nga lang, nayayanig tayo, Signal No. 5 pa!

Malaking hamon sa maraming pamahalaang lokal na apektado ng bagyo ang evacuation centers dahil karamihan sa mga ito ay ginamit nang isolation sites para sa COVID-19. Ang mga nasa baybayin na delikado sa storm surge, pinalilikas, subalit hindi malinaw kung saan naman pupunta na ligtas. Napakahirap ipatupad ang social distancing protocols sa maliit na espasyong kailangang pagkasyahan ng mga nagsilikas. Ang masakit pa rito, maraming pamahalaang lokal ang nakagamit na ng kanilang calamity fund para sa COVID-19 relief ng kanilang nasasakupan. Pahirapan ngayon ang paghuhugot ng pondo para sa pangangailangan ng mga apektado ng Bagyong Rolly.

Ito ang dahilan kung bakit natin isinusulong ang pagtatatag ng dedikadong kagawaran para lamang sa disaster risk reduction management sa ating bansa. Sa ating panukalang-batas na Philippine Disaster Risk Reduction and Management System Act, ang pagtugon sa mga panganib na kakaharapin ng ating bansa ay pagpaplanuhan at paghahandaan bago pa man may dumating sa atin. Ang nasabing departamento ay bubuuin ng Bureau of Disaster Resilience, Bureau of Disaster Preparation, at Bureau of Knowledge Management and Dissemination.

Kamakailan, nagpunta ang ating mga kasama sa Panday Bayanihan sa Lopez, Quezon para maghatid ng kaunting tulong sa mga magsasaka nating apektado ng Bagyong Pepito. Nalubog ang mga palay na aanihin na lang sana ng ating mga kababayan. Pera na, naging bato pa. Sa pamamagitan ng kaunting ayudang dinala ng ating volunteers, sana’y nakatulong tayo sa pagtatawid sa kanila patungo sa pagbangon. Pagsisikapan nating magsagawa ng iba pang relief operations para sa mga apektado naman ng Bagyong Rolly.

Habang hinihintay ng ating mga kababayan ang tulong mula sa pamahalaan, napakalaking bagay ang pagbabayanihan sa panahon ng pangangailangan. Kung sino ang may maibibigay, sana ay tumulong sa apektado ng Bagyong Rolly, sa ating sariling paraan. Ang bawat gawa ng kabutihan para sa kapwa nating sinalanta ng bagyo ay malaking bagay sa pagbubuo ng kanilang buhay. Tumulong tayo nang maluwag sa ating puso.

7.6 milyong Pilipino ang nakaranas ng pagkagutom nito lamang Setyembre, nakupo!

ni Grace Poe - @Poesible | October 19, 2020

Nadadalas ang pag-ulan ngayong mga araw na ito. Kung dati-rati ay ubo, sipon at trangkaso lang ang problema natin sa ganitong panahon, naiba ito nang dahil sa coronavirus. Ngayon, ang pagkakaroon ng ubo, lagnat at pananakit ng katawan ay itinuturing nang sintomas ng COVID-19 infection na kailangang i-deklara sa pinapasukan at pinupuntahan, at sapat na dahilan para manatili sa ating mga tahanan para hindi makahawa sa ibang tao.

Nagluluwag na ang mga restriksiyon ng quarantine. Ipinaaalala natin sa ating mga kababayan na hindi ito dahilan para ipagsawalambahala na ang ating safety protocols. Kabaligtaran pa nga. Ngayong mas marami ang lumalabas, dapat tayong maging mas maingat at maging malay sa kalinisan at social distancing. Ipinaaalala rin natin ang kahalagahan ng katapatan sa health declaration forms. Kung may mga sintomas ng COVID-19, huwag itong itago. Walang nakakahiya sa pagkakaroon ng karamdaman. Ang nakakahiya ay ang pagsisinungaling tapos ay makahahawa ka ng napakaraming tao dahil itinago mo ang iyong sintomas o exposure sa nagpositibo.

Stay safe, mga bes!

***

Sa survey ng Social Weather Stations, lumalabas na itinatayang 7.6 milyong Pilipino ang nakaranas ng pagkagutom nitong Setyembre. Katumbas ito ng mahigit 23.8 porsiyento ng ating kabuuang populasyon.

Nakababahala ang bilang na ito dahil indikasyon ito ng epekto ng COVID-19 sa ating mga kababayan. Hindi na ito numero lamang sa istatistika ng ekonomiya — bilang ito ng mga tao kumakalam ang sikmura.

Isa sa ating batas na pinagtrabahuhan, ang Kalusugan at Nutrisyon ng Mag-Nanay Act ay isinulong natin para pangalagaan ang nutrisyon ng mga ina at sanggol sa unang isang libong araw ng kanilang buhay. Ayaw nating makaranas ng gutom ang mga buntis pati ang kanilang magiging anak dahil sa malawak na epekto ng malnutrisyon. Sa pagtatapos ng budget hearings, hiniling natin ang accounting ng mga pondong inilaan para sa batas na ito para sa 2021, pati na ang naging alokasyon nitong nakaraang dalawang taon.

Ipinahayag natin ang ating pagkabahala rito dahil naglalaman ang nasabing batas ng 115 interbensiyon na nakabahagi sa sampung kagawaran. Gayunman, sa ating pagsusuri ng budget, lumalabas na dalawang component lamang ang may budget para sa 2021, ang P2.19 bilyon para sa micronutrient supplementation sa ilalim ng Department of Health (DOH) at ang P159.33-million intervention package sa ilalim ng National Nutrition Council.

Kung hindi ilalagay ng ahensiya sa kanilang panukalang budget ang kailangang pondo, mawawalan ng saysay ang batas. Hindi ito mapatutupad. Para na lamang isang sanggol ito na ipinanganak na walang buhay.

Napakahalagang protektahan natin ang kalusugan at nutrisyon ng mga ina at ng kanilang mga anak sa gitna ng pandemya. Sila ang unang-unang tinatamaan kapag naghihigpit ng sinturon ang pamilya. Kailangan nating tiyakin, lalo sa panahong ito na maraming nagugutom, na ang pondo para sa kanila ay diretso sa kanilang sikmura.