Donasyon ng German gov’t.. 844,800 doses ng AstraZeneca vaccine, dumating na

ni Lolet Abania | October 15, 2021

Dumating na sa bansa ang 844,800 doses ng AstraZeneca COVID-19 vaccines ngayong Biyernes ng hapon.

Lumapag ang bagong batch ng mga bakuna sa Ninoy Aquino International Airport (NAIA) Terminal 3 via Emirates Airlines Flight EK 332, pasado alas-4:00 ng hapon, kung saan donasyon ang mga ito ng German government sa pamamagitan ng COVAX facility.

Labis ang pasasalamat ni vaccine czar Carlito Galvez Jr. sa World Health Organization (WHO) at sa gobyerno ng Germany para sa delivery ng mga AstraZeneca vaccines.

“Over 400,000 Filipinos will benefit from these vaccines and this means more than 400,000 of our countrymen will be saved from severe COVID-19 complications and death,” ani Galvez, kung saan ang mga doses ng bakuna ay dadalhin naman sa mga probinsiya.

Ang representative ng German Embassy in Manila ay nagsabing plano ng kanilang gobyerno na mag-donate ng 100 milyon pang COVID-19 vaccines sa mga papaunlad na bansa.

Plano rin ng German government na magbigay ng donasyon ng isa pang batch na aabot sa 800,000 doses ng COVID-19 vaccines sa Pilipinas aniya pa, “soon.”

Samantala, ayon sa National Task Force Against COVID-19, isa pang batch ng Pfizer vaccine doses ang nakatakdang dumating sa bansa ngayong Biyernes ng gabi.

10 patay, 45 sugatan sa bus accident

ni Ronalyn Seminiano Reonico | July 26, 2021

Sampung katao ang nasawi at 45 ang sugatan matapos mawalan ng kontrol ang driver ng bus na bumiyahe mula sa Frankfurt, Germany papuntang Pristina sa Kosovo, Croatia noong Linggo, ayon sa awtoridad.

Sa inisyal na ulat ng pulisya, bandang alas-6:00 nang umaga nang mawalan ng kontrol ang driver sa kahabaan ng Zagreb at Serbian border at nawala ito sa road lane.

Hindi pa malinaw ang dahilan ng pagkawala ng kontrol sa bus kaya patuloy na nagsasagawa ng imbestigasyon ang awtoridad.

Kabilang umano sa mga nasawi ang kapalitan nitong driver at ayon sa awtoridad, karamihan sa mga pasahero ay Kosovans na nagtatrabaho sa Germany.

Labing lima naman sa 45 sugatan ang nagtamo ng serious injuries.

Samantala, nagpahayag ng pakikidalamhati si Croatian Prime Minister Andrej Plenkovic sa pamilya ng mga biktima at aniya, "We hope the injured will recover.''

Patay sa baha sa Germany at Belgium, 170 na

ni Ronalyn Seminiano Reonico | July 18, 2021

Umakyat na sa 170 ang bilang ng mga nasawi sa matinding pagbaha sa Germany at Belgium na sumira sa maraming kabahayan at imprastruktura. Tinatayang aabot sa 143 ang nasawi sa Germany kabilang na ang 98 na mga namatay sa Ahrweiler district south ng Cologne, ayon sa awtoridad.

Daan-daang katao rin ang nawawala pa at dahil sa mataas na lebel ng tubig sa ilang lugar ng bansa, mahina rin ang communication access.

Personal namang binisita ni German President Frank-Walter Steinmeier ang Erftstadt sa North Rhine-Westphalia kung saan aabot sa 45 katao ang nasawi sa insidente. Aniya, "We mourn with those that have lost friends, acquaintances, family members.

"Their fate is ripping our hearts apart." Ayon sa awtoridad, aabot sa 700 residente ang inilikas noong Biyernes matapos masira ang dam sa Wassenberg malapit sa Cologne.

Ayon kay Steinmeier, posibleng abutin ng ilang linggo bago malaman ang kabuuang pinsala ng pagbaha at aniya, bilyun-bilyon ang kakailanganin upang maayos ang mga ito. Umakyat naman sa 27 ang kumpirmadong nasawi sa Belgium, ayon sa National Crisis Centre.

Nasa 103 katao naman ang "missing or unreachable." Ayon sa awtoridad, maaaring hindi lamang makontak ang ilang residente dahil hindi nai-charge ang mga mobile phones o maaaring kabilang sa mga isinugod sa ospital na wala pang identity papers.

Binisita naman nina Belgian Prime Minister Alexander De Croo at European Commission President Ursula von der Leyen ang ilang apektadong lugar noong Sabado. Samantala, patuloy pa ring nagsasagawa ng search, rescue and clearing operations sa insidente.