Donaire, nagka-COVID-19, out na sa World title fight

ni Gerard Peter - @Sports | December 11, 2020

Tila ang mga orihinal na maglalaban para sa World title fight ang mismong nabura sa listahan ng mga maglalaban para sa isang main event sa Disyembre 19 sa Mohegan Sun Arena sa Uncasville, Connecticut sa Estados Unidos – matapos tuluyan nang tinanggal sa listahan si dating five-division World champion Nonito “The Filipino Flash” Donaire nang magpositibo ito sa mapaminsalang novel coronavirus disease (Covid-19).

Iniatras na sa kanyang darating na laban ang 38-anyos na Talibon, Bohol-native laban kay dating bantamweight titlist Emmanuel “El Matador” Rodriguez para sa bakanteng World Boxing Council (WBC) bantamweight title. Ang tunay na may hawak ng titulo na si undefeated Nordine Oubaali (17-0, 12KOs) ng France ay hinubaran ng titulo matapos mabigong maidepensa ito laban kay Donaire (40-6, 26KOs) kasunod ng pagkakaroon din ng coronavirus noong isang buwan.

May posibilidad na itapat ang dating 2010 Youth Olympic gold medalists na si Rodriguez (19-1, 12KOs) sa ibang laban, kung saan isa pang Filipino sa katauhan ni Reymart Gaballo (23-0, 20KOs), na may nakatakdang laban kay Jose Velasquez (28-6-2, 19KOs) ng Chile ang nakatakdang sumalang sa undercard match para sa Showtime triple header event, ang may tsang umakyat sa main event fight.

Inihayag ng boxingscene.com na wala pang kalinawan kung papayagan ng WBC na maglaban para sa bakanteng titulo sina Rodriguez at Gaballo. Kasalukuyang nasa 26th ranked ang 24-anyos mula Polomolok, South Cotabato ang dating WBA interim bantamweight titlist. Ayon sa listahan ng WBC ratings, hindi ‘eligible’ si Gaballo na lumaban sa no. 4 ranked na si Rodriguez.

Naghahanda sana ng maige si Donaire sa pagiging mandatory challenger para sa titulo ni Oubaali na 118-pounds ng tamaan ito ng Covid-19, hanggang sa palitan ng 28-anyos na Puerto Rican. Inihayag ng WBC na “champion in recess” si Oubaali sa oras na tanggalin siya sa laban kay Donaire, na may indikasyon na maaari itong pumili kung idedepensa niya ito sa Pebrero sa magwawagi sa Donaire-Rodriguez. Sakaling talunin ni Oubaali ang isang optional na kalaban sa Pebrero na deadline, kakalabanin niya ang mananalo sa Donaire-Rodriguez bout upang matupad niya ang tungkulin na mandatory fight.

Nabago rin ang undercard match sa nakatakdang Dec.19 fight card ng palitan ang kalaban ng welterweight Philadelphia native na si Jaron Ennis na si Thomas Dulorme ng America kasunod ng pagpopositibo rin nito sa coronavirus. Pinalitan ito ni Chric Van Heerden ng South Africa para sa 10-round bout.

Obstacle course, tuloy ang plano at programa sa pandemya

ni Gerard Peter / Anthony E. Servinio - @Sports | December 10, 2020

Hindi napigilan maging ng coronavirus (Covid-19) pandemic ang pamunuan ng Pilipinas Obstacle Sports Federation (POSF) na malampasan ang lahat ng kinaharap na pagsubok na naging balakid sa patuloy na pagpapatakbo ng pampalakasan sa bansa, bagkus ay higit pang pinayabong at pinaunlad ng samahan ang pagpapalakas sa sports sa panahon ng krisis at banta ng mapanganib na sakit sa buong mundo.

Sinabi ni POSF president Atty. Al Agra na sinuong nilang lahat ang mga pagsubok sa kabila ng lahat ng limitasyon bunsod ng coronavirus sa loob ng halos siyam na buwan, ngunit naitawid pa rin ng kanilang pederasyon ang mga plano at programa ngayong taon.

“We coined the term advertunity in that there are opportunities amid the adversities. We relied on our resiliency. We did not look at the new normal but the better normal, and through sports contribute to sustainability and development in the country,” pahayag ni Agra, Martes ng umaga sa lingguhang Philippine Sportswriters Association (PSA) Forum webcast. “We put up the Association for Community Sports Advocates or ACSA,” dagdag ni Agra.

Kaantabay ang pagpapalakas ng pangangatawan para sa mga darating na torneo at events, naglaan din ng panahon ang POSF at ACSA na magpa-abot ng kamay sa mga programa nito para sa mga street children, visually impaired at deaf. “It's sports for all with no discrimination. We created a primer on 17 sustainable development goals (SDGs) covering sports, human rights and our national athletes. We put up a template on sports ordinance for the cities, municipalities and provinces,” wika ni Agra, na mahigit isang taon na nang walisin ng kanilang koponan ang lahat ng gold medal sa 2019 Southeast Asian Games sa bansa sa kabuuang 6 gold, 3 silver at 1 bronze medals.

Inihayag din ni Agra na lumawak na ang mga lugar na may pasilidad para sa obstacle course sa bansa, kabilang ang Subic, Laguna, Boracay, Cebu at maging ang Bangsamoro Autonomous Region in Muslim Mindanao. Tumulong rin ang POSF na magkaroon ng obstacle sports facility sa Philippine Military Academy (PMA) sa Baguio para sa mga kadete nito.

Naghahanda rin ang POSF na maglagay ng Obstacle in a Box (isang 12-in-1 facility na sinasakop ang maliit lamang na espasyo) para sa 20 schools, colleges at unibersidad sa pakikipagtulungan sa local government units (LGUs). “Dumami talaga. During the lockdown, we held regular virtual workouts for the able-bodied, Para (special athletes), youth and seniors,” paliwanag ni Agra.

Maglulunsad sa darating na Sabado ang POSF ng isang kauna-unahang face-to-face ninja event sa panahon ng pandemya na gaganapin sa Pretty Huge Obstacles sa SM Aura sa ilalim ng mahigpit na health and safety protocols na ipinapatupad ng Inter Agency Task Force on Emerging Infectious Disease.

Planong pag-ban ng kabataan sa combat sports, pagpupulungan

ni Gerard Peter - @Sports | December 9, 2020

Ipiprisinta ng 13 miyembro ng national sports association (NSAs) mula sa combat sports ang position paper nito sa pagkontra sa itinutulak na House Bill 1526 na nagbabawal sa minors na lumahok sa mga full-contact sports, ngayong Miyerkules ng umaga via virtual online platform.

Dadalo sa pulong ng 10:30 ng umaga ang mga pinuno ng 13 NSA martial arts sports, kabilang na si Sen. Juan Miguel Zubiri na presidente ng Arnis Federation of the Philippines at mga signatories ng iba’t ibang sports, gayundin ang mga opisyales ng Philippine Sports Commission (PSC), Philippine Olympic Committee (POC), Department of Education (DepEd), National Academy of Sports (NAS), Young Athletes Assistant Act, at PAGCOR bilang mga resource persons, habang haharap ang mga ito kina Ako Bicol Party lists representatives Alfredo Garbin Jr., Elizaldy Co at House Committee on Youth and Sports Development member Hon. Jake Vincent Villa ng lone district ng Siquijor.

Kabilang sa mga signatories ng position paper ay sina Pearl Managuelod ng Muay, Richard Lim ng Karate, Alvin Aguilar ng wrestling, Ed Picson ng boxing, Richard Gomez ng fencing, Princess Jacel Kiram ng pencak silat, Wharton Chan ng kickboxing, Dave Carter ng judo, Ferdinand Agustin ng Jiu jitsu, Pietro Paolo Claudio ng sambo, Rocky Samson ng taekwondo, at Julian Camacho ng wushu.

“We compliment the vigilance and dutifulness of our honorable congressmen. However, the combat sports NSAs strongly oppose prohibiting minors from participating in combat sports competitions, whether full contact or semi-contact,” nakasaad sa naturang position paper.

Ipapaliwanag ng grupo ni Managuelod ang kahalagahan ng grassroots development at pagiging parte ng mga kabataan sa Youth Olympic Games (YOG), na ipinapakita ang mas pagpapalawak pa ng kaalaman ng mga athletes, coaches at officials ng kani-kanilang sport.“The combat sport NSAs actually drafted a position paper and sent to the committee. we stated our counter arguments there which is mainly on grassroots development, IOC games (YOG) and IF games supporting youth events, as well as the need to provide proper training and education for coaches and officials for all sports. We also emphasized the mandate of NSAs to handle all tournaments, whether private or government,” saad ng Muay secretary-general at bagong hirang na Philippine Olympic Committee (POC) board member na si Managuelod.