Pinoy's Gaballo at Donaire, may tsansa sa World title fight

ni Gerard Peter - @Sports | January 13, 2021

Mayroong tsansang magkaharap sa hinaharap ang kapwa Filipinong boksingerong sina World Boxing Council (WBC) interim bantamweight champion Reymart “Assassin” Gaballo at five-division World titlist at Nonito “The Filipino Flash” Donaire.

Ito ay sakaling maglabas umano ng bagong desisyon ang pamunuan ng WBC para tuluyang pagharapin sa naunsyami nilang pagtatapat ang parehong coronavirus victims na sina WBC bantamweight ‘Champion in recess’ Nordine Oubaali ng France at No.1 contender na si Donaire. Kung mananaig ang 38-anyos mula Talibon, Bohol laban sa dating 2007 World Championship bronze medalist, may pag-asang kaharapin ito ng undefeated Sanman stable fighter.

Inamin ni MP Promotions President na si Sean Gibbons na maaari umano itong maganap kung bibigyan muli ng pagkakataon ng WBC si Donaire na makalapit sa korona, at sa pagkakataong ito ay makukuha na ni Gaballo (24-0, 20KOs) ang buong title shot sa kampeonato. “You never know, maybe an all-Filipino throwdown [against Donaire] or Reymart versus the Moroccan brother for the full title,” saad ni Gibbons sa panayam rito ng ringTV.com.

Inaasahan ni Gibbons na muling makakabalik ng Estados Unidos si Gaballo, kung saan, tinitignan munang pagpipilian sa kanyang susunod na laban ang idepensa ang kanyang interim title. “For me, if they say you’re gonna fight this one, I’m gonna fight them,” wika ni Gaballo.

Lumalaki ang tsansa na matupad ang pagkakaroon ng All-Filipino title fight kasunod ng report na inilabas ng boxingscene.com na parehong interesado ang bawat kampo nina Oubaali (17-0, 12KOs) at Donaire (20-6, 26KOs) na ipagpatuloy ang naunsyaming laban, kung saan nasa proseso na umano ng pag-iskedyul ng tapatan.

Kasunod ito ng hakbang ni WBC president Mauricio Sulaiman sa inilabas na liham na ipinaparating nito sa iba’t ibang partido na ibinabalik na nila sa dating estado sa pinanghahawakang titulo si Oubaali. Inihayag nitong tinatanggal na ang pagtatalaga rito bilang “Champion In-Recess’ at binibigyan ito ng pagkakataon na magkaroon ng ‘voluntary defense’ para sa titulo sa Pebrero, na magdedepende kung handa na itong lumabang muli at papasa sa medical clearance.

First batch ng Gilas team pasok na sa Calambubble para sa training

ni Gerard Peter / VA - @Sports | January 12, 2020

Inumpisahan na noong nakaraang Linggo ang preparasyon ng Gilas Pilipinas para sa ikatlo at huling window ng FIBA Asia Cup Qualifiers sa pamamagitan ng pagpasok ng unang batch ng mga miyembro ng pool sa training bubble sa Inspire Sports Academy sa Laguna. Kabilang sa mga naunang dumating sa venue ang ace guard ng NLEX Road Warriors at dating Gilas captain na si Kiefer Ravena. Nagkataon din na siya ang nag-iisang PBA player na kabilang sa unang batch kung saan kasama nya ang mga special PBA draftees na sina Isaac Go, Matt at Mike Nieto at Rey Suerte.

Naroon na rin sa bubble at kasama sa mga naunang dumating ang mga collegiate stars na sina Javi Gomez de Liaño, Dave Ildefonso, Justine Baltazar, Calvin Oftana, Will Navarro at Kenmark Carino at ang kasalukuyang isinasailalim sa naturalization na si Angelo Kouame. Inaasahang darating sa bubble ang ikalawa at huling batch na binubuo ng PBA players sa Enero 22. Walang ibinigay na mga pangalan ang SBP maging ang PBA kung sinu-sino pa ang ibang professional players na makakasama ni Ravena sa training camp. Kaugnay nito, pinasalamatan ni SBP president Al Panlilio si PBA commissioner Willie Marcial sa pagtulong nito upang makuha ang commitment ng ilang PBA players para lumahok sa bubble training. Sinabi naman ni headcoach Jong Uichico na aasistihan nina Meralco coach Norman Black, Rain or Shine coach Caloy Garcia at national youth team coach Sandy Arespacochaga na plano nilang dumiretso na ng Clark kung saan gaganapin ang third window sa Pebrero 18-22 pagkatapos nila sa bubble sa Laguna.

Samantala, hindi naman nakasama ng kanilang mga kapwa cadets sa bubble sina Allyn Bulanadi at Jaydee Tungcab dahil nakatakdang operahan sa kanyang injury sa balikat ang una habang naghihintay naman ng kanyang visa patungong Japan ang huli kung saan nakatakda din itong maglaro sa Japan B League bilang import kaparis ni Thirdy Ravena. Inaasahan ding sumunod sa bubble si Dwight Ramos na mangagaling sa US gayundin si Juan Gomez de Liaño na mayroon mahalagang dental issue. Si Kobe Paras lamang ang walang balita kung makakasama sa bubble.

Tampok ang 2 Pinoy boxers sa 2 World title fights sa 'Pinas

ni Gerard Peter - @Sports | January 10, 2021

Dalawang magkahiwalay na World title fights ang itinalagang pag-aagawan ng apat na Filipinong boksingero sa minimumweight division na gaganapin dito sa ng bansa sa magkasunod na buwan.

Itataya ni International Boxing Federation (IBF) champion Pedro “Kid Pedro Heneral” Taduran Jr. ang titulo laban kay mandatory World No. 3 contender Rene Mark Cuarto sa Pebrero 20 sa Lagao Gym sa General Santos City, habang pag-aagawan nina dating WBO mini-flyweight titlist Vic “Vicious” Saludar at Roberto “Inggo” Paradero ang bakanteng WBA (regular) championship belt sa Enero 30 sa Elorde Sports Center sa Paranaque City.

Muling idedepensa ng 24-anyos mula Libon, Albay na si Taduran (14-2-1, 11KOs) ang titulo sa ikalawang pagkakataon laban sa matikas na Jose Dalman, Zamboanga del Norte-native na si Cuarto (18-2-2, 11KOs) na todo ang pagsasanay matapos mabigyan ng unang pagkakataon na lumaban sa world title fight dahil sa bakanteng No.1 at No.2 ranked contenders.

Nagsasanay ang WBO oriental minimum titlist kay coach Nonoy Neri sa MP Boxing sa Davao City. Lubos ang pasasalamat ng Zamboanga boxer sa pagbibigay ng tsansang makalaban ito sa isang World title fight laban sa southpaw boxer na si Taduran na may 3 fight winning streak.

Nakahanda si Taduran na muling ipagtanggol ang korona na nagsasanay sa La Union, ayon sa manager nitong si Art Monis. “What I know of Cuarto is that he is tough and strong,” saad ni Taduran sa panayam ng RingTV.com, na kasalukuyang sinasanay ni dating IBF junior flyweight titleholder Tacy Macalos. “But from what I see I can handle him.”

Maaaring madagdagan naman ng panibagong kampeon ang Pilipinas sa sino mang magwawagi kina Saludar at Paradero na No. 4 at No.5 ranked sa WBA minimumweight, ayon sa pagkakasunod. Ito ang ikalawang beses na sasabak sa World title fight ang 30-anyos mula Polomolok, South Cotobato na si Saludar (20-4, 11KOs), habang unang beses naman sa pandaigdigang kampeonato ang wala pang talong si Paradero (18-0, 12KOs), na mas bata ng 6-taon mula Valencia City, Bukidnon.