Rakhimov, positive sa COVID-19, World title defense ni Diaz, nabalam

ni Gerard Peter - @Sports | January 17, 2021

Walang magaganap na title defense para kay Joseph “Jojo” Diaz sa International Boxing Federation (IBF) super-featherweight matapos magpositibo sa coronavirus disease (Covid-19) ang makakalaban nitong si Shavkat Rakhimov ng Tajikistan.

Ang 26-anyos na mandatory challenger na si Rakhimov (15-0, 12KOs) ay napuwersang matanggal sa world title fight laban kay Diaz (31-1, 15KOs) sa Pebrero 13 sa The Avalon sa Hollywood, California sa Estados Unidos dahil sa sakit.

Magsisilbi sanang main event bout ang tapatan ng American at Tajikistani boxer sa DAZN doubleheader kung saan co-feature ang bakbakan nina Patrick Teixeira (31-1, 22KOs) ng Brazil na itataya ang World Boxing Organization (WBO) junior middleweight championship kay Brian “Ray Sugar” Castano (16-0-1, 12KOs) ng Argentina.

Hindi pa malinaw kung mapapalitan ng bagong kalaban si Diaz, na magsisilbi sanang unang pagdepensa sa korona nito o magiging main event card na ang 12-round fight ng dalawang South American fighters.

Muling mabibigyan ng pagkakataon si Rakhimov na makakuha ng title shot sa oras na makabawi na ito sa delikadong karamdaman at makapagpatuloy ng pagsasanay ng mabuti. Masigasig na nagsasanay ang Ekaterinburg, Russia-residence sa ilalim ng batikan at legendary Hall of Fame trainer na si Freddie Roach sa Wild Card Gym sa Los Angeles, California.

Ang kasalukuyang IBO 130-pounds titlist na si Rakhimov ay nakuha ang pagiging No.1 contender nang pabagsakin sa 8th round si Azinga “Golden Boy” Fuzile (14-1, 8KOs) ng South Africa noong Setyembre 29, 2019 sa Orient Theatre, East London, South Africa, kung saan ito na rin ang naging huling laban niya.

Sinubukang umapela ng kampo ng South African boxer matapos mapag-alamang gumamit ng illegal na ‘smelling salt’ ngunit mas pinaboran ng IBF Appeal Panel ang kampo ng Tajikistani para sa 12-round eliminator.

Ensayo ng mga combat sports sa Calambubble, magsisimula na

ni Gerard Peter - @Sports | January 16, 2021

Nagsimula ng paunti-unting pumasok ang mga Olympic hopefuls na pinangunahan ng ilang national boxers’ para sa kanilang isasagawang ‘bubble training camp’ sa loob ng Inspire Sports Academy sa Calamba, Laguna kahapon.

Nauna ng pumasok sina 2019 AIBA World women’s champion at 30th Southeast Asian Games gold medalist Nesthy Petecio, biennial meet silver medalist Marjon Pianar at featherweight Junmilardo Ogayre, habang susunod ang iba pang miyembro ng koponan na kinabibilangan nina SEAG light-flyweight titlist Carlo Paalam, Marvin Tabamo, John Paul Panuayan, Mario Fernandez, Aira Villegas at dating World champion at 5-time SEAG gold medal winner Josie Gabuco.

Makakasama rin nila sina national coaches Pat Gaspi, Nolito Velasco at 1992 Barcelona Olympics bronze medalist Roel Velasco, Jojen Ladon, dating lady boxer Mitchell Martinez, Elmer Pamisa, at 2016 Rio Olympics campaigner Rogen Ladon.

Nakatakdang dumating ngayong araw sina 2021 Tokyo Olympics-bound Irish ‘Aye” Magno, Australian boxing consultant Don Abnett, habang magkakasabay sa Lunes sina coach Reynaldo Galido, international veterans Ian Clark Bautista, James Palicte, Jere Samuel dela Cruz at Riza Pasuit, na manggagaling sa Negros Occidental.

“Sa Monday pa bale ang biyahe naming galing Bacolod kase mahirap ang flights ngayon dito,” saad ni Galido sa isang mensahe sa social media.

Agad na dumaan sa swab testing ang mga naunang pumasok sa ‘Calambubble’ bilang pagsunod sa health at safety protocols na ipinapatupad ng Philippine Sports Commission (PSC), Inspire Sports Academy, Department of Health (DOH) at Inter Agency Task Force Emerging Infectious Disease (IATF-EID). “Medyo nag-aadjust pa po kasi medyo pagod sa biyahe,” wika ni Petecio na nasasabik ng makapagsimula ng pagsasanay upang makuha ang kinakailangang timbang. “Kaya nga sobrang excited ako nu'ng sinabi babalik na Manila para sa bubble training kasi mas makakapag-focus ako ng husto talaga, 'yung nasa isang compound lang kayo at 'yung mindset ng lahat ay iisa lang, kundi mag-training at 'yung darating na Olympic qualifier.

Sunod namang papasok ngayong araw ng Sabado ang delegasyon ng national karate na bubuuin nina foreign coach Okay Arpa ng Turkey, strength and conditioning coach Sonny Montalbo, coach Jonel Perana, Jamie Lim, Joaane Orbon, Sharief Afif, at Ivan Agustin, at Alwyn Batican at taekwondo jins Pauline Lopez, Olympian Elaine Kirstie Alora, Kurt Bryan Barbosa, Arven Alcantara, Samuel Morrison, Ian Chavez, Rhezie at Rheza Aragon at mga coaches na sina Carlos Padilla, Al De la Cruz at Luis de Mesa (strength and conditioning) sa Enero 17.

Inaprubahan ng IATF nu'ng Disyembre 15, 2020 ang rekomendasyon ng muling pagdaraos ng pagsasanay ng mga national team para sa 2021 Summer Olympic Games na magbubukas simula Hulyo 24-Agosto 8 sa Tokyo, Japan.

Vaccine, pondo at training ng nat'l athletes, susi sa tagumpay

ni Gerard Peter - @Sports | January 15, 2021

Malaki pa rin ang paniniwala ni Philippine Sports Commission (PSC) commissioner Ramon Fernandez na ang susi sa patuloy na tagumpay ng National team sa darating 31st Southeast Asian Games sa Hanoi, Vietnam ay nakasalalay sa alokasyon ng pondo at masinsinang preparasyon at pagsasanay ng mga national athletes.

Kasunod ng pagkakahirang bilang Chef de Mission ng Hanoi Games sa Nobyembre 20-Disyembre 2, aminado itong mahihirapan ang Pilipinas na maidepensa ang korona sa biennial meet dahil sa bentahe ng host country sa pagpili ng mga sports events na lalaruin, gayundin ang pagkaka-delay ng mga pagsasanay ng national athletes bunsod ng kawalan pa rin ng mga bakuna para sa nararanasang krisis dulot ng coronavirus disease (COVID-19).

“We are still in pandemic and we’re just in a touch-and-go situation right now. Without the vaccine. Pretty hard to prepare them. But, I really believe that the budget and preparation is the key for all of this. Fearless forecast nasa Top 3 pa rin naman,” pahayag ni Fernandez, kahapon ng umaga sa lingguhang TOPS: Usapang Sports via Sports on Air. “Team work is needed just like what we did in 2019. With the help of all parties like the PSC, POC (Philippine Olympic Committee), NSAs (National Sports Association), Congress and the Senate to come together and support them, hopefully we can really see a good performance in the coming SEAG,” dagdag nito sa programang suportado ng PSC, Games and Amusement Board at Philippine Amusement and Gaming Corporation (PAGCOR).

Umaasa siya na mapapasama ang national athletes, partikular na ang mga Olympic bound at hopefuls, bilang mga parte ng mga prayoridad bukod sa frontliners na mabibigyan ng mga bakunang bibilhin ng pamahalaan.

“It is really the preparation of our athletes, in terms of Olympics is concerned. Medyo mahihirapan tayo kung walang vaccine. I really hope na maagahan at mabigyan ng priority ang ating mga national athletes. Chairman (Butch) Ramirez is trying his best to negotiate with the IATF (Inter-Agency Task Force) and DOH (Department of Health) para mapasama ang ating mga atleta sa mga top priorities ng government,” ekslipka ni Fernandez.

Sinabi niya na tila magiging triple ang trabaho niya bilang Chef de Mission dahil sa pandemya, higit na sa mga pagsunod sa tamang health safety standards at protocols ng mga atleta. Mahirap gampanan ang maayos na pagsasanay hangga’t walang bakunang naibibigay sa mga atleta. “Doble o triple ang hirap ng preparation natin for the Olympics and SEA Games knowing that preparation and training is the key to success. We also need to work closer with the IATF and DOH on how to control the pandemic. Talagang vaccine is really the biggest key to a normal way of training and competing in international tournaments,” saad ni Fernandez.

Maaari umanong sandalan ng Pilipinas para sa kauna-unahang gintong medalya sa Summer Olympic Games ay sina boxers Eumir Felix Marcial, 2019 World champion Carlos Yulo ng gymnastics at 2016 Rio Olympics women’s weightlifting silver medalist Hidilyn Diaz, habang hindi naman niya inaalis na makapagbigay rin ng mga medalya sina Ernest Obiena ng men’s Pole vault, Kiyomi Watanabe ng women’s judo, Yuka Saso at Bianca Pagdanganan ng Golf, Taekwondo athletes Pauline Lopez at Olympian Kirstie Alora, karatekas Junaa Tsukii, Joanne Orbon at Jamie Lim.