Japoy at Valdez, tuloy ang 6-minute virtual exercises

ni Gerard Peter - @Sports | February 5, 2021

Patuloy na isinusulong ang konsepto ng kahalagahan ng pampalakasan hindi lamang sa mga kabataan, bagkus ay sa pangkalahatan upang mapanatili ang kaliwanagan ng isipan mula sa malakas na pangangatawan.

Nagiging mas madaling ipahatid at ituro sa mga kabataan sa tulong ng kanilang mga guro, magulang at coaches ang mga basic instructions at ehersisyong inihahatid ng dalawa sa respetado at multi-awarded athletes na sina volleyball superstar Alyssa Valdez at Southeast Asian Games champion Japoy Lizardo na halinhinang itinuturo ang 4 na klase ng easy-to-do-it na exercise sa loob ng 6-na minuto sa kanilang YouTube channel na umabot na sa mahigit 38 million na manonood sa buong bansa.

Muling nagsanib-pwersa ang Milo Philippines at Department of Education (DepEd) upang mas lalo pang ilapit sa marami, higit na sa mga kabataan ang pagtataguyod ng pampalakasan mula sa paglulunsad ng Milo Champion Habit via online.

“We always believe that active kids are better learners, that’s why with our programs shifted into digital based, we launched another way to help our kids boost their lifestyle into healthier and better performers in school and in sports,” pahayag ni Lester Castillo, Asst. Vice president ng Nestle Philippines – Milo, kasama si Milo Ambassador Japoy Lizardo, kahapon ng umaga sa lingguhang TOPS: Usapang Sports na live na napanood at napakinggan via Sports on Air. “It’s easiest way to inspire our kids to do active and do even more at the expense of their own home. Everyone can do it before or after their online classes,” dagdag ni Castillo.

Malaking papel ang ginagampanan ng DepEd sa mandatong bigyang prayoridad ang sports, na napapabilang sa mga polisiya ng estado kaakibat ang iba pang mga mahahalagang pinag-aaralan kasama ang edukasyon, kultura, sining, agham at teknolohiya.

“Yung konsepto ng pagpapahalaga sa sports o pag-engage sa physical activities, sports competitions ay isang mandato na nakapaloob mismo sa ating saligang batas. Iyan ay isang polisiya ng ating estado na bigyang prayoridad ang pampalakasan…mahalaga po ang mga paggalaw at physical activities sa konteksto ng palakasan, dahil ayan po ang itinatadhana ng batas,” paliwanag ni DepEd Undersecretary Tonisito Umali sa programang hatid ng PSC, PAGCOR at GAB). “Kaya kami ay nagpapasalamat sa Milo Philippines, dahil kahit sa panahon ng pandemya, dahil sa kanila natutulungan nila ang kagawaran ng edukasyon kung papaano maisulong at maisakatuparan ang mandatong ito, sa pamamaraan katulad po ng Milo Champion habit.”

Ito rin ang klase ng pamamaraan na ginagamit ng dating national team member na si Lizardo sa kanyang mga estudyante sa taekwondo, kung saan kahit na nasa bahay lamang ang lahat ay nagagawa pa ring magabayan at maturuan sa paggamit ng panibagong platform sa panahon ng pandemic gamit ang teknolohiya ng online virtual.

Patutulugin ni Garcia si Pacman sa exhibition fight

ni MC / Gerard Peter - @Sports | February 1, 2021

Tatargetin umano ni undefeated American boxer Ryan "KingRy" Garcia na ma-knockout si 8th Division world champion Manny Pacquiao sakaling matuloy ang niluluto nilang laban.

Ito ang naging pangako ni Garcia sakaling matuloy ang tapatang “Pacman” at “KingRy” kahit na hindi na itataya ng nag-iisang eight division World champion ang World Boxing Association (WBA) welterweight title at lalabas lang na isang exhibition match ang laban.

Inihayag ng ama ni Ryan na si Henry Garcia na kahit isang exhibition match lang ang salpukan ay asahang magiging isang totoong laban ang harapan ng Filipino legendary icon at rising star athlete.“He's 20 years younger than Pacquiao and we feel that's to our advantage and that's one of the reasons why I feel it's a changing of the guard fight - it's our time,” wika ng matandang Garcia. “We don't know exact details yet but we're looking at a good 10-rounder but it's going to be a real fight, that I do know.”

Nauna ng inilahad ng WBC interim lightweight champion sa kanyang social media account na ang pinapangarap lang na laban ay mistulang magkakaroon ng katotohanan. Sinundan din ito ng ulat mula sa report ni Mike Coppinger ng The Athletic noong nakaraang linggo na kasalukuyang mayroong nagaganap na ‘panimulang pag-uusap’ sa pagitan ng mga kampo nina Pacquiao (62-7-2, 39KOs) at Garcia (21-0, 18KOs).

“Everybody has agreed, all there is left are the details. But both parties have already agreed; promoters have agreed, sanctioning bodies have agreed, so we're very close to sealing the deal. We're going to know this week if everything goes through, we're negotiating today, they are already in discussion,” pahayag ni Henry Garcia. “It's not bizarre, it's just two people who want to fight each other; Ryan's fighting a legend and Pacquiao's fighting a rising star, so it's not awkward at all. What I do know is both fighters want to fight each other and it's going to be for real - it's going to be a real fight. Ryan always admired Pacquiao and always wanted to fight a legend before his time was up, he wanted to fight someone of Pacquiao's caliber, so there's a chance it could happen."

Kasalukuyang lumalaban sa lightweight division si Garcia, at iminungkahi ng ama nito na maaaring magkasundo sila sa isang catch-weight sa 143-pounds na idinagdag pang puwede umanong mangyari sa Abril o Mayo sa Texas. “I'd like that fight at 143 and I'd love that fight to happen in April or May. This one is possibly going to be in Texas, we're not sure yet.”

PBA teams, kanya-kanya na ng training, new season sa Marso

ni Gerard Peter - @Sports | February 1, 2021

Nagsimula na sa indibidwal na pagsasanay ang ilang mga koponan sa PBA, ngunit nananatili pa ring walang malinaw na pagbubukas ng panibagong season ng pinakamatandang liga sa Asya.

Muling nabigyan nang basbas ang ilang mga koponan upang magdaos ng mga pagsasanay ng iba’t ibang lokal na pamahalaang lungsod, gayundin ang pagsusuri ng Games and Amusement Board (GAB) sa mga pasilidad na ginagamit ng mga ito.

Kinumpirma ni PBA commissioner Willie Marcial na nakumpleto na ng ilang koponan ang mga kinakailangang requirements upang mabigyan nang permiso ng mga nasasakupang local government units (LGUs) at GAB hinggil sa mga safety measures at health protocols, isa na rito ang pagkuha ng swab testing. “Pinayagan na ng ilang teams ng LGUs at na-inspeksyon na ng GAB yung mga lugar na pinag-practice nila,” wika ni Marcial.

Iniangat na sa limang manlalaro kasama ang limang iba pa na binubuo ng coaches at physical therapists ang maaaring makapagdaos ng pagsasanay sa loob ng gymnasium. Matatandaang limitado lamang nung una sa apat na manlalaro kasama ang dalawa pang coach ang magkakasama sa loob ng gym.

Gayunpaman, binigyang-diin ni Marcial ang mahigpit na pagpapatupad sa kautusan ng pamahalaan hinggil sa pagsunod sa health at safety protocols, higit na ang hindi pagkakaroon ng mga scrimmages sa oras ng pagsasanay.

Lumabas sa report na nagsimula ng magbukas ng pagsasanay ang mga koponan ng Philippine Cup runner-up TNT Tropang Giga at NLEX road warriors, habang magsisimula mula ngayong Lunes ang workouts ng Meralco Bolts, NorthPort Batang Pier at San Miguel Beermen, samantalang inaasahang magsusunuran ang mga nalalabing koponan sa linggo, kabilang ang reigning champion Barangay Ginebra na umano'y magsisimula sa huling linggo ng Pebrero.

Inamin ng 59-anyos na ika-10th commissioner ng liga na kahit pa nagsisimula ng magpakondisyon ang mga manlalaro ng bawat koponan ay hindi pa rin malinaw kung kailan ang pinal na pagbubukas ng 43rd season ng Philippine Cup, dahil patuloy na naninindigan ang board of governors na antayin munang magkaroon ng bakuna ang bawat manlalaro at coaching staff.

Nitong Huwebes ay inatasan si Marcial na makipag-usap sa Red Cross at sa pinuno nitong si Sen. Richard Gordon na makabili ng mga bakuna laban sa coronavirus disease (Covid-19), partikular na ang AstraZeneca at Moderna para magamit ng mga koponan.