Susuot sa butas ng karayom si Judoka Watanabe sa Olympics

ni Gerard Peter - @Sports | June 25, 2021

Bilang kauna-unahang Filipinang judoka sa Summer Olympic Games si 4-time Southeast Asian Games gold medalist Kiyomi Watanabe, isa rin sa mga ninanais ng pamunuan ng national judo team ay masungkit ng anumang medalya sa quadrennial meet.

Aminado si Philippine Judo Federation (PJF) President David Carter na mahirap na makamit ang naturang paghahangad sa Olympic Games, higit na sa darating na 2020+1 Tokyo Olympics, ngunit nakikinita nito na maaaring magkaroon ng tsansa ang 24-anyos na Filipino-Japanese na makapitas ng medalya sa Olympic Games na magsisimulang magbukas sa Hulyo 23-Agosto 8 sa Tokyo, Japan.

“We can’t predict the chances in judo. Prior to Asian Games 2018 (Jakarta-Palembang), nagkaroon ang mga Japanese official’s ng side na magiging Japan vs Japan ang labanan, but on that competition, only one pure Japanese is being played, and the other Japanese player na tinutukoy nila is Kiyomi, so anything can happen inside the mats,” pahayag ni Carter, kahapon sa lingguhang TOPS Usapang Sports on Air. “First time tayo nagkaroon tayo ng silver medal sa Asian Games, we don’t want her to pressure, generally all our national athletes, pero kapag andun na siya sa competition, hopefully palarin. I know she will do her best. Yung pinapakita niya sana galingan niya,” wika ni Carter.

Nakapasok ang Cebu City-born, Japan-based Pinay athlete sa bisa ng Asian Continental Quota na inanunsyo ng International Judo Federation (IJF) nitong nakalipas na Miyerkules. Pasok sa 41st ranking sa world 2017 European Open Championship sa pamamagitan ng 1,506 points sa women’s under’63kgs category.

Nabigo itong makakuha ng direct qualification sa nakalipas na 2021 World Judo Championships nitong nagdaang Hunyo 6-13 sa Laszlo Papp Sports Arena sa Budapest, Hungary matapos maagang maputol ang kampanya nito sa second round ng women’s under-63kgs category.

Ilan umano sa mabibigat na makakatapat ni Watanabe sa light-middleweight category ay sina World No.1 Clarisee Agbenenou ng France, 2016 Rio Olympics gold medalist Tina Trstenjak ng Slovenia, Miku Tashiro ng Japan, Olympics bronze medalist Sanne Vermeer ng The Netherlands at mga high-ranked competitors.

Delos Santos, sumipa ng ika-26th gold sa Euro Grand

ni Gerard Peter - @Sports | June 23, 2021

James Delos Santos-IG james.de.los.santos

Nangangalahati pa lamang ang taon ngunit nalalapit nang malampasan ni dating two-time Southeast Asian Games medalist ang nakolektang gintong medalya noong isang taon, ng muli na naman itong maghari para sa kanyang ika-26th gold medal sa 2nd Euro Grand Prix eTournament.

Nagbulsa ng kabuuang 36 gold medals ang 31-anyos na dating national team member noong 2020, subalit patuloy itong nagtatamasa ng mataas na karangalan kasunod ng matagumpay na pagdaig kina Alfredo Bustamante (24.86) ng Miyagiken International Karate Academy ng Estados Unidos at Roland Hager (22.14) ng Karate Dojo DJK ng Germany sa elimination round. Tinapos niya ang e-kata individual male seniors category championship sa pamamagitan ng paggiba kay Domont Matias Moreno ng Karate-Do Biel Bienne ng Switzerland sa iskor na 24.84-24.62.

Naibulsa nina Bustamante at Ondrej Chocholaty ng Budo Plazen ng Czech Republic ang tig-isang bronze medals. Target ng Dela Salle University graduate na malampasan ang nakamit na 36 gold medals noong isang taon, kasunod ng pagkakakopo ng pagiging World No.1 sa e-kata male individual category.

Ito na rin ang ika-62nd gold medals ng 8-time Philippine National Games champion buhat ng lumahok ito noong isang taon sa e-kata tournaments kasunod ng pagbabawal sa face-to-face events dahil sa pagkansela dulot ng COVID-19 pandemic.

Bago rito ay natamo ni De Los Santos ang ika-24th at 25th na titulo nito ring buwan sa The Crown: International ENDAS Karate Trophy #2 at Sportsdata e-Tournament World Series.

Silva, panalo sa Split-Decision nang Magboksing vs. Chavez

ni Gerard Peter - @Sports | June 22, 2021

Nakamit ni dating undisputed UFC middleweight champion Anderson “Spider” Silva ang isang pambihirang panalo laban sa dating boxing middleweight titlist na si Julio Cesar “The Son of the Legend” Chavez Jr. via split decision sa sanctioned eight-round boxing match sa Tribute to the Kings sa Jalisco Stadium sa Guadalajara, Mexico.

Pinaboran ng dalawang hurado ang 46-anyos na Brazilian fighter at future mixed martial arts Hall of Famer sa iskor na 77-75, habang ang isa ay kinatigan ang 35-anyos na dating WBC 160-pound champion. “I feel so happy. I needed to do this because I love fighting, and boxing has been my dream for many years,” pahayag ni Silva. “I came here to do my best. I respect all the Mexican people. They’re very special people. Maybe I’ll fight again very soon.”

Kumunekta ng 99 na suntok mula sa binitawang 392 ang Sao Paulo, Brazil native para sa 25% connect rate, samantalang mas mababang 53 pumasok na patama sa 153 pagtatangka ang kinana ng Mexican boxer, na anak ng legendary great na si Julio Cesar Chavez Sr.

Ito ang ikalawang panalo ni Silva sa professional boxing at isang talo na huling lumaban sa boxing ring noon pang Agosto 5, 2005 laban kay Julio Cesar de Jesus ng Brazil sa 2nd round knockout, habang hindi naman naging maganda ang resulta ng 7 sa 9 na huling laban nito sa UFC, matapos ang tinamong leg injury nung 2013 laban kay Chris Weidman, nahirapan na itong maibalik ang dating angking galing na sinundan pa ng magkakasunod na talo kina Michael Bisping, Daniel Cormier, Israel Adesanya, Jared Cannonier at Uriah Hall.

“It could have been a draw,” wika ni Chavez, na nawala ang premyo nitong $100,000 matapos pumalyang makuha ang inaasahang timbang na 182-pound limit. “He really didn’t do that much damage. I felt good. I felt that he wanted to control the fight and make me fall into his fight.”