Hintayin ang pagbabalik sa SEAG long jump ni Khay Santos

ni Gerard Peter - @Sports | April 13, 2021

Minsan nang pinagreynahan nina Elma Muros-Posadas, Lerma Bulauitan-Gabito at Marestella Torres- Sunang ang athletics event na long jump sa Pilipinas; ngunit sa kasalukuyang panahon, tila nagkukulang ang susunod sa yapak ng tatlong legendary champion – isang pagkakataon na nais makamit ni dating national team member Katherine “Khay” Santos.

Makailang ulit ng nagningning sa ilang mga international tournaments ang 30-anyos na Baguio City long jumper kabilang ang Asian Grand Prix at Southeast Asian Games – subalit minsan na ring tinalukuran ni Santos ang pampalakasang maaaring pangibabawan niya ng mga panahong nakalipas.

“Noong 2019 SEA Games, although wala ako sa stadium, pero based on the results, di tayo nakapasok sa 2019 SEAG. So parang sa akin, nalungkot talaga ako dun. Dumating ang point na sana andun ako. Yun ang moment na sabi ko dapat nandoon pa rin ako, pero dahil nag-stop ako so choice ko yun,” pahayag ni Santos sa weekly TOPS: Usapang Sports nitong nagdaang Huwebes sa Sports on Air webcast.

Ngunit sa pagkakataong ito, muling susubok ang 2011 SEA Games bronze medalist na makamtan ang naipagpalibang pangarap. “Ngayong 2021, talagang finalize na ang comeback ko kasi nakakalungkot na wala nang long jumper for the next SEA Games in Vietnam. And with my preparations, one day at the time ang ginagawa ko kasi mom ako, may baby ako na inaalagaan and I wanted to make sure na ang preparations sa training ko, hindi ako mai-injure. For now, I do strength & conditioning and more on endurance training ang ginagawa ko,” paliwanag ng 2014 PSC-POC Philippine National Gmes champion sa programang suportado ng Philippine Sports Commission (PSC). Games and Amusement Board (GAB) at Philippine Amusement and Gaming Corp. (PAGCOR).

Napagtanto ni Santos na tila mayroon pa siyang misyong hindi pa napagtatagumpayan at naudlot na pangarap na nais patunayan para sa kanyang bansa. “’Yung reason ko bakit ako makaka-comeback is to prove myself and also the countrymen natin na kaya ko pa na hindi reason for me to stop na dahil mom ka,” eksplika ni Santos.

Olsim, sa ONE Strawweight Division, umangat sa 5th rank

ni Gerard Peter - @Sports | April 10, 2021

Dahil sa kanyang pambihirang husay at galing sa huling laban noong Marso, agad na umangat sa ika-5th rank si newest Team Lakay sensation Jenelyn Olsim sa ONE Championship women’s strawweight division matapos patapikin ang dating No.5 contender na si Maira Mazar ng Brazil.

Hindi natinag ang 24-anyos na Muay Thai fighter sa beteranong Brazilian Sanda at Wrestler nang tapusin niya ang laban sa pamamagitan ng Guillotine choke sa 41 segundo ng 3rd round upang matagumpay na masunod ang inaasam nilang game plan para sa kanyang unang panalo sa ONE stable.

“Pinaghandaan namin ang larong iyon kaya po nag-stick kami sa aming game plan na to get the submission and defend the wrestling style niya,” saad ni Olsim, Huwebes ng umaga sa weekly Tabloids Organization in Philippine Sports (TOPS) Usapang Sports webcast na live na napanood sa Sports on Air podcast. “Hinasa ko pa po yung striking ko at sobrang mas nag-focus kami sa ground techniques,” dagdag ni Olsim, kasama si Team Lakay member at dating BRAVE CF flyweight fighter na huling lumaban noong 2019 sa MOA Arena.

Inamin ni Olsim minamaliit ang kanyang kakayahan kung kaya siya ang inilagay bilang kalaban ng Brazilian wrestler na puntiryang makuha ang ikalawang sunod na pagkapanalo at mas mapatatag ang puwesto sa stawweight rankings. Subalit, tila hindi nasunod ang mga plano ng katunggali ng determinadong tapusin ng Baguio City-native ang laban.

“Naramdaman ko na parang gusto nilang ipakain ako sa laban. They are underestimating me, pero good thing na ganun ang sitwasyon kase mas na-motivate ako lalo para manalo,” paliwanag ni Olsim na mayroong rekord na 4 wins at 2 loses sa kanyang mixed martial arts career, na nagnanais na makabawi sa darating na 31st Southeast Asian Games sa Hanoi, Vietnam kasunod ng silver medal finish sa Manila meet nung 2019 laban kay Bui Yen Ly ng Vietnam sa women’s 54kgs category.

Kasalukuyan pang naghihintay ng makakalaban si Olsim at patuloy na hinahasa ang ilang mga kakulangan bilang MMA fighter at maaaring itapat siya kay No.4 ranked Ayaka Miura (10-3) ng Japan.

Ancajas, may epektibong teknik kontra Mexican

ni Gerard Peter - @Sports | April 10, 2021

Muling mabubuhay ang mabigat na rivalry sa pagitan ng Filipino at Mexico sa pagtutuos sa ibabaw ng ring nina International Boxing Federation (IBF) super-flyweight champion Jerwin “Pretty Boy” Ancajas at Jonathan Javier “Titan” Rodriguez sa Sabado ng gabi (Linggo sa Pilipinas) sa Mohegun Sun Arena sa Uncasville, Connecticut sa Estados Unidos.

Naniniwala si MP Promotions President at international matchmaker Sean Gibbons na ang pagtatapat nina Ancajas (32-1-2, 22KOs) at Rodriguez (22-1, 16KOs) ay muling bubuhay sa mabigat na kasaysayan ng pagbabasagan ng mukha ng Filipino laban sa mga Mehikano, kung saan ang nag-iisang eight division world champion na si Manny “Pacman” Pacquiao at mga Mexican legends na sina Marco Antonio Barrera, Erik Morales at Juan Manuel Marquez ang nagsindi ng paglagablab ng bakbakan sa pagitan ng dalawang lahi.

“It’s gonna be a Mexican Filipino rivalry, when the Mexicans fight the Filipinos, it taking up to another level,” pahayag ni Gibbons sa nakalipas na virtual press conference noong isang buwan. “There is something about that the Senator (Pacquiao), Barrera, Morales and Marquez all develop this rivalry,” dagdag ni Gibbons.

Aminado ang boxing promoter na hindi madaling katapat ang Mexican boxer na mayroong six-fight winning streak, kung saan lima sa laban nito ay nagtapos sa knockout victory. Subalit, tiwala ang American matchmaker na magagawa pa ring mapagtagumpayan ng 29-anyos na Panabo, Davao del Norte-native ang kanyang kalaban.

“I’m cautiously optimistic never look past anybody, but I believe Jerwin’s will skills will pay the bills, I think Rodriguez is a tough progressive game guy but at the end of the day Jerwin’s been a champion now for over 5 years and I see him winning possibly later in the fight,” wika ng 54-anyos na tubong Oklahoma City.

Malaki ang paniniwala ng dating professional boxer-turn matchmaker/promoter na magiging epektibo ang diskarte at istilong gagamitin ng 5-foot-6 na Filipino southpaw laban sa 25-anyos na San Luis Potosi, Mexico fighter gaya ng ginawa niyang pagpapasuko sa kanyang ika-7th at 8th title defense kina Japanese Ryuichi Funai nung May 4, 2019 sa Stockton, California at Miguel Gonzalez ng Chile noong Disyembre 7, 2019 sa Auditorio GNP Seguro sa Mexico, pareho sa loob lamang ng 6th rounds ng 12 round championship match.